Read njo TAZÜNGKUNEM 34 Bible Online

TAZÜNGKUNEM 34 - njo bible

TAZÜNGKUNEM 34

¹Aser Mosai Moab lenten nungi Yeriko tsütsü aliba Nebo tenem, Pisga tenem kolaki atu. Aser KIBUBAi Gilead lima ajak, Dan tashi sayu;

²aser Naftali ajak, aser Efraim aser Manase lima, aser Yihuda lima ajak, anüolen tzüyim tashi,

³aser Negeb, aser ali telemok, asangdong yimti Yeriko lenten nungi Zoar tashi, pa dang sayu.

⁴ Aser KIBUBAi pa dang ashi, “Abraham, Isak aser Yakob dang, ni ne chirnur nem agütsütsü, ta nangzükba limaji ya lir: Ne tenük agi ni ibai ne nem ngudaktsüogo, saka nai ajagi maotsü.”

⁵Anungji KIBUBA o amato yangji Moab lima nung KIBUBA tenzüker Mosa asü.

⁶Aser Bethpeor tejaklen Moab lima nung pai pa arem, saka tanü tashi shingaia pa leper memetet.

⁷Aser Mosa asü dang küm noklang ka ser metsü liasü, pa tenük merabangi liasü, aser pa temang tashi mejeni liasü.

⁸Aser Israel chirtemi Mosa asoshi Moab lenten nung anogo semer ajeb, yamaji Mosa asoshi mang yima ajepba anogo abensa,

⁹Aser Nun jabaso Yihusua shisatsü tanela agi sünga liasü; kechiyong Mosai pa dak pa teka agi nemet, aser Israel chirtemi pa dang anga, aser KIBUBAi Mosa dang melaba ama inyak.

¹⁰ Iba mapang tashi nung KIBUBAi tejak o tejak na jitepa meteta aliba Mosa ama Israel nung ainkar shinga madoki liasü.

¹¹Kechiaser temaitsü aser sayatenya ajak koba Ijip lima nung Farao, aser pa tenzükertem, aser par linük ajak nung inyaktsü KIBUBAi pa yok,

¹²aser tashi tulu teka aser tetsübutsü mapa tulu ajak Mosai Israel nüburtem tsüngdang inyak.