Read njo TAZÜNGKUNEM 4 Bible Online

TAZÜNGKUNEM 4 - njo bible

TAZÜNGKUNEM 4

¹Aser Mosai ashi “Tang, oh Israel, ni nenok dang sayutsüba ozüng aser obendangbaji nenoki angang. Itemji benshiang aser KIBUBA nenok tsürabur Tsüngremi nenok nem agütsüba lima nungji nenok taküm alitsü

²KIBUBA nenok Tsüngremi melaba koba nenok nem agütsür idakji nenoki tali mebendenloktsüla, mesüra iba nungi nenoki meindoktsüla.

³ KIBUBAi Baal Peor nung kechi inyak aji nenok tenük agi nguogo. Peor nung Baal sülen anitaker ajak KIBUBA nenok Tsüngremi nenok rongnungi samatsüogo.

⁴Saka nenok shibaisa KIBUBA nenok Tsüngrem dak akanga sot, itemji tanü tashi taküm lir.

⁵“Ajiang, KIBUBA kü Tsüngremi kü dang melaba ama, ni ozüngtem aser obendangbatem nenok dang sayuogo, anungji nenoki agitsü oya aliba lima nung nenoki itemji benshitsü.

⁶Anungji itemji kanga kümdanga benshiang, kechiaser iba yagi kintem madang nenok shisatsü aser tangatetba sayutsü, shirnoki iba indang angashia ashitsü, ‘Atangji iba kin tulu ya shisa taka aser tangatetba nübur lir.’

⁷“Kechiaser kodangsa asenoki asen Tsüngrem KIBUBA dang jadir, Pa asenok anasa aliba ama kechi kin tulu tsüngrem anasa ali?

⁸Mesüra tanü ni nenok madang yutsüba temeshi telatetba obendangba ozüng ama kechi kin tulu nung ali?

⁹Nenok pei tenük agi anguba mapatemji mamatsüsa aser parnok taküm ali tashi itemji nenok temulungjang nungi mepilatsü asoshi kümdangang. Itemji nenok chirtem aser nenok semchirtem dang sayuang.

¹⁰Horeb nung KIBUBA ne Tsüngrem tsüngdang noktakba anogoto bilemtetang, kodang KIBUBAi kü dang ashi, ‘Nüburtemji kü tsüngdangi atenshidakjang, aser ni parnok nem kü otem angashidaktsütsü; anungji parnok taküm ali tashi parnoki ni tsübutsü aser aji parnok chirtem dang sayutsü.’

¹¹“Nenok tenem tsüng anasa arua noktak, aser ammang mepet aser ammang temelem agi akhümbanger anüng tiyong tonga tenem nungji mi jangru.

¹²Idangji KIBUBAi mi nungi nenok den jembi, nenoki ola dang angashi, saka temang mangu; ola dang liasü.

¹³Anungji pai pei tezüngzüktepba nenok nem metetdaktsü, koba pai nenok dang benshitsü mela, aji ozüng ter; aser pai aji lungpak ana nung zülu.

¹⁴Aser iba mapang nungji nenok dang ozüng aser obendangbaji sayutsü KIBUBAi kü dang mela, anungji nenoki agitsü oya aliba lima nung nenoki aji benshitsü.

¹⁵“KIBUBAi nenok dang Horeb nung mi nungi jembiba anogo nung nenoki ola dak alema temang kecha mangu. Anungji nenok pei sasa kanga kümdangang,

¹⁶ aji oda nenok aibelen masütsü, aser nenoki tebur mesüra tetsür mesüka süngyanglu kecha nenok asoshi meyanglutsü.

¹⁷Mesüra ali nung aliba shiruru kar mesüra anüng nung yimzüba ozü kar mesükba,

¹⁸mesüra ali nung ayazüba mesükba, mesüra tzü telung nung aliba ango kar mesüka meyanglutsüla.

¹⁹Kodang nenoki anüng reprangdir, anü, ita aser petinutem, aser anüng nung alibatem ngua item madang mapudaktsü kümdangang. Itemji anüng kübok nisung ajak nem KIBUBAi lemzükja kar.

²⁰ Saka nenokbo KIBUBAi tanü ama pei nübur akümtsü asoshi Ijip merang misem nungi aniteta anir aru

²¹ Tang nenok meji KIBUBAi kü dang ain adok aser Yordan ajanga nibo maotsü mesüra alinük tajung koba KIBUBA Tsüngremi nenok nem senmangtsü asoshi agütsür ajagi nibo maitsü ta azüngashi.

²²Kechiaser nibo iba lima nung asütsü, ni Yordan ajanga maotsü, saka nenokbo aotsü, aser iba lima tajungji agitsü.

²³Anungji KIBUBA nenok Tsüngremi koba tezüngzüktepba nenok den yanglu aji mamatsü kümdangang. KIBUBA nenok Tsüngremi melaba ama nenoki süngyanglu kecha teyanglu.

²⁴ Kechiaser KIBUBA nenok Tsüngremji tesamatsüba mi, tenükmiba Tsüngrem lir.

²⁵“Kodang nenok chirnur aser semchisemnur ngudir, aser linük nung talangka lidir, aser aibelena inyakdir aser KIBUBA ne Tsüngrem tsüngdang kechi temenen aji inyaka süngyanglu yangluba ajanga pa ain adokdaktsüdir,

²⁶tanü ni nenok anema kuli asütsü asoshi anüng ali jazüker, oda nenoki Yordan ajanga yir agitsü aliba linük nungji nenok yakta samatsü, nenok idakji talangka malitsü, saka atangji nenok samatsü.

²⁷ KIBUBAi nenok nüburtem rongnung prokshidaktsütsü, aser KIBUBAi nenok koleni anidir item kintem rongnung nenok ishika dang alitsü.

²⁸Idakji nisungi yangluba süng aser lung tsüngremtem kobai mangur, mangashir mesüra memenemteter itemji nenoki tenzüktsü.

²⁹ Saka idakji nenoki KIBUBA ne Tsüngrem bushia, ne mulungjang ajak agi, aser ne taküm ajak agi pa bushira nenoki pa angutsü

³⁰Kodang nenok timtem tekangshi nung lidir, aser item ajak nenok dak atalokdir, idangji tesülen nenoki KIBUBA ne Tsüngrem dangi meyiptsü aser pa dang tashi angatsü.

³¹Kechiaser KIBUBA Tsüngremji aria bilemba Tsüngrem lir; pai nenok metoktsütsü, mesüra pai nenok tsürabur dang azüangshia züngzüktepbaji mamadoktsü.

³²“Nenok masodang tesüiba mapang Tsüngremi alima nung meimchir yangluba anogotem indang asüngdangya-ang, aser anüng tatem külen nungi külen tashi asüngdangang. Iba ama mapa tulu mesüka atalokdang asü, mesüra iba amai tangashi danga angashi asü?

³³Tsüngremi mi nungi jembiba nenoki angashiba amai nübur kari angashir taküm ali asü?

³⁴Mesüra KIBUBA nenok Tsüngremi nenok asoshi Ijip nung inyakba nenoki anguba ama, tetendangba agi, temaitsü aser sayatenya agi rara agi, tashi tait teka agi, aser pa tepen songtokba agi, aser tetsübutsü tulu agi inyakba ama tangar kin rongnung pei asoshi agitsü tsüngrem kari tasü ita aotsü merangdang asü?

³⁵ KIBUBAji Tsüngrem ta nenoki metettsü, aser pa dak alema tangar shinga mali ta nenoki metettsü asoshi itemi sayuogo.

³⁶Nenok azüoktsü asoshi pai anüng nungi pei ola angashidaktsüogo, aser alima nung pa mi tulu nenok nem ngudaktsü, aser mi tiyong nungi nenoki pa ola angashi.

³⁷Kechiaser pai nenok tsürabur meim nung, parnok sülen par metsü shimtet. Aser pai pei tashi tulu agi nenok Ijip nungi anitet.

³⁸Aser nenok dang nungi tuluba aser tashi taitba kintem nenok jakdang aritoka, tanü amai pai nenok nem parnok li senmang amangdaktsü.

³⁹Anungji temalen anüng nung aser teküboklen alima nung KIBUBAji Tsüngrem ta nenoki tanü metetang aser nenok temulung nung yuang, tangar shinga mali.

⁴⁰KIBUBA ne Tsüngremi teti asoshi nenok nem agütsüba lima nung nenok sülen nenok chirtem talangka arishia alitsü asoshi tanü ni nenok nem agütsüba pa ozüng aser temelabatemji nenoki benshitsüla.”

⁴¹ Idangji Yordan anüdoklen yimti asem Mosai shimteta ayu,

⁴²oda nisung shibai memeteti akhidang mesempatepi aliba pei kiyonger tepsetdir, pei taküm kümzüktsü asoshi item yimtitem ka nung pai oa jenoktsü.

⁴³Item yimtitemji: Reuben kidong asoshi lisem lima lenten nung Bezer, Gad asoshi Gilead nung Ramoth, aser Manase asoshi Bashan nung Golan.

⁴⁴Israel nunger madang Mosai yutsüba ozüngji ibai lir.

⁴⁵Kodang parnok Ijip nungi adok, Mosai Israel nunger madang jembiba kuli, telatet ozüng aser obendangba ozüngji itemi lir.

⁴⁶Yordan atena or Bethpeor tejaklen lenten nung Heshbon nung aliba Amor nunger chuba Sihon linük nung shirnok Mosa aser Israel nungertem parnok Ijip nungi adokdang akok.

⁴⁷Aser parnoki par lima aser Bashan chuba Og lima, Yordan atena oa anüdoklen Amor nunger chuba parnoki agi.

⁴⁸Arnon lenten tatembang nung aliba Aroer nungi oda Sion (aji Hermon) tenem tashi,

⁴⁹aser Yordan atener anüdoklen Araba ajak, oda Pisga tenem wabetsa kübok Araba tzüyim tashi.