Read njo TAZÜNGKUNEM 5 Bible Online

TAZÜNGKUNEM 5 - njo bible

TAZÜNGKUNEM 5

¹Mosai Israel ajak aja aser parnok dang ashi, “Angang, o Israel, tanü ni nenoki angashia jembiba telatet ozüng aser yimsü benshitsü nenoki angazükang aser itemji kümdanga benshiang.

²KIBUBA asen Tsüngremi Horeb nung asenok den tezüngzüktepba ka yanglu.

³KIBUBAi asen tsüraburtem den meyanglu, saka tanü idaki taküm alirtem asenok den yanglu.

⁴KIBUBAi tenem nung mi tiyong nungi nenok den tejak o tejak na jitepa jembi.

⁵Iba mapang nungji KIBUBA o nenok dang sayutsü asoshi KIBUBA aser nenok tsüngda nung ni noktaka liasü, nenoki miji tsübua liasü, aser tenem jagi matu. Pai ashi,

⁶“Nenok Ijip lima alar ki nungi anitetba KIBUBA ne Tsüngremji ni lir.

⁷“Nai kü madang tangar tsüngremtem kecha telidaktsü.

⁸ “Temalen anüng mesüra telunglen ali, mesüra teküboklen tzü nung aliba mesüka nai na atema süngyanglu kecha teyanglu.

⁹Nai parnok madang tapudak mesüra parnok tekülem; kechiaser ni sempaba tsürabur temenen yong par chirtem putu asem pezü tashi merenshiba tenükmiba Tsüngrem ni lir.

¹⁰ “Saka shirnoki ni meimer aser kü ozüngtem benshir parnok dang putu meyirijangsa meyirijang aochir.

¹¹ “Nai KIBUBA ne Tsüngrem tenüng amajok nung teteshi, kechiaser shibai amajok nung pa tenüng tetshidir, KIBUBAi pa memerenshi-i malitsü.

¹² “KIBUBA ne Tsüngremi ne dang melaba ama amungnü meshiteta mungang.

¹³Anogo troknü nai tasena mapa ajak inyakang,

¹⁴saka tenetnübubaji KIBUBA ne Tsüngrem asoshi amungnü lir. Iba anogo nungji mapa kecha meinyaktsüla, nai süshia ne jabaso jalai süshia, mesüra ne kiliri aser kilitsür mesüra ne nashi pungchi, gado, mesüra ne kiset shirurutem mesüra ne den semloka alir aener süshia; oda ne kilir aser kilitsür na amaji anisüngzüktsüla.

¹⁵Na Ijip lima nung alarsa liasü aser KIBUBA ne Tsüngrem tashi tait teka agi aser tepen songtoka na idak nungjagi anir aru ta bilemtetang. Anungji KIBUBA ne Tsüngremi amungnü meshiteta ayutsü ne dang mela.

¹⁶“KIBUBA ne Tsüngremi ne dang melaba ama nebu aser netsü akhüm tsübuang, anungji KIBUBA ne Tsüngremi koba linük ne nem agütsür yangji na ari shia aser junga alitsü.

¹⁷“Nai nisung tetepset.

¹⁸ “Nai nüktapangta tebenshi.

¹⁹ “Nai tauya.

²⁰ “Nai ne kiyonger anema tiyazü kuli tagütsü.

²¹ “Nai ne kiyonger kinungtsü tenükshi. Nai ne kiyonger ki süshia par lushi süshia, kilirba süshia, kilirla süshia, par nashi pungchi süshia, gado süshia mesüra kechisa ne kiyonger meyong lidir aji nai tenükshi.

²²“Itemji tenem nung nenok sentepa alidak mi tiyong, mepet aser tammang temelem nungi nenok dang ola tulu agi ayimoktsüba KIBUBA otem lir; aser pai tali kecha mebendenlok. Idangji pai itemji lungpak ana nung zülu aser aji kü nem agütsü.

²³“Kodang mi agi rongya aliba tenem nung, tammang temelem nungi nenoki olaji angashi, nenok kidong tanishirtem aser nenok tamburtem ajak kü dangi aru.

²⁴Aser nenoki ashi, ‘Ajiang, KIBUBA asen Tsüngremi asenok dang pa uluba aser sentsüwangshi sayuogo, aser mi tiyong nungi asenoki pa ola angashiogo. Tsüngremi nisung den jembiaka nisung taküm alir ta tanü asenoki nguogo.

²⁵Saka tang kechiba asenok asütsü? Kechiaser iba mi tulu yagi asenok samatsütsü, kodang asenoki KIBUBA asen Tsüngrem ola angashidir idangji asenok asütsü.

²⁶Kechiaser taküm Tsüngremi mi nungi jembiba asenoki angashiba ama shirnoki angashir taküm ali?

²⁷Anasa oang aser KIBUBA asen Tsüngremi ashiba ajak angang; aser KIBUBA asen Tsüngremi ne dang jembiba ajak nai onok dang shiang, onoki aji angatsü aser inyaktsü.’

²⁸“Kodang nenoki kü den jembi, KIBUBAi angashi, KIBUBAi kü dang ashi, ‘Item nisungtemi ne dang ashiba ni angashiogo. Parnoki ashiba ajakji shitak lir.

²⁹Oda parnoki ni tsübua aser kü ozüngtem benshitsü parnok mulungjang teti yamai alitsü asübo, parnok den aser parnok chirnurtem den teti junga lila!

³⁰Oang parnok dang shiang, nenok süki-i meyipa oang

³¹Saka na yangi ni anasa noktaka ataang, aser ni kü telatet ozüng aser obendangba ajak ne nem agütsüdi, aser ni parnok agitsü agütsüba lima nung parnoki kongshitsü asoshi nai sayutsü.’

³²“Anungji KIBUBA nenok Tsüngremi kechisa mela aji nenoki inyaktsü, nenoki tajichileni mesüra tabeleni temeyipma.

³³KIBUBA nenok Tsüngremi melaba lenmang ajak nung jajang, anungji nenoki agitsü aliba lima nung nenok taküm talang alitsü, aser jangratema alitsü.