Read njo TAZÜNGKUNEM 6 Bible Online

TAZÜNGKUNEM 6 - njo bible

TAZÜNGKUNEM 6

¹“Tang item temelaba tzüzüng ozüngtem aser obendangbatem ya nenok dang sayutsü KIBUBA nenok Tsüngremi kü dang mela, anungji nenoki agitsü aliba lima nung nenoki itemji benshitsü,

²anungji na, ner chirtem aser ner semchirtemi KIBUBA ne Tsüngrem tsübutsü, aser ni ne nem agütsüba ozüngtem ajak parnoki arishi tepiyong benshitsü, aser na arishi anogo talang alitsü.

³Aji asünung Oh Israel, KIBUBA nenok tsürabur Tsüngremi nenok dang nangzükba ama, mamatzü aser ninang mojitzü yima aliba lima nung, nenok azükarutsü aser soyapokyatsü asoshi itemji kümdanga benshitsü asoshi angang.

⁴ “Angang, Oh Israel, KIBUBA asen Tsüngremji KIBUBA ka dang lir.

⁵ Anungji nai KIBUBA ne Tsüngremji ne mulung ajak agi, ne tanela ajak agi, aser ne tashi ajak agi meimang.

⁶ Tanü ni nenok dang melaba ya nenok mulung nung ayutsüla.

⁷Itemji nai ne chirnurtem dang nendaka sayutsüla, na kidang mena alidang aser na lenmang nung jajadang aser na mejangdang aser na shishidang item indang jembiang.

⁸Nai itemji temaitsü asütsü asoshi ne teka nung alenlokang, aser itemji ne tenütsü nung temaitsü asoshi alitsü.

⁹Itemji ner ki kikümdang aser süngkhüm nung zülutsüla.

¹⁰ “Kodang KIBUBA ne Tsüngremi nenok tsürabur Abraham, Isak aser Yakob dang nenok nem agütsütsü azüangshiba lima yimti tulu aser tajungtem koba nenoki meyanglu, ajagi nenok anir arudir,

¹¹nenoki mebendenba osettem agi ki sünga, nenoki matuba tzübutem, nenoki matemba tsükmenatzü aser oliv nungi nenoki jangratema chidir,

¹²idangji Ijip alar tia nungi anitetba KIBUBA mamatsü kümdangang.

¹³ Nai KIBUBA ne Tsüngrem tsübuang aser nai pa dang tenzüktsüla aser pa tenüng agi azüngashitsüla.

¹⁴Na meketa aliba bendanger tsüngremtem sülen nai manitaktsüla,

¹⁵kechiaser nenok rongnung aliba KIBUBA ne Tsüngremji tenükmiba Tsüngrem lir; ashiko nenok anema pai ain adoktsü aser pai nenok alijak nungi samatsütsü.

¹⁶ “Massa nung nenoki KIBUBA atitangba ama nai KIBUBA matitangtsüla.

¹⁷KIBUBA ne Tsüngremi melaba aser pa ozüngtem nenok dang melabatem ajak nendaka benshitsüla.

¹⁸KIBUBA tsüngdang kechi shitak aji nenoki inyaktsüla, anungji KIBUBAi nenok tsüraburtem dang nenok nem agütsütsü azüngashiba limaji nenoki agitsü aser nenok alitsü asoshi,

¹⁹KIBUBAi jembiba ama pai nenok tsükchirtem ajak nenok jakdang nungi aridok.

²⁰“Tarutsü mapang nung kodang ne jabasoi ‘KIBUBA asen Tsüngremi nenok dang melaba yimsü ozüng aser o bendangba tetezü kechi?’ ta asüngdangdir,

²¹parnok dang shiang, asenok Ijip lima nung Farao lar küma liasü, saka KIBUBA tashi tait teka agi asenok Ijip nungi anitet.

²²Onok nükdang Ijip madak Farao aser pa kidang alir ajak madak temaitsü tulu sayatenya aser tesüngmangtsü mapa sayu.

²³Saka asen tsürabur dang pai azüngashiba limaji asen nem agütsütsü aser ajagi anir arutsü asoshi, pai idak nungjagi asenok anitet.

²⁴KIBUBAi pa ozüngtem ajak tsübutsü aser itemji benshitsü asenok dang mela, anungji tanü amai asenok taküm teti junga alitsü.

²⁵Aji asünung KIBUBA asen Tsüngrem madang pai melaba ozüng ajakji asenoki kümdanga benshira, ibaji asen asoshi temeshibaji alitsü.