Read njo TAZÜNGKUNEM 7 Bible Online

TAZÜNGKUNEM 7 - njo bible

TAZÜNGKUNEM 7

¹ “Kodang KIBUBA ne Tsüngremi nenok agitsü aliba limai nenok anir arudir, aser nenok madang kin aika; Het nunger Girgas nunger, Amor nunger, Kanan nunger, Periz nunger, Hiv nunger aser Yebus nunger ne dang nungi tuluba aser tashi taitba kin tenet nenok madang aridokdir,

²aser kodang KIBUBA ne Tsüngremi parnok nenok ket nung agütsüdir, idangji nenoki parnok meshi meshia samatsütsüla. Parnok den tezüngzüktepba kecha teyanglu mesüra parnok dang taochi mesayutsüla.

³Parnok den kipa-kiyi tesü. Ne jalatem parnok jabasotem nem tagütsü, mesüra par jalatem ner jabasotem nem tagidaktsü.

⁴Kechiaser parnoki ne jabasotem ni nungi meyipa oa tanga tsüngremtem tenzükdaktsütsü, idangji KIBUBAi na anema ain adoktsü aser pai na yakta samatsütsü.

⁵ Nenoki parnok dak yamai inyakang. Nenoki parnok tenladak raksajang, parnok temeshi tongshitem akusajang, par Asherin lepzüka yokang aser parnok süngyanglutem mi agi rongdokjang.

⁶ Kechiaser nenok KIBUBA ne Tsüngrem asoshi nenok temeshi nübur lir. KIBUBA ne Tsüngremi alima nung kin ajak rongnungi pei agitsü, pei nübur asütsü asoshi nenok shimtet.

⁷“Tangar dang nungi nenok yongsük timba asüba yong KIBUBAi nenok dak saklok aser shimtet masü, kechiaser kin ajak dang nungi nenok ishiba lir.

⁸Saka KIBUBAi nenok meimyong, aser nenok tsüraburtem dang azüngashiba yong pai tashi tait teka agi nenok anitet aser Ijip chuba Farao ket nung alar ki nungi nenok alangzük.

⁹Anungji KIBUBA ne Tsüngremji Tsüngrem ta metetang; paji tamang katetba Tsüngrem lir. Shirnoki pa meimer aser pa ozüngtem benshir, parnok den putusa meyirijang pai tezüngzüktepba ayu.

¹⁰Saka pa sempar dang jaktaka parnok samatsütsü meyipa kepzüker, pa sempar dang pai anü anüa mali, saka jaktaka pa dang kepzüker.

¹¹Anungji tanü ni nenok nem agütsüba temelaba ozüng aser o bendangbatem nai kümdanga benshitsüla.

¹²“Nenoki item ozüng angara, aser kümdanga benshira KIBUBA ne Tsüngremi nenok tsüraburtem dang azüngashiba tezüngzüktepba ama nenok den yimlibilem ayutsü.

¹³Pai na meimtsü aser moatsütsü, aser soyapokyatsütsü. Pai ne nu menden tejang moatsütsü, ne alu metsüjang, ne tsük, yi tasen aser totzü, ne kiset shirurutem aser san, item ajak pai ne tsüraburtem dang nenok nem agütsütsü ta azüngashiba lima nung moatsütsü.

¹⁴Kin ajak dang tali pai na moatsütsü, nenok tebur süshia tetsür süshia tapung kata malitsü, mesüra shiruru kata techanu makaba malitsü.

¹⁵KIBUBAi na tashitak ajak nungi kümzüktsü. Nai metetba Ijip tashitak tamajung kecha agia na mekangshidaktsütsü, saka shirnoki na sempar, parnokji pai kangshidaktsütsü.

¹⁶KIBUBA ne Tsüngremi ne nem agütsüba nisung ajakji nai tepsettsüla. Parnok aochia tebilem, aser parnok tsüngremtem tetenzük, kechiaser itemji na asoshi sang ka ama asütsü.

¹⁷“Item kintem kü dang nungi tuluba, ni koda parnok atsüngtoktsü? ta ne mulungjangi ne dang shira,

¹⁸nai parnok metsübutsüla, Ijip ajak nung KIBUBA ne Tsüngremi Farao dak inyakba bilemtetang.

¹⁹Timtem tekangshi tulu, temaitsütem, tesüngmangtsü sayatenyatem aser KIBUBA ne Tsüngremi tashi tait teka aser pa tepen songtokba agi nenok anitetba nenok tenük agi nguogo. Anungji KIBUBA ne Tsüngremi nai shir tsübur parnok dang yamaji inyaktsü.

²⁰Ano KIBUBA ne Tsüngremi parnok anema nati yoka shirnok anünga ali aser nenok dang atsüka ali, parnok samatsütsü.

²¹Nai parnok madang taoksa; kechiyong KIBUBA ne Tsüngremji tetsübutsü Tsüngrem tulu nenok rongnung lir.

²²KIBUBA ne Tsüngremi item kinji tanem tanemi ne tsüngdang nungi aridoktsü. Nai parnok khenyongi dangbo mesamatsütsüla, mesüra na asoshi moapu nung arem shirurutemji tali renloka akümtsü.

²³Saka KIBUBA ne Tsüngremi ne ket nung agütsütsü aser parnok okshia samatsütsü.

²⁴Parnok chubatem pai nenok ket nung bendanga agütsütsü, aser par tenüng anüng kübok nungi nai samatsütsü, nai parnok mesamatsü tashi parnok katia na anema menoktaktsü.

²⁵Par süngyanglu tsüngremtem nai mi agi rongtoktsüla parnok dak aliba taribi mesüra hon aji na asoshi mabentsüla; aji oda mesüra iba sang nung na puadoktsü, kechiaser aji KIBUBA ne Tsüngrem tsüngdang tesempatsü lir.

²⁶Ne kidangi tesempatsü kecha bener marutsüla, yamalaji khenyongi samatsütsüla. Itemji nai khenyongi jentoktsüla kechiaser aji atakatemba oset lir.