Read njo TAZÜNGKUNEM 8 Bible Online

TAZÜNGKUNEM 8 - njo bible

TAZÜNGKUNEM 8

¹“Tanü ni nenok nem agütsüba ozüng ajak kanga kümdanga benshitsüla, yamaji süra KIBUBAi nenok tsüraburtem dang azüngashiba lima jagi nenok aitsü aser taküm alitsü aser jenti arentsü.

²Aser pai na ajemaludaktsütsü aser na tendangtsü, oda pa ozüngtem benshidisü mebenshilir aser ne mulung nung kechi bilemer itemji metettsü asoshi KIBUBA ne Tsüngremi item metettsü asoshi KIBUBA ne Tsüngremi item küm lir lisem lima nung na koda anishi ajak nai bilemtettsüla.

³Aser nisungi am tesa agi dangbo taküm malir, saka KIBUBA tebang nungi kechisa adokdir aji agi nisung taküm alir ta pai ne nem metetdaktsütsü asoshi, pai na ajemaludaktsü, aser na yaseta kümdaktsü aser mana agi pai na mesü, koba naia mesüra ne tsüraburtemia memeteti liasü.

⁴Item küm lir ne süoshi tejen maküm mesüra ne tetsünga mawak.

⁵Anungji nisung kati pei jabaso azüokba ama KIBUBA ne Tsüngremi na azüoker ta ne mulung nung bilemang.

⁶ “Anungji nai KIBUBA ne Tsüngrem ozüngtem benshiang, pa lenmang nung jajatsü aser pa tsübuang.

⁷Kechiaser KIBUBA ne Tsüngremi na ayongnu aliba alinük, tzübu aser tzüpokdak, tenem aser lententem nungi yima alidak lima kati na anir arudar.

⁸Wheat aser barley alidak, tsükmenatzü aser mungudong, aser jaremdong, oliv totzü aser ninang mojitzü alidak lima;

⁹na kecha agia anüngakong mesüi ne chiyungtsü peria angudak lima, lung nung merang aliba aser tenemtem nungi nai yongmenyin tutettsüba linük lir.

¹⁰Kodang nai tepok sünga chidir, KIBUBA ne Tsüngremi ne nem linük tajung agütsüba asoshi nai pa tenüng asangtsüla.

¹¹“Tanü ni ne nem agütsüba pai melaba, o bendangba aser pa ozüngtem mebenshiba agi KIBUBA ne Tsüngrem mamatsü kümdangang.

¹²Mesüra kodang na tepok sünga chir jangratemdir aser idakji talidak yanglutetdir,

¹³aser ne nashi telok aser san telok renlokdir aser taribi o hon renlokdir oda ne takaba ajak renloka kümdir;

¹⁴idangji ne mulung nung mezümeküma Ijip lima alar ki nungi nenok anitetba KIBUBA ne Tsüngrem mamatsü asoshi,

¹⁵Pai na per tesashi aser jepja alidak tetsübutsü lisem lima tulu ali takong aser tzü madak ajanga anir aru. Pai ne nem lungkerak nungi tzü adokdaktsü.

¹⁶Lisem lima nung nenok tsüraburtemi memetetba mana agi pai na mesü, oda pai na ajemaludaktsütsü aser tatem nung na asoshi tajung inyaktsü asoshi pai na tendang.

¹⁷Aji oda mesüra kü ain aser tashi tait teka agi ni item rongsen inyak ta nai pei mulung nung mashitsüla.

¹⁸Saka nai KIBUBA ne Tsüngrem bilemtettsüla kechiaser ne nem rongsen angutsü ain agütsübaji pa lir, tanü tashi aliba amai ne tsüraburtem dang pai azüngashiba atalokdaktsütsü asoshi aji oda liasü.

¹⁹Nai KIBUBA ne Tsüngrem amar tangar tsüngremtem sülen jajara aser parnok tenzüka aser külemra, atangji nenok samatsü ta tanü ni nenok anema kuli agütsür.

²⁰Nenok madang KIBUBAi kintem samadaktsüba ama samatsütsü, kechiaser KIBUBA nenok Tsüngremi sayuba o nenoki manga.