Read njo TAZÜNGKUNEM 9 Bible Online

TAZÜNGKUNEM 9 - njo bible

TAZÜNGKUNEM 9

¹“Angang Oh Israel! Tanü na Yordan ajanger aliba linük kong ne dang nungi tashi taitba kintem aser parnok yimti jaratem anüng tonga atsübanger lir ajagi aitsüba lir.

²Nüburtemji tulu aser tar talang Anak chirtem shir indang nenoki angashia ashi, Anak chirtem anema shibai noktaktettsü?

³KIBUBA ne Tsüngrem ne tejaklen tesamatsüba mi ama aor ta nai metetang, pai parnok samatsütsü, aser ne madang pai parnok ludaktsütsü, anungji KIBUBAi ne dang nangzükba ama, nai parnok aridoktsü aser parnok mela mela samatsütsü.

⁴“Kodang KIBUBA ne Tsüngremi ne madang parnok aridokdir nai ne mulung nung yamai teshi, ‘Ni temeshi asüba yong KIBUBAi iba lima amangtsü anir aru.’ Saka item kintem majungba yong KIBUBAi nenok madang nungi parnok aridoktsü.

⁵Ya na temeshi asüba agi mesüra ne mulung tindang asüba yong ya item kintem majungba yong KIBUBA ne Tsüngremi parnok ne madang nungi aridoker masü, saka oda pai nenok tsüraburtem: Abraham, Isak aser Yakob dang azüngashiba ataloktsü asoshi liasü.

⁶Anungji ya metetang, nenok temeshiba yong KIBUBA ne Tsüngremi iba linük tajung agitsü ne nem agütsü masü, kechiaser nenok tekong temerang nisungtem lir.

⁷“Lisem lima nung nai KIBUBA ne Tsüngrem koda ain adokdaktsü aji bilemtetang aser tamadok; Ijip lima toktsür aoba anogo nungi iba talidak ya matong tashi nenoki KIBUBA anema apusoa aru.

⁸Horeb nunga nenoki KIBUBA rasadaktsü, anungji pai nenok samatsütsüba ain adok.

⁹ Kodang ni lungpak nung zülubaji agizüktsü tenemi atu, aji nenok den KIBUBAi züngzüktepba lungpak liasü, ni anogo lir aser aonung lir tenem nungji liasü; ni chiyungtsüa machi, tzüa majem.

¹⁰Idangji KIBUBAi lungpak ana nung Tsüngrem temeyong agi zülur kü nem agütsü; aser telok atenshiba anogo nung mi nungi KIBUBAi tenem nung nenok dang jembiba o ajak iba manungji zülua lungpak anaji KIBUBAi kü nem agütsü.

¹¹Aser anogo lir aser aonung lir tatem nung, oda tezüngzüktepba züluba lungpak anaji KIBUBAi kü nem agütsü.

¹²“Idangji KIBUBAi kü dang ashi, ‘Aramesoang, yang nungi kara-a luang, kechiaser nai Ijip nungi anir aruba nüburtemi tai inyakogo. Ni parnok dang melaba lenmang nungi parnoki yakta meyipa ogo; parnoki parnok asoshi süngyanglu ka mulutetogo.’

¹³“Ano KIBUBAi kü dang ashi, ‘Iba nübur ya tekong temerang ta ni nguogo.

¹⁴Kü kija tokjang, anungji ni parnok samatsütsü aser anüng kübok nungi parnok tenüng jentoktsü. Aser ni na agi parnok dang nungi tashi taitba aser kin tuluba kümdaktsüdi.’

¹⁵“Anungji ni tenem nungi meyipa alu aser tenemji mi agi arong. Aser tezüngzüktepba lungpak anaji kü teka nung liasü.

¹⁶Aser nenoki KIBUBA nenok Tsüngrem anema temenen mena ta ni atangji angu. Nenoki nenok asoshi nashi pungchi chanu ka mesüka süngyanglu muluteter liasü; aser KIBUBAi nenok dang melaba lenmang nungi nenoki kara-a meyipa or liasü.

¹⁷Aser lungpakji ni am aser aji nenok nükdang ondakja aji raksa.

¹⁸Idangji mezüng amato ni KIBUBA madang anogo lir aser aonung lir apudaka, ni chiyungtsüa machi mesüra tzüa majem, oda KIBUBA madang kechi temenen aji nenoki inyaka pa jashidakja pa ain adokdaktsüba yong liasü.

¹⁹ Kechiaser KIBUBAi nenok dang mepelaba agi nenok samatsütsü pa ain adokbaji ni tsübua liasü, saka iba mapang nungjia KIBUBAi kü dang anga.

²⁰Aser KIBUBAi Aron samatsütsü pa kanga ain adoka liasü, anungji iba mapang nungjisa ni Aron asoshi sarasadem.

²¹Ano tesempatsü nashi pungchi chanu koba nenoki yanglu aji ni agi, aser aji mi nung ronger ajensa, aser auyi ama maküm tashi menüngsar; tenem nungi yima aluba ayong nung ni auyiji enoktsü.

²² “Ano nenoki Tabera nung, Massa nung, aser Kibrat-hatava nung KIBUBA rasadaktsü.

²³ Aser kodang KIBUBAi nenok kadesh-Barnea nungi yoka, tuang ni nenok nem agütsüba limaji agiang ta ashi, idangji KIBUBA nenok Tsüngremi melaba anema nenoki apuso; nenoki pa dang mamang mesüra pa ola manga.

²⁴Ni nenok metetba anogo nungi nenoki KIBUBA anema apusoa arur.

²⁵“Anungji KIBUBA madang ni anogo lir aser aonung lir apudaka liasü, kechiaser KIBUBAi nenok samatsütsü ta ashi.

²⁶Aser ni KIBUBA dang sarasadem aser ashi, ‘Oh KIBUBA Tsüngrem, ne nübur, ne senmang shir na uluba agi alangzük, shir ne tashi tait teka agi Ijip nungi anitet, parnok tesamatsüma.

²⁷Ne tenzükertem: Abraham, Isak aser Yakob bilemtetangma; iba nüburtem temulung temerang, mesüra parnok tamashi mesüra parnok temenen dak tereprangma.

²⁸Aji oda mesüra nai onok anir aruba linüki ashitsü, kechiaser KIBUBAi parnok dang nangzükba limai parnok anir arutsü makok nung, aser pai parnok sempa nung parnok lisem lima nung tepsettsü pai anir aru.

²⁹Saka parnok ne nüburtem, oda ne senmanger, shir nai ne tashi ain tulu agi aser ne teka songtokba agi anir aru.’