Read njo YOHAN 10 Bible Online

YOHAN 10 - njo bible

YOHAN 10

¹Yisui ashi; “Atangji züngpong ni nenok dang shidi, shibai kikümbang ajanga maiti, saka tanga len kati san kidangi aiter, pa auür aser rakzükraktemer;

²Shibai kikümbangji ajanga aitdir paji san tanüker.

³Aser pa nem kishinükeri kishiji lapoktsür, aser santemi pa ola angateter; pai pei san tenüng agi ajar aser parnok anir aor.

⁴Pai pei meyong san ajak anitener külen, pai parnok jakdang aor aser santemi pa sülen anidaker; kechiaser parnoki pa ola metet.

⁵Jokorla tangar sülen parnoki manidaktsü, pa madang nungibo parnoki jenshitsü, kechiaser parnoki tangar ola memetet.”

⁶Iba o entepba Yisui parnok dang ashi, saka pai parnok dang kechi ashi, aji parnoki mangatet.

⁷Anungji Yisui tanaben parnok dang ashi, “Atangji züngpong ni nenok dang shidi, Ni kikümbangji lir.

⁸Kü dang tamasa arur ajak auürtem aser rakzükraktemertem; saka santemi parnok dang manga.

⁹Ni kikümbang, ni ajanga shiri aiter pa kümzüktsü aser aitli tuguli ta asütsü aser chiyungtsü angutsü.

¹⁰Auüri tauyatsü, tepsettsü aser raksatsütsü atema dang arur. Parnoki taküm angutsü aser aji talubosa akatsü asoshi ni aruogo.

¹¹Ni sannüker tajung, sannüker tajungi santem asoshi pei taküm yutsür.

¹²Shiba sannüker masü saka ayanger dang aser santemji pa meyong masü, pai tsünü aruya angur aser san toktsür ajener; aser tsünü jagi parnok apur aser jenshidaktsür.

¹³Pa ayanger ka dang aser santem asoshi mebilemer anungji pa jena aor.

¹⁴Ni sannüker tajung, aser kü Bui ni kechi koda metet, yamaji ni kü meyong san metet aser kü meyongi ni metet;

¹⁵ aser santem asoshi ni kü taküm yutsür

¹⁶Aser iba san ki nung matenba kü meyong ano tanga san lir; itemjia ni anir arutsüla, aser parnoki kü ola angatsü aser parnok Sannüker ka kübok san telok ka akümtsü.

¹⁷Iba asoshi kü Bui ni meimer kechiaser tanaben meyipa agitsü asoshi ni kü taküm yutsür.

¹⁸Aji ni nungi shingaia merakzüker, saka kü sasa ni aji yutsü. Aji yutsütsü kü tashi-ain lir. Iba temelaba ozüng ni kü Bu nungi agizük.”

¹⁹Item o atema Yihuda nunger rongnung telemsa adok.

²⁰Aser parnok aikati ashi, “Pa dak temenen tanela lir, aser pa yiar; kechiba nenoki pa o angar?”

²¹Tangari ashi. “Yabo temenen tanelai apuba o masü. Temenen tanelai nükpoker tenük lapoktsütetdi ma?”

²²Idangji Yirusalem nung Temeshitetba benjong ka liasü. Aji tsüngkhümwa liasü,

²³aser Yisu Solomon kilempok nung senzüya liasü.

²⁴Anungji Yihuda nungeri pa meketbanger pa dang ashi, “Kopiga nai onok ratamadaktsütsü? Na Khristaji süra onok dang jangja jangja shiang.”

²⁵Yisui parnok dang langzü, “Ni nenok dang shiogo, saka nenoki mamanger. Kü Bu tenüng nung ni kechi mapatem inyaker item yagi kü indang kuli agütsür.

²⁶Saka nenoki mamanger, kechiaser nenok kü san rongnung maten.

²⁷Kü santemi kü ola angar, aser ni parnok metet, aser parnoki kü sülen anitaker.

²⁸Aser ni parnok nem teti taküm agütsü, aser parnok kodanga mesamatsü, aser parnok kü ket nungi shingaia rakzüka motettsü.

²⁹Kü Bu shibai parnok kü nem agütsü, pa ajak dang tuluba, aser kü Bu ket nungi shingaia parnok rakzüka moutet.

³⁰Ni aser kü Bu ka dang.”

³¹Ajagi Yihuda nungeri pa dak aontsü tanaben lung am.

³²Idangji Yisui parnok dang langzü, “Kü Bu nungi mapa tajung aika ni nenok dang sayuogo. Item rongnung koba mapa asoshi nenoki kü dak aoner?”

³³ Yihuda nungeri pa dang langzü, “Mapa tajung asoshi onoki ne dak maoner, saka Tsüngrem atalaba yong, kechiaser na nisung dang sür nung ne sasa Tsüngrem akümba yong.”

³⁴ Yisui parnok dang langzü, “Ni ashi, nenok tsüngremtem lir, ta nenok ozüng nung zülua melika ma?

³⁵Shir dangi Tsüngrem o aru, parnok dang tsüngremtem ta pai aja süra (aser Lai o raksatsü makok),

³⁶ajangla ni Tsüngrem Chir ta ni ashi nung, Tebui shiba meshitettsü aser alimai yok; pa dang nai Tsüngrem atalar ta nenoki ashir ama?

³⁷Ni kü Bu mapatem meinyakra idangjibo nenoki ni tamang.

³⁸Saka ni itemji inyakra nenoki ni mamangaka, mapatemji amangang, anungji Tebu kü dak lir, aser ni Tebu dak lir ta nenoki metettsü aser angatettsü.”

³⁹Parnoki tanaben pa aputsü bushi; anungji pai parnok ket nungi aenshia ao.

⁴⁰ Aser Yisui tanaben Yordan külen Yohani mezüng baptija alidaki ao; aser yangji pai ali.

⁴¹Aser aika pa dangi aru aser ashi, “Yohani atangji temaitsü kecha meinyak, saka Yohani iba Nisung indang kechisa jembi ajak shitak liasü.”

⁴²Aser yangji aikati pa dak amang.