Read njo YOHAN 11 Bible Online

YOHAN 11 - njo bible

YOHAN 11

¹ Bethani nung aliba nisung ka tenüng agi Lazar shiranga liasü. Mari aser la teyi Martha iba yimer liasü

² Iba Mari shibai Kibuba dak teronem menemba totzü mezütsür, pei kulang agi pa tetsüng aidoktsü; la tenu Lazar shiranga liasü

³Anungji teyi o tenu nati pa dangi yoka ashi, “Kibuba, ajiang, nai shiba meimer pa shiranga lir.”

⁴Saka kodang Yisui aji angashi, pai ashi, “Iba shirangbaji tasütsüsa masü, saka Tsüngrem chir aji agi sentsü wangshidaktsütsüsa ibaji Tsüngrem sentsüwangshi asoshi lir.”

⁵Yisui Martha, aser Mari aser tenu meim.

⁶Anungji kodang pa shiranger ta angashi, idangji pa kong liasü idakji pai ananü munglok.

⁷Aji sür külen pai pei nütsüngtem dang ashi, “Asenoki ano Yihuda limai odi.”

⁸Nütsüngtemi pa dang ashi, “Tesayur, tawato-ang Yihuda nungeri ne dak lung agi aontsü bushia liasü; aser nabo ajagi tanaben onür no?”

⁹Yisui langzü, “Anogo ka nung ghonda terana masü ama? Anüngdang jajara nisungi tetsüng memetsür, kechiaser pai iba alima tesangwa angur.

¹⁰Saka nisungi aonung jajara tetsüng metsür, kechiaser tesangwaji pa dak mali.”

¹¹O ya jembir külen pai parnok dang ashi, “Asen tembar Lazar amua ogo, saka pa amua aoba nungi sakdaktsütsü ni aor.”

¹²Anungji nütsüngtemi pa dang ashi, “Kibuba, pa amua oa lira, pa ajungtsü.”

¹³Tang Yisui pa asüba indang jembi; saka amua oa anisüngzükba indang jembira ta parnoki bilem.

¹⁴Idangji Yisui parnok dang jangjajangja ashi, “Lazar süogo.”

¹⁵Nenoki amangtsüsa ni yangji maliba asoshi nenok atema ni pelar; aji saka asenok pa dangi odi.

¹⁶Anungji Toma shiba dang chakrep chir ta ajar, pai pei medemer nütsüngtem dang ashi, “Pa den asütsüsa asenoka odi!”

¹⁷Anungji kodang Yisu aru, Lazar joko leper nung pezünü liogo ta pai angu.

¹⁸Bethaniji Yirusalem anasa mile ana shi dang pilar liasü.

¹⁹Tenu atema tena mulung süngzükdaktsütsü asoshi Martha o Mari na dangi Yihuda nunger aika arua liasü.

²⁰Anungji Marthai kodang Yisu arudagi ta angashi, lai pa lenji ao saka Maribo kidang mena liasü.

²¹Anungji Marthai Yisu dang ashi, “Kibuba, na idaki ali asübo künu mesüla.

²²Ano ni metet, tanga nai Tsüngrem dang kechisa asüngdangdir, pai ne nem agütsütsü.”

²³Yisui la dang ashi, “Nenu shia arutsü.”

²⁴Marthai pa dang ashi, “Tatem anogo nung tanaben shia aruba mapang nung pa shia arutsü ta ni metet.”

²⁵Yisui la dang ashi, “Shia aruba aser taküm ni lir. Shibai kü dak amangdir, pa süaka taküm alitsü;

²⁶aser shibaisa taküm lidir aser kü dak amangdir, kodanga masütsü. Nai ya amanger asü?”

²⁷Lai pa dang langzü, “Hau, Kibuba, alimai tarutsü aliba Tsüngrem Chir Khristaji na lir ta ni amanger.”

²⁸Lai ya shir külen lai ao aser tenu Mari miima aja aser la dang ashi, “Tesayur yangi lir, aser pai na ajar.”

²⁹Lai ya angashidang yakta aramesoa pa dangi ao.

³⁰Tang ano Yisu yimtaki maru, saka Marthai pa kechi nung ajuru yangjisa liasü

³¹Indangji Yihuda nunger shir la süngzükdakja la den kidang liasü, parnoki Mari yakta aramesoa tuguba ngua, la leper nung ajebtsü aor ta bilem aser la sülen anitak.

³²Anungji Yisu kong liasü, Mari aji tonger pa ngua pa tsüngdang apudaka ashi, “Kibuba, na idaki ali asübo künu mesüla.”

³³Anungji kodang Yisui la aser la den aruba Yihuda nunger jebya angu, pa temulung raksa, aser menungra-a ashi, “Nenoki pa kechi nung ayu?”

³⁴Parnoki pa dang ashi, “Kibuba, arua ajiang.”

³⁵Yisui ajeb.

³⁶Anungji Yihuda nungeri ashi, “Pai pa koda meim ajiang!”

³⁷Saka parnok kari ashi, “Iba nisung shibai nükpokba tenük lapoktsü, pai iba nisung mesüdaktsüla süng na?”

³⁸Anungji Yisu tanaben temulung shiseta leper jagi aru. Iba lepji leprungki ka, aser kikümbang nung lungpak ka liasü.

³⁹Yisui ashi, “Nenoki lungpakji ajungtokang.” Shiba tasü liasü pa teyi Marthai Yisu dang ashi, “Kibuba, pa joko teshinem menemer; kechiaser pa sür pezünü buba.”

⁴⁰Yisui la dang ashi, “Nai amangra Tsüngrem sentsüwangshi angutsü ta ni ne dang meshika ma?”

⁴¹Anungji parnoki lungji ajungtok. Aser Yisui temalen repranga ashi, “Oba, nai kü dang angashi nung ni ne nüng asanger.

⁴²Aser nai teti kü dang angar ta ni metet. Joko meketa noktaka aliba telok atema, nai ni yok ta parnoki amangtsü asoshi, ni o ya ashir.”

⁴³Aser pai yamaji jembir külen ola tulu agi ayimten, “Lazar, adokang.”

⁴⁴Tasüba nisungji, teka aser tetsüng mang alungba sü agi naibanger aser pa tejak asentzü aiba sü agi meibanger adok. Yisui parnok dang ashi, “Pa sala-ang aser chiokang.”

⁴⁵Anungji Yihuda nunger aika shirnok Mari dangi aru aser pai inyakba angu, parnoki pa dak amang.

⁴⁶Saka parnok kar Farisitem dangi ao aser Yisui kechi inyak aji parnok dang ashi.

⁴⁷Anungji putiungertem aser Farisittemi mungdang sentepa ashi, “Asenoki kechi inyaktsü? Kechiaser iba nisungi temaitsü aika inyaker.

⁴⁸Asenoki pa odangsa toktsüra, nisung ajaki pa dak amangtsü, aser Rom nungertem arur asen temeshi tenla ki aser asen kin ajonga raksatsütsü.”

⁴⁹Saka parnok rongnung ka tenüng agi Kaifa, shiba iba kümji temaba putir ata-a liasü, pai parnok dang ashi, “Nenoki kecha memetet.

⁵⁰Asen kin ajonga samadangbo nüburtem asoshi nisung ka asübaji-ang nenok asoshi tajungba ta nenoki mangateter.”

⁵¹Tang pai ya pei temulung agi dang ashir masü, saka pakümji pa tematiba putir asü nung kin asoshi Yisuji asütsüla ta pai shina jembi.

⁵²Aser kin asoshi dang masü, saka ano senshia aliba Tsüngrem chirtem ka küma külemi pai anitentsü asoshi pai ya shin.

⁵³Anungji iba anogo nungjagi parnoki pa tepsettsü tasa asa.

⁵⁴Anungji Yisui joko Yihuda nunger rongnung otia mejaja, joko yang nungjagi arem anasa aliba linük, Efraim ta ajaba yim leni aenshia ao; aser yangji pai nütsüngtem den ali.

⁵⁵Tang Yihuda nunger Kümtettsü Benjong anasa liasü aser Benjongji matong dang temeket kishikina nungi nisung aika pei sasa meshitettsü asoshi Yirusalemi aru.

⁵⁶Anungji parnoki Yisu bushi, aser tenla kidang noktaker parnok o parnok na jembitepa ashi, “Nenoki kechi bilemer? Pa Benjongi marutsü asü?”

⁵⁷Pa aputsü asoshi pa kong aliar kari metetra, aji sayutsüla ta putiungertem aser Farisitemi ozüng agüja liasü.