Read njo YOHAN 12 Bible Online

YOHAN 12 - njo bible

YOHAN 12

¹Anungji ano Kümtettsü Benjong atongtsü troknü lia, Lazar shiba Yisui tasü nungi shia arudaktsü, pa aliba Bethani yimtaki Yisu aru.

²Anungji idakji parnoki pa asoshi aonung chiyungtsü benjong ka yanglu; aser Marthai anganüa agütsü aser Lazar pa den chiyungdak amenba rongnung ka liasü.

³ Mari-i sen jenti alangba teronem menemba totzü seret tesadang bener arua Yisu tetsüng nung mezütsü, aser pei kulang agi pa tetsüng aidoktsü; aser totzü teronem jagi ki asüng

⁴Saka Yihuda Iskariot, pa nütsüng rongnung ka, shibai pa bendanga agütsütsü, pai ashi,

⁵“Totzü ya senpak noklang asem yong yoker kechiba sensaker nem magütsü?”

⁶Pai sensaker indang bilema ya ashi masü, saka pa auür aser pa madang sen juli alinung, yangji kechi ayu aji pai bener oli ta asü.

⁷Anungji Yisui ashi, “La oda yujang, ni leper nung aremtsü anogo asoshi la nem aji yudakjang.

⁸ Kechiaser sensakerbo nenok den teti lir, saka nibo nenok den teti malitsü.”

⁹Anungji Yihuda nunger teloki pa yangji lir ta angazük; aser parnoki Yisu asoshi dang masü, saka Lazar shiba pai tasü nungi shia arudaktsü pa reprangtsü asoshia aru.

¹⁰Anungji puti-ungertemi Lazara tepsettsü bangjem,

¹¹kechiaser pa meji nung Yihuda nunger aika oadok aser Yisu dak amang.

¹²Asüngji Benjongi aruba telok tulu jagi Yisu Yirusalemi arudagi ta angashi.

¹³ Anungji parnoki asang kongsang bener pa den ajuruteptsü ao. Parnoki ayimtena ashi, “Hosanna, shiba Kibuba tenüng nung arur pa tepelatsü! Oda Israel Chubaji sangang!”

¹⁴Yisui gado chanu ka ngua iba manung amen, oda zülua aliba ama;

¹⁵ Zion jala, tetsübuma, ajiang; gado chanu ka dak sanger ne Chuba arudagi.

¹⁶O ya pa nütsüngtemi tamasabo mangatet; saka kodang Yisu sentsüwangshi, idangji o ya pa atema zülu aser pa dak yamaji inyakogo ta parnoki bilemtet.

¹⁷Anungji kodang pai Lazar leper nungi jateta tasü nungi shia arudaktsü dang telokti shirnok pa den liasü, parnoki kuli agütsü.

¹⁸Iba yongji telokti-i oa pa den ajurutep, kechiaser iba temaitsü pai inyakogo ta parnoki angashi.

¹⁹Ajagi Farisitemi parnok o parnok na jembitepa ashi, “Ajiang, nenoki kecha mekümteter, ajiang, alima pa sülen ogo.”

²⁰Tekülemtsü asoshi benjongi shir atu, parnok rongnung Grik nunger kar liasü.

²¹Anungji parnoki Galil nung aliba Bethsaida nunger Filip dangi arua asüngdang, “Tamarener, onoki Yisuji ngunür.”

²²Andria o Filip na arur Yisu dang ashi.

²³Aser Yisui parnok dang langzü, “Nisung Chir sentsüwangshitsü mapang tonga aitogo.

²⁴Atangji züngpong ni nenok dang shidi, tsükjang ka ali nung tsüker mesüra pa pei kija alir, saka pa süra, pai tejang jenti atanger.

²⁵ Shirnoki pei taküm meimer, pai aji samatsü, saka shirnoki iba lima nung pei taküm sempadir, parnoki tatem makaba taküm angutsü.

²⁶Kari ni tenzükra, pai kü sülen anitakdakjang, aser ni kechi nung lidir, yangji kü tenzükera alitsü: Kari ni tenzükra Tebui pa tushitsü.

²⁷“Tang kü mulung shisa amsar; aser ni kechi ashitsü? Oba iba mapang nungi ni kümzükang ta asü? Saka ya asoshi ni iba mapang yagi aru.

²⁸Oba, ne nüng sentsü wangshidakjang.” Anungji kotak nungi ola ka adoka ashi, “Ni aji sentsü wangshidaktsüogo aser aji tanaben sentsü wangshidaktsütsü.”

²⁹Anungji anasa noktaka aliba telokti-i aji angashidang tsüngmok atenogo ta ashi; ano tangari ashi, “Kotak tenyar kati pa den jembiogo.”

³⁰Yisui langzü, “Iba ola ni asoshi masü, saka nenok asoshi aruogo.

³¹Iba alima o bendangtsü tang lir; tang iba alima chuba tezülen endoktsü.

³²Aser kodang ni ali nungi ajungketdir, ni nisung ajak kü dangi atsütentsü.”

³³Saka kechi tasüba agi pa asütsü, aji metetdaktsütsü asoshi pai o ya ashi.

³⁴ Anungji telok jagi pa dang langzü, “Khristabo teti alir ta onoki Ozüng nungi angazükogo; ajangla koda sür Nisung Chir ajungkettsüla ta naibo ashir? Iba Nisung Chirji shiba?”

³⁵Anungji Yisui parnok dang ashi, “Joko mapang tatsüka dang tesangwaji nenok rongnung lir. Tammangi nenok memeneptsü asoshi, nenok den tesangwa alidang jajang; shibai ammang nung jajar pa koleni aor memeteter.

³⁶Tesangwa nenok den alidang, nenok tesangwa chirtem akümtsüsa tesangwa dak amangang.” Yisui ya shir külen, parnok nungi oadok, aser parnok nungi pai atsüka ali.

³⁷Saka pai parnok madang temaitsü paikaji inyakaka, parnoki pa dak mamang.

³⁸ Anungji Isaia ainkari jembiba o ya atalok: “Kibuba, shibai onok osang amang? Aser shir madang Kibuba teka jungkai adok?”

³⁹Anungji parnoki mamangtet, kechiaser Isaiai tanaben ashi,

⁴⁰ “Pai parnok tenük nükpok kümdaktsüogo, aser pai parnok mulungjang meranga kümdaktsü; aji mesüra parnoki pei tenük agi ngula, pei mulungjang agi tezütetla, aser meyipla; aser ni parnok anebtsüla.”

⁴¹Isaiai item o ashi, kechiaser pai pa sentsüwangshi angu, aser pai pa indang jembi.

⁴²Aji saka yimsüsürtem rongnung aikati pa dak amang; saka parnok sinagog nungi jentoka lir ta tsübuba agi, Farisitem atema parnoki aji odia menangzük.

⁴³Kechiaser parnoki Tsüngrem nüngsang dangbo nisung nüngsang ang tali meim.

⁴⁴Aser Yisui ayimtena ashi, “Shibai kü dak amanger, kü dak amanger masü, saka ni shibai tenya pa dak amanger;

⁴⁵aser shibai ni angur, pai shibai tenya pa angur.

⁴⁶Shibaisa kü dak amangdir pa ammang nung malitsüsa alimai tesangwa ka ama ni aruogo.

⁴⁷Kari kü osangtem angashir itemji mebenshira, ni pa o mebendanger kechiaser alima o bendangtsü asoshi masü, saka alima kümzüktsü asoshi ni aruogo.

⁴⁸Shibai ni magizüker, aser kü osangtema magizüker, pa o bendangtsü ka kar. Ni jembiba o agi tatem anogo nung pa o bendangtsü!

⁴⁹Kechiaser ni pei mulungba tashi agi mejembi; saka ni kechi ashitsü aser kechi jembitsü aji ni tenyaba Tebui kü nem agütsü.

⁵⁰Aser pa temelaba Ozüngji teti taküm ta ni metet; anungji ni kechi jembir, aji Tebui kü dang kechi koda ashir yamaji ni jembir.”