Read njo YOHAN 13 Bible Online

YOHAN 13 - njo bible

YOHAN 13

¹Tang Kümtettsü Benjong matongdang, iba lima nungi pila-a Tebu dangi aotsü mapang tongogo ta Yisui meteta; alima nung aliba pei nüburtem pai meima liasü, aser pai tatem tonga parnok meim.

²Aser aonung chiyungdang Simon chir Yihuda Iskarioti pa bendanga agütsütsü pa mulungjangi mojing aitadoker liasü.

³Tebui pa ket nung ajak bendanga agütsüogo aser pa Tsüngrem nungi aru aser Tsüngrem dangisa meyipa aor ta Yisui meteta;

⁴pai chiyungdak nungi noktaker pei sü ayu aser temang aidokba sü ka bena arua pa sasa nangri akang.

⁵Idangji pai susa nung tzü shiok aser nütsüngtem tetsüng shidoktsütsü aser temang aidokba sü kechi agi pai nangri kanga liasü, iba jagi pai parnok aidoktsütsü tenzük

⁶Pai Simon Peter dangi aru, Peteri pa dang ashi, “Kibuba, nai kü tsüng shidoktsür no?”

⁷Yisui pa dang langzü, “Ni kechi inyaker nai tangbo memetet; saka nai tansür angatettsü.”

⁸Peteri pa dang ashi, “Nai kodanga kü tsüng teshidoktsü.” Yisui pa dang langzü, “Ni na meshidoktsüra, na kü den kecha shilem maka.”

⁹Simon Peteri pa dang ashi, “Kibuba, kü tsüng dang masü, saka kü teka aser kü kolaka shidokjangma.”

¹⁰Yisui pa dang langzü, “Shiba tzü chigu-ogo, pai tetsüng alema shidoktsü tenüngdaktsü maka, pa ajak merüka lir; saka nenok ajakbo masü.”

¹¹Kechiaser shibai pa bendanga agütsütsü aji pai metet, anungji pai ashi, “Nenok ajakbo merük masü.”

¹² Anungji pai parnok tetsüng shidoktsür külen, pai pei sü abener tanaben mener parnok dang asüngdang, “Tang kechi nenok dang inyakogo, nenoki meteter ma?

¹³Nenoki kü dang Tesayur, aser Kibuba ta ajar aser nenoki aji tim ashir; kechiaser aji ni.

¹⁴Ajangla ni nenok Kibuba aser Tesayuri nenok tetsüng shidoktsüra, nenokia kati ka tetsüng shidoktsütsüla.

¹⁵Kechiaser ni nenok dang inyakba ama nenokia inyaktsü asoshi ni nenok nem tatishitsü ka agütsüogo

¹⁶ Atangji züngpong ni nenok dang shidi, pei kibur dang nungi tenyaba tuluba masü, aser pei tenyasang dang nungi tenyaba tuluba masü

¹⁷Nenoki itemi meteta benshira, nenok tepelatsü.

¹⁸Ni nenok ajak indang jembitsü masü; ni shir shimteter parnok ni metet; shibai kü chiyungtsü achir pai ni anema pei tetsüng mekang ta shia aliba Laishibaji ataloktsü tim

¹⁹Ya kodang atalokdir, ni pa-a ta nenoki amangtsü asoshi, ano matalokdang, tang nungi ni nenok dang ashi.

²⁰Atangji züngpong ni nenok dang shidi, ni tenyaba nisung shibai agizükdir aser shibai ni agizüker, pai ni tenyaba agizüker.”

²¹Yisui yamaji shir külen pa temulung ayanga kuli agüja ashi, “Atangji züngpong ni nenok dang shidi, nenok rongnung kati ni bendanga agütsütsü.”

²²Pai aji shiba indang jembir ta nütsüngtemi bangka-a parnok o parnok na reprangtep.

²³Pa nütsüngtem rongnung ka, shiba dang Yisui meim, pa Yisu teku nung mangaloker mena liasü.

²⁴Anungji Simon Peteri pa dang tuyu aser ashi, “Pai shiba indang jembir-ar pai dang shidakjang.”

²⁵Anungji nütsüng shiba Yisu teku nung mangaloka liasü, pai asüngdang, “Kibuba, paji shiba?”

²⁶Yisui langzü, “Amtsükji aontzü nung metener shiba nem ni aji agütsüdir ibaji pa.” Amtsükji aontzü nung meten aser aji agiteta Yihuda Iskariot nem agütsü.

²⁷Kodang pai amtsükji achi, satan pa daki ai. Yisui pa dang ashi, “Na kechi teinyaktsü ali, aji yakta inyakadokang.”

²⁸Kechiba Yisui pa dang yamaji jembi, idakji langbang züngdang mena alir shingaia memetet.

²⁹Kechiaser Yihuda ket nung sen juli yua alinung Benjong asoshi nüngdak kar aliang ta mesüra sensaker nem langka agüjang ta Yisui pa dang ashir-a ta nütsüngtem karibo bilem.

³⁰Anungji pai amtsükji agizüker külen pai idangyongji kimai tugu. Joko aji aonung liasü.

³¹Anungji pa kimai tugur külen,Yisui ashi, “Tang Nisung Chir sentsüwangshir, aser pa dak Tsüngrem sentsüwangshir.

³²Tsüngremji pa dak sentsüwangshidaktsür süra, Tsüngremia pei dak pa sentsüwangshidaktsütsü aser pai aji yakta dang inyaktsü.

³³Tila tanurtem, joko ni nenok den mapang tatsüka dang alitsü, nenoki ni bushitsü; aser ni Yihuda nunger dang ashiba ama yamaji ni nenok dang ashir, Ni kongi aor, nenok ajagi marutettsü.

³⁴ Ni nenok nem ozüng tasen ka agütsür; ni nenok meimba ama, yamaji nenoka kati ka den meimtepang

³⁵Nenoki kati ka den meimtepra, ajangla iba jagi nenok kü nütsüngtem ta nisung ajaki metettsü.”

³⁶Simon Peteri pa dang ashi, “Kibuba, na kongi aor?” Yisui langzü, “Ni kongi aor nai tangbo manidaktettsü; saka nai tesülenang anitaktettsü.”

³⁷Peteri pa dang ashi, “Kibuba, kechiba ni tangbo ne sülen manidaktettsü? Na asoshi ni kü taküm agütsütsü.”

³⁸Yisui langzü, “Nai ni asoshi ne taküm agütsütettsü ama? Atangji züngpong ni ne dang shidi, nai ni asemben menangzük tashi ani makongtsü.