Read njo YOHAN 15 Bible Online

YOHAN 15 - njo bible

YOHAN 15

¹“Ni chichiba tsükmenatzü-zü, aser aluyimsangji kü Bu.

²Kü dak tangloka aliba koba kongsangisa süngjang metanglir, pai aji leptoker aser koba kongsangisa süngjang tangdir; tali tangdaktsütsü asoshi pai aji jemteta merüktettsür.

³Ni nenok dang jembiba o agi joko nenokbo meshiteta lir.

⁴Kü dak liang aser nia nenok dak alitsü. Tezü dak tangloka melira kechi koda kongsangi süngjang metangtet, yamaji nenoka kü dak tangloka melira nenokia süngjang metangtet,

⁵Ni tezü aser nenok kongsangtem. Shiba kü dak lir aser ni shiba dak alir, pa jagi süngjang jenti atangtsü; kechiaser ni nungi pila-a nenoki kecha meinyaktet.

⁶Kari kü dak melira, pa kongsang ka ama endoker aser akonger; item kongsangtemji bendener aser mimong nung enoka aronger.

⁷Nenok kü dak lira aser kü otem nenok dak lira, nenoki kechisa aginür meshiang aser aji nenok asoshi inyaktsü.

⁸Nenoki süngjang jenti tangja aser kü nütsüngtem ama aliba agi kü Bu sentsüwangshidaktsür.

⁹Kü Bui kechi koda ni meim nia aji oda nenok meim. Nenok kü temeim nung liang.

¹⁰Ni kechi koda kü Bu ozüngtem benshir aser pa temeim nung alir, yamaji nenoki kü ozüngtem benshira, nenoka kü temeim nung alitsü.

¹¹“Kü tepela nenok dak alitsü aser nenok tepela peridaktsütsü asoshi ni nenok dang itemi jembiogo.

¹² Ni nenok kechi koda meim, aji oda nenoka kati ka den meimtepang. Ibai kü temelaba ozüng lir

¹³Nisung kati pei tembartem asoshi pei taküm agütsüba dang nungi tuluba temeimji shinga daka melika.

¹⁴Ni nenok dang kechi melar aji nenoki inyakra, nenok kü tembartem lir.

¹⁵Joko ni nenok dang kilirtem ta majar, kechiaser kilir kati pei kiburi kechi inyaker aji memeteter. Saka ni nenok dang tembartem ta jaogo, kechiaser ni kü Bu nungi angashiba ajak nenok nem metetdaktsüogo.

¹⁶Nenoki ni meshimtet, saka niang nenok shimtet aser nenoki oa süngjang atangtsü, aser aji arishia alitsü asoshi ni nenok shimtet. Anungji nenoki kü nüng nung Tebu dang kechisa meshidir aji pai nenok nem agütsütsü.

¹⁷Ibai ni nenok dang melar: Nenoki kati ka den meimtepang.

¹⁸“Alimai nenok sempara, iba jagi nenok mesempadang tamasa ni sempa ta nenoki bilemtetang.

¹⁹Nenok alima meyong asübo alimai pei meyong meimla; saka nenok alima meyong masü, joko ni nenok alima nungi shimtet, ajagi alimai nenok sempar.

²⁰ “Pei kibur dang kilir tuluba masü ta ni nenok dang ashiba o bilemtetang. Parnoki ni rishikangshi süra, ajangla parnoki nenok rishikangshitsü, parnoki kü o angara, ajangla parnoki nenok o a angatsü

²¹Saka parnoki kü nüng atema nenok dang ya ajak inyaktsü, kechiaser parnoki ni tenyaba meshitet.

²²Ni arur parnok dang mejembi asübo parnok temenen melila, saka tangbo parnok temenen asoshi tejentetlen maka.

²³Shibai ni sempar pai kü Bua sempar.

²⁴Koba mapatem tangar shingaia meinyaktet item mapatemji parnok rongnung ni meinyak asübo parnok temenen melila; saka tangbo parnoki nguogo aser kü Bu künaprongla sempaogo.

²⁵ Saka kecha kuli makai dang parnoki ni sempa ta par ozüng nung zülua aliba o ataloktsü asoshi ya adoker.

²⁶Saka teyarir, oda Ochi Tanela, shiba Tebu nungi adoker, Pa ni nenok dangi yoktsü aser Pa arutaka nungi Pai kü indang kuli asütsü.

²⁷Aser nenoka kü kulitem asütsü, kechiaser tetenzük nungi nenok kü den lia arur.