Read njo YOHAN 16 Bible Online

YOHAN 16 - njo bible

YOHAN 16

¹“Nenok memetsüdaktsü asoshi ni nenok dang o itemi jembiogo.

²Parnoki nenok sinagog nungi jentoktsü, hau, shibaisa nenok tepsetdir pai Tsüngrem tenzükba mapa inyaker ta bilemtsü mapang arudagi.

³Parnoki Tebu süshia ni süshia memetet nung item mapa inyaktsü.

⁴Saka kodang item mapatem asoshi mapangji arudir, ni nenok dang item indang ashi ta nenoki bilemtettsü asoshi ni nenok dang ya ajak shiogo. “Ni ya nenok dang mezüng nungi mashi, kechiaser ni nenok den liasü.

⁵Saka tang ni pei tenyaba dangi aotsü, saka nenok rongnung shingaia, ‘Na koleni aotsü?’ ta kü dang masüngdanger.

⁶Saka ni nenok dang ya ashi nung tejashi agi nenok temulungjang süngogo.

⁷Aji saka ni nenok dang atangji ashi, ni ao nung nenok asoshi tajungba; kechiaser ni mora Teyarirji nenok dangi marutsü; saka ni ora ni pa nenok dangi yoktsü.

⁸Aser kodang pa arudir pai alima temenen, temeshiba, aser obendangba indang metetjema arudaktsütsü.

⁹Temenen indang, kechiaser parnoki kü dak mamanger.

¹⁰Temeshiba indang, kechiaser ni Tebu dangi aor aser nenoki joko ni mangutsü;

¹¹obendangba indang, kechiaser iba alima chuba o bendangogo.

¹²“Ni nenok dang tashitsü o aika lir, saka nenoki aji tang maremtettsü.

¹³Aji saka kodang Ochi Tanelaji arudir, pai ochiba dangi nenok anitsü, kechiaser pai pei sasa nungi mejembitsü, saka kechisa Pai angashidir, itemji pai jembitsü aser kechi tarutsü lir item indangji Pai nenok nem metetdaktsütsü.

¹⁴Pai ni sentsü wangshidaktsütsü; kechiaser pai kü meyong nungi agitsü aser aji nenok nem metetdaktsütsü.

¹⁵Tebu meyong; kechisa aka, item ajakji kü meyong; anungji pai kü meyong nungi agitsü aser pai aji nenok nem metetdaktsütsü ta ni ashir.

¹⁶“Mapang tatsüka lir külen joko nenoki ni mangutsü, aser ano mapang tatsüka lir külen nenoki ni angutsü.”

¹⁷Anungji pa nütsüngtem rongnung kari parnok o parnok na jembitepa ashi, “Mapang tatsüka lir külen joko nenoki ni mangutsü aser ano mapang tatsüka lir külen nenoki ni angutsü, aser ni Tebu dangi aotsü ta ashiba ya kechi tetezü?”

¹⁸Anungji parnoki ashi, “Mapang tatsüka ta asüba ya kechi tetezü? Pai kechi ashir asenoki memetet.”

¹⁹Parnoki pa dang asüngdangnür ta Yisui meteta parnok dang ashi, “Mapang tatsüka lir külen nenoki ni mangutsü aser ano mapang tatsüka lir külen nenoki ni angutsü ta ashi nung iba indang nenok rongnung asüngdangteper no?

²⁰Atangji züngpong ni nenok dang shidi, nenoki ajebtsü aser mang ayimtsü saka alimaibo pelatsü. Nenok jashitsü saka nenok tejashi jagi tepela akümtsü.

²¹Tetsür nuso ashidang tekangshi lir, kechiaser la mapang atong, saka lai kodang nuji sodir alima nung tanur ka asoba asoshi lai joko tekangshiji mebilemteter.

²²Tang nenok tejashi kar, saka ni nenok tanaben angutsü aser nenok temulung tepela agi asüngtsü aser nenok tepelaji shingaia nenok nungi rakzüka bener maotsü.

²³Aser iba anogo nungji nenoki kü dang kecha masüngdangtsü. Atangji züngpong ni nenok dang shidi, nenoki Tebu dang langka meshira pai aji nenok nem kü tenüng nung agütsütsü.

²⁴Tang tashi nenoki kü tenüng nung kecha memeshi: Meshiang aser nenoki angutsü, ajagi nenok tepela peridaktsütsü.

²⁵“Ni tetezütsü agi nenok dang itemi jembiogo; kodang ni nenok dang joko tetezütsü agi mejembitsü saka Tebu indang shisang shisanga nenok dang ashitsü ibala mapang arudagi.

²⁶Iba anogo nungji nenoki kü tenüng nung meshitsü aser nenok asoshi ni Tebu dang meshitsütsü ta ni nenok dang mashir;

²⁷kechiaser Tebui pei sasa nenok meimer, kechiaser nenoki ni meim, aser ni Tebu nungi aru ta nenoki amang.

²⁸“Ni Tebu nungi adok aser alimai aru, tanaben ni alima toktsür aser Tebu dangi aotsü.”

²⁹Pa nütsüngtemi ashi, “Ajangla tang nai tetezütsü agi mejembi-i, shisang shisanga jembir.

³⁰Nai ajak metet, aser shingaia ne dang asüngdangtsü maka ta tang onoki metet. Iba yongji na Tsüngrem nungi aru ta onoki amanger.”

³¹Yisui parnok dang langzü, “Tang nenoki amanger asü?

³²Atangji nenok nisung shiai pei talidaki prokshitsü aser kü kija toktsütsü, ibala mapang arudagi, hau, aji tongogo; aji saka ni kü kija masü kechiaser Tebu kü den lir.

³³Kü dak nenok tesünep angutsü asoshi ni nenok dang itemi jembiogo. Alima nung nenok timtem tekangshi kar; saka tasü itang ni alima kokogo.”