Read njo YOHAN 2 Bible Online

YOHAN 2 - njo bible

YOHAN 2

¹Asemnübuba nung Galil nung aliba Kana yimtak kiyir benjong ka liasü, aser Yisu tetsü yangji liasü.

²Yisu aser pa nütsüngtema kiyir benjong jagi jaok.

³Kodang yi agima, Yisu tetsüi pa dang ashi. “Parnok yi maka.”

⁴Yisui la dang ashi, “Oh tetsür ne tebilemtsüji kü khu masü. Kü mapang ano matong.”

⁵Pa tetsüi anganürtem dang ashi, “Pai kechisa nenok dang shidir, aji inyakang.”

⁶Yihuda nunger temeshitetba yimsü ama, idakji lung mori trok, ka ka shia nung temok ana asem aiba amentaka liasü.

⁷Yisui parnok dang ashi, “Mori nungji tzü tebang medema shiokang.” Anungji parnoki itemji tebang medema shiok.

⁸Idangji pai parnok dang ashi, “Tang tera tatetang aser benjong ketdangbuba dangi bener oang.” Aser parnoki aji bener ao.

⁹Kodang benjong ketdangbubai tang tzü agi akümba yiji menakdang aser aji kong nungi-ar memetet, sakasa anganür shiri tzüji shiok parnokibo meteta liasü.

¹⁰Pai kiyimsangji aja aser pa dang asüngdang, “Nisung ajaki tamasa yi tajungbaji anganür aser nisungtemi aji jemshia jemer külenang tamajungbaji anganür; saka tang tashi nai yi tajungbaji ayu?”

¹¹Yisui temaitsü mapatem tenzükba ya pai Galil nung aliba Kana yimtak mezüngbuba inyak aser pa sentsüwangshi jungkai adokdaktsü aser pa nütsüngtemi pa dak amang.

¹² Iba sülen pa tetsü, pa adianutem aser pa nütsüngtem Kapernaumi alu aser parnoki idakji anogo ishika amung.

¹³Tang Yihuda nunger Kümtettsü Benjong anasa liasü aser Yisu Yirusalemi atu.

¹⁴Aser pai tenla kidang nashi, san aser guduru ayokertem aser sen melenertem mena angu.

¹⁵Aser pai tareptsü lisü yanglu, aser san o nashi den shiruru ajak tenla ki nungi aridok, aser pai sen melenertem sen toktoktsü aser parnok langbang meküptoktsü.

¹⁶Aser guduru ayokertem dang pai ashi, “Itemi yang nungi bener oang. Kü Bu ki shishidak tekümdaktsü.”

¹⁷ “Ne ki asoshi ni tejangraba agi asüngtsü” ta zülua aliba pa nütsüngtemi bilemtet.

¹⁸Anungji Yihuda nungeri pa dang langzüa ashi, “Item mapa inyakba asoshi nai onok dang kechi temaitsü sayur?”

¹⁹Yisui parnok dang langzüa ashi, “Iba tenla ki ya raksa-ang aser asemnü nung ni ya mesotsü.”

²⁰Idangji Yihuda nungeri ashi, “Iba tenla ki küm lir-trok agia yanglua liasü, aser nai aji asemnü nung mesotsü ama?”

²¹Saka Yisui pei mang tenla ki indang jembi.

²²Anungji kodang pa tasü nungi shia aru, pai ya jembi ta pa nütsüngtemi bilemtet; aser parnoki Laishiba o, aser Yisui ashiba o amang.

²³Tang Kümtettsü Benjong mapang nung Yisu Yirusalem nung alidang, pai inyakba temaitsütem ngua pa tenüng nung aikati amang.

²⁴Saka Yisui temulung lema pei sasa parnok nem magütsü,

²⁵Kechiaser pai nisung ajak metet, aser shingaia nisung atema kuli agütsütsü mali: kechiaser nisung dak kechi liasü pai pei sasa metet.