Read njo YOHAN 20 Bible Online

YOHAN 20 - njo bible

YOHAN 20

¹Tang hapta mezüngnep yakta ano züngia lia, Mari Magdala leper jagi aru aser leper nungi lungji meküpdoker angu.

²Anungji lai asema or Simon Peter aser nütsüng tangar ka shiba Yisui meim, parnok dangi arua ashi, “Parnoki Kibuba leper nungi bener oadokogo aser kong pa yua aliar onoki memetet.”

³Anungji Peter aser tangar nütsüngji yimti nungi tugu aser parnoki leper tsütsüi ao.

⁴Aser tenaprongla külemi asem aser tangar nütsüng jagi Peter ajatet; aser leperji tama atong.

⁵Pai anguoka telunglen reprang nung sü tanükji amungtaka angu; saka pai telungi mai.

⁶Anungji Simon Petera pa sülen anitaka aru aser leper jagi ai aser sü tanükji amungtaka paia angu.

⁷Aser ano asentzü aiba sü koba pa tekolak manung liasü, ajibo sü tanük denji masü aji dang tesem ka nung neptena liasü.

⁸Idangji tangar nütsüng shiba leper jagi tamasa aru, pa-a ai aser pai ngua amang.

⁹Kechiaser tasü nungi tanaben shia arutsüla ta ashiba Laishiba o parnoki ano mangatet.

¹⁰Anungji nütsüngtemi tanaben pei kidangi oadok.

¹¹Saka Mari leper temalen jeba noktaka liasü. Aser lai jeba leper telunglen anguoka reprang.

¹²Idangji kotak tenyar ana, ka Yisu mang ayudak tekolaklen aser ka tetsünglen, sü temesüng abener mena lai angu.

¹³Parnoki la dang ashi, “Tetsür, na kechiba ajeber?” Lai parnok dang langzü, “Kechiaser parnoki kü Kibuba bener ogo, aser parnoki pa kechi nung ayu ni memetet.”

¹⁴Yamaji shir külen lai tesülen tejak ashi aser Yisu noktaka angu, saka aji Yisu ta lai meshitet.

¹⁵Yisui la dang ashi, “Tetsür, na kechiba ajeber? Nai shiba bushir?” Paji atsüki anükera ta lai bilem, anungji pa dang ashi, “Tamarener, nai pa yang nungi bener oa lira, nai pa kechi nung ayu, kü dang shiangma, ni pa bener odi.”

¹⁶Yisui la dang ashi, “Mari!” Lai pa tsütsü meyip aser Ibri o agi pa dang ashi, “Rabboni” tetezü, Tesayur.

¹⁷Yisui la dang ashi, “Kü dak tekongshi, kechiaser ni ano Tebu dangi matu; saka kü adianutem dangi oa, kü Bu aser nenok Tsüngrem dangi ni atur ta parnok dang shiang.”

¹⁸Mari Magdala arur nütsüngtem dang ashi, “Ni Kibuba nguogo!” Aser pai la dang aji shiogo ta lai parnok dang ashi.

¹⁹Anungji hapta mezüng anogo nikongtsütsü, Yihuda nunger tsübuba agi nütsüngtem alidak kishi shibanger parnok alidang; Yisu aru aser parnok dang ashi, “Nenok den tesünep liang.”

²⁰Pai aji shir külen, pai parnok dang pa tekabu aser tesa sayu. Anungji nütsüngtemi Kibuba angudang pela-a liasü.

²¹Anungji Yisui tanaben parnok dang ashi, “Nenok den tesünep liang. Tebui kechi koda ni yok, aji oda nia nenok yoker.”

²²Kodang Yisui ya ashi pai parnok dak apuokja parnok dang ashi “Tanela Temeshi agizükang Amanga: Laishiba kar nung “maneni amanga” ta lir.

²³ Nenoki kar Temenen tokra, parnok dang atoktsü, nenoki kar temenentem metoki yura, parnok dang aji sota ayutsü.”

²⁴Saka Yisu arudang, Toma, terana rongnung ka shiba dang chakrep chir ta aja, pa parnok den mali asü.

²⁵Anungji tangar nütsüngtem jagi pa dang ashi, “Onokibo Kibuba nguogo.” Tomai parnok dang ashi, “Ni pa tekabu nung kojal tarak mungura, aser kojal tarak nungji kü temeyong masenokra aser tesa nung kü tekabu mamuokra, ni mamangtsü.”

²⁶Tinü lir külen pa nütsüngtem tanaben külemi kilung nung liasü, aser Toma parnok den liasü. Kishiji shibanga liasü, saka Yisu aru aser parnok rongnung noktak aser ashi “Nenok den tesünep liang.”

²⁷Idangji pai Toma dang ashi, “Yangi ne temeyong asenokang, aser kü tekabu ajiang, aser ne teka songtoka kü tesa nung amuokang; aser mamangi teli, saka aman

²⁸Tomai langzü, “Kü Kibuba aser kü Tsüngrem.”

²⁹Yisui pa dang ashi, “Nai ni angu nung nai tangbo amanger asü? Shiri mangu aji saka amangogo parnok tepelatsü.”

³⁰Iba kaket nung zülua maliba tanga temaitsütem aika Yisui pei nütsüngtem tsüngdang inyak.

³¹Saka Yisuji Khrista, Tsüngrem Chir ta nenoki amangtsü asoshi aser yamaji amanga[7] pa tenüng nung nenoki taküm akatsü asoshi itemi züluogo.