Read njo YOHAN 5 Bible Online

YOHAN 5 - njo bible

YOHAN 5

¹Iba sülen Yihuda nunger benjong ka liasü, aser Yisu Yirusalemi atu.

²Yirusalem nung San süngkhümbong anasa awatsüng ka lir, koba dang Ibri oshi agi Bethzatha[4] ta ajar, idakji semtu pungu liasü.

³Item nungji shirangertem, nükpokertem, tsüngtsükertem, aser yaretbatem jenti tzü arakzüba ata-a mejanga liasü;

⁴kechiaser Kibuba tenyar ka mapang mapang nung iba awatsüng jagi ai aser tzüji arakzüdaktsü, anungji tzü arakzüdang shiba tamasa idir pa dak keta aliba tashitakji anebadok.

⁵Yangji küm semer-ti shirangba nisung ka liasü.

⁶Yisui pa mejanga aliba ngua aser joko pa yamaji talangka aliba meteta pai shirangba dang ashi. “Nai anebnür asü?”

⁷Shirangba nisung jagi pa dang langzü, “Kibur, kodang tzü nungshidir, idangji awatsüng nung ni anioktsütsü nisung shinga melika, anungji ni oya alidang tangar nisung kü dang tamasa alur”.

⁸Yisui pa dang ashi, “Noktakang, ne yipten benang aser jaja-ang.”

⁹Aser idangyongji nisungji aneb aser pa yipten bener jaja. Panüji amungnü liasü,

¹⁰anungji Yihuda nungeri tanepba nisung dangji ashi, “Ya Amungnü lir, na yipten bener senzütsü tim masü.”

¹¹Pai parnok dang langzü “Nisung shibai ni anebtsü, pai kü dang ashi, ‘Ne yipten benang aser jaja-ang.’”

¹²Parnoki pa dang asüngdang, “Ne yipten benang aser jaja-ang ta ne dang ashiba nisungji shiba?”

¹³Saka tanepba nisung jagi aji shibar memetet; kechiaser yangji nisung jenti liasü, aser Yisu aenshia oadoker liasü.

¹⁴Iba sülen Yisui pa tenla ki nung angu, aser pa dang ashi, “Ajiang, na junga kümogo; tali tamajungba tia ne dak matongtsüsa joko nai temenen tebenshi.”

¹⁵Idangji nisungbaji ao aser pa anebdaktsübaji Yisu ta Yihuda nunger dang pai ashi.

¹⁶Iba yongji Yihuda nungeri Yisu rishikangshitsü tenzük, kechiaser itemi pai Amungnü nung inyak.

¹⁷Anungji Yisui parnok dang langzü, “Kü Bui teti maneni inyaker, aser nia inyaktsüla.”

¹⁸Anungji iba yongji Yihuda nungeri pa tepsettsü tali bushi, kechiaser pai Amungnü dang raksa masü, saka pei sasa Tsüngrem den saku küma, Tsüngrem dang pei Tebu ta aja.

¹⁹Anungji Yisui parnok dang ashi, “Atangji züngpong ni nenok dang shidi, Techiri pa sasa kecha meinyaker; saka Tebui kechi inyakba pai angu, aji dang paia inyaker.

²⁰Kechiaser Tebui Techir meimer aser pai pei sasa inyakba ajak pa dang sayur. Anungji nenoki süngmangtsüsa item mapa dangi tuluba pai pa dang sayutsü.

²¹Kechiaser Tebui koda tasür shia arudakja parnok taküm kümdaktsür, aji oda Techiria pai mulungbatem taküm kümdaktsür.

²²Kechiaser Tebui shinga o mebendanger saka pai Techir nem o bendangba ajak agütsüogo.

²³Anungji ajaki Tebu dang akhüm tsübuba ama parnoki Techir dang akhüm tsübutsü. Shibai Techir dang akhüm metsübur, pa tenyaba Tebu dang pai akhüm metsübur.

²⁴Atangji züngpong ni nenok dang shidi, shibaisa kü o angar aser ni tenyaba dak amanger pa teti taküm kar; aser obendang daki marutsü, saka tasüba nungi taküm daki ogo.

²⁵Atangji züngpong ni nenok dang shidi, mapang arudagi, aser aji tang lir; kodang tasürtemi Tsüngrem Chir ola angashitsü aser shiri angashidir parnok taküm alitsü.

²⁶Kechiaser Tebu pei sasa dak koda taküm lir, aji oda pai Techir nem pei sasa dak taküm alitsü agütsüogo.

²⁷Aser pai pa nem o bendangtsü ain agütsü, kechiaser pa Nisung Chir lir.

²⁸Ya asünung tesüngmang, kechiaser mapang arudagi kechi nung leper nung alir ajaki pa ola angashitsü,

²⁹ Aser adoktsü, shiri tajung inyakogo taküm daki shia arutsü, aser shiri tamajung inyakogo, o bendangdaki shia arutsü.

³⁰“Ni kü tashi agi kecha meinyaktet, saka kü Bui ashiba ama ni o bendanger aser kü obendangbaji ochi lir. Kechiaser ni mulungba ama ni meinyaker saka ni tenyabai mulungba ama ni inyaker.

³¹Ni pei sasa indang kü kuli agütsüra, kü kuliji ochi masü.

³²Tangar kati kü indang kuli agütsür, aser pai kü indang kuli agütsübaji ochi ta ni metet.

³³ Nenoki Yohan dangi yok aser pai ochi atema kuli agütsü

³⁴Saka kechi kuli ni angu aji nisung nungi masü, aji saka nenok kümtettsü asoshi ni o ya ashir.

³⁵Jangrua sangwaba milenji pa liasü aser nenoki kenpiga tesangwa nung pela-a alitsü mulunga liasü.

³⁶Saka kü kuli kechi lir aji Yohan kuli dang nungi tuluba, kechiaser kechi mapa renemtsü Tebui kü nem agütsü aser koba mapatemsa ni inyaker, itemjagi Tebui ni yok ta kü indang kuli agütsür.

³⁷ Tebu, shibai ni yok, pai kü indang kuli agütsüogo. Nenoki kecha südanga pa ola mangashi, mesüra pa tereprangtsü kechi amar mangu

³⁸Pa o nenok dak tenoka mali, kechiaser shiba pai yok pa dak nenoki mamanger.

³⁹Nenoki Laishiba bushir, kechiaser item nungji nenoki teti taküm angutsü ta bilemer aser item Laishibai kü indang kuli agütsür.

⁴⁰Aji saka nenok taküm angutsü asoshi kü dangi arutsü nenoki memulunger.

⁴¹“Ni nisung nungi nüngsang magir.

⁴²Saka nenok dak Tsüngrem temeimji mali ta ni nenok metet.

⁴³Ni kü Bu tenüng nung aru aser nenoki ni magizüker. Tangar kati pei tenüng nung arura, nenoki pa agizüktsü.

⁴⁴Nenok shiri ka dang aliba Tsüngrem nungi aruba nüngsang mebushir, saka kati ka nungi nüngsang agir, nenoki kechi koda amangtet?

⁴⁵Tebu madang ni nenok aitsütsü ta tebilem, nenok aitsüba ka lir aji Mosa, shiba dak nenoki nenok teimla yuogo.

⁴⁶Kechiaser nenoki Mosa dak amang asübo, kü daka amangla, kechiaser pai kü indang zülu.

⁴⁷Saka pai züluba nenoki mamangra, kü o nenoki kechi koda amangtsü?”