Read njo TENYARTEM MAPA 10 Bible Online

TENYARTEM MAPA 10 - njo bible

TENYARTEM MAPA 10

¹Kaisaria nung nisung ka tenüng agi Kornelia, Itali nungi aruba temeranger telok noklang ka madak tanishir ka liasü.

²Pa aser par kinunger ajonga yimsü nung keta asenba aser Tsüngrem akhüm tsübuba nisungtem liasü; pai nüburtem nem angati aika agütsü aser Tsüngrem dang teti sarasadema liasü.

³Kenü nikongtsütsü asem baji meta pai mangdang ka nung jangja jangja-a Tsüngrem kotak tenyar ka aruba angu; aser pa dang ashi, “Kornelia!”

⁴Pai kotak tenyar dakji ranglok aser pai tsübua aküm, aser pai ashi, “Kechi-aka, Kibuba?” Kotak tenyar jagi pa dang ashi, “Ne sarasadem aser nai angati agütsüba indang Tsüngrem madangi mamatsüsa atuogo.

⁵Tang Yopai nisung yokang, aser Simon shiba dang Peter ta ajar, pa anir arung.

⁶Tzüyim küm nung aliba shiküp yanglur Simon kidang pa anena lir.”

⁷Aser kodang kotak tenyarji oadok; pei kilir ana aser pa tenzükertem rongnungi yimsü nung keta asenba temeranger ka ta pai aja.

⁸Pai parnok dang item o ajak shir külen pai parnok Yopai yok.

⁹Asüngji parnoki pei lenmang nung ao aser yimtiji atongtsü anasa alidang anjong meshi meta, Peteri sarasademdak kilem jagi atu.

¹⁰Pa ya-adok aser chiyungnü; aser parnoki chiyungtsüji renemdang pa mangdangi ao,

¹¹aser pai kotak lapoka angu aser oset ka sü tulu ka mesüka kinük pezüsülen amer alima nung tsükdaktsüba pai angu.

¹²Iba sü nung tetsüng pezü atenba shiruru tapu ajak, ali nung juzüa senzübatem aser anüng ozütem ajak liasü.

¹³Aser ola kati pa dangi arua ashi, “Shishiang, Peter tepsetang aser chiang!”

¹⁴Saka Peteri ashi, “Kibuba yamaji kodanga masü, kechiaser ni kodanga oset mashi-i mesüra memeshiba kecha machir.”

¹⁵Ano ola kasa jagisa Peter den tanabena jembia ashi, “Kechi Tsüngremi meshitettsüogo, aji nai memeshi ta teshima.”

¹⁶Aser ya asemben tashi atalok, aser idangyongji osetji kotaki bener tuadok.

¹⁷Peteri iba mangdang anguba indangji ya kechi tetezü ta ratamata bilema alidang, ajiang, Korneliai yokba nisungtemi Simoner kiji koba ta asüngdanga kikümbang nung noktak.

¹⁸Aser Simon shiba dang Peter ta aja, pa idakji anena ali asü ta asüngdang.

¹⁹Peteri mangdang indangji bilema alidang, Tanelai pa dang ashi, “Ajiang! Nisung asemi na bushir.

²⁰Anungji noktakang aser ludangang; aser kecha matidaki dang parnok den oang, kechiaser parnokji ni yoka lir.”

²¹Peteri nisungtem dang jagi alu aser ashi, “Ajiang, nenoki shiba bushir, paji ni lir, kechi asüngdangtsü atema nenok yagi aru?”

²²Parnoki langzü, “Noklang ka madak tanishir Kornelia, ochishir aser Tsüngrem dang tsübuba nisung ka aser Yihuda kin ajongai kuli junga agütsütetba, par kidangi na ajatsü aser na nungi o angatsü temeshi kotak tenyar kati pa dang metetdaktsü.”

²³Anungji pai parnok jaoka anendaktsü. Aser asüngji pai parnok den külemi apuso, aser Yopa nungi adianutem kar pa meina ao.

²⁴Tananüji parnoki Kaisaria atong. Aser Korneilai par kimang aser temba-tinu külemi jaoka parnok aruba ata-a liasü.

²⁵Aser kodang Peter kidangi ait, Korneliai pa den ajurutepa pa tsüngdang apudak aser pa agizük.

²⁶Saka Peteri pa noktakdakja ashi, “Noktakang, nia nisung dang.”

²⁷Peteri pa den jembitepa kidangi ai, aser pai aika sentepa angu.

²⁸Pai parnok dang ashi, “Yihuda nisung kati tangar kin nisung den medemtsü mesüra ajuruteptsü tim masü ta nenoki nenok sasa meteta lir. Aji saka nisung shinga danga memerükba mesüra menendokba ta ajatsü tim masü ta Tsüngremi kü dang jungjunga sayuogo.

²⁹Anungji kodang nai ni tajai yok, nia mulungsoa dang aru. Anungji kechi o atema ni tajai yok, aji ni metetnür.”

³⁰Korneliai langzü, “Anogo pezünü süia ogo, ni ozü kidang asem baji nung sarasadema liasü, aser ajiang kü madang nisung ka sentsüprang sü abener noktak.

³¹Pai kü dang ashi, ‘Kornelia, Tsüngremi ne sarasadem angashiogo aser ne mapa tajung angati agütsüba pai meteta lir.

³²Anungji Yopai yoka Simon, shiba dang Peter ta ajar, pa ne dangi ja-ang. Pa tzüyimküm nung aliba shiküp yanglusang Simoner kidang anena lir.’

³³Anungji idangyongjisa ni na tajai yok, aser na arubaji junger. Anungji tang Kibubai ne dang melaba ajak angatsü onok ajak Tsüngrem madang sentepa lir.”

³⁴ Peteri tebang lapoka ashi, “Tsüngremi nisung jak merepranger ta ni atangji ajiteter.

³⁵Saka kin ajak nungi shibaisa pa akhüm tsübur aser tim mapa inyaker pai agizüker.

³⁶Yisu Khrista Osangtajung tesünep indang sayutsüngia Israel nisungtem dangi koba osang yok, pa ajak madak Kibuba lir ta iba osang nenoki metet.

³⁷Yohan Baptitsübai sayutsüngir külen, Galil nungi tenzüka Yihuda ajak nung atalokba nenoki metet.

³⁸Aser koda Tsüngrem Tanela Temeshi ajanga Nazaret nunger Yisu shimtet, aser Tsüngrem pa den dena ali nung pai tajung inyaka, aser mojingi kangshiba ajak anebja senzü, ya-a nenoki metet.

³⁹Yirusalem aser Yihuda nunger lima nung pai inyakba ajak indang onok kuli lir. Aser paji parnoki kangki nung meta-a tepset.

⁴⁰Saka Tsüngremi pa asemnübuba nung shia arudaktsü aser pa jungkai adoka ngudaktsü;

⁴¹nisung ajak dang masü, saka Tsüngremi tamasa shimtetba kulitem dang, oda pa tasü nungi shia arur külen onok shir pa den chiyunga-ajem, onok dang pai jungkai adoka sayudaktsü.

⁴²Akümlir aser tasürtem obendanger asütsü shiba Tsüngremi shimtet, ibaji pa ta nisungtem dang sayutsüngitsü aser kuli agütsütsü onok nem ozüng agütsü.

⁴³Pa dak amanger shiai pa tenüng ajanga temenen tatokba angutsü ta ainkar ajaki pa asoshi kuli agütsür.”

⁴⁴Peteri maneni item o jembia alidang, oji angashirtem ajak madaki Tanela Temeshiji alu.

⁴⁵Tang Yihuda purtem tamangertem kwika Peter den külemi liasü, parnok ajak süngmangadok, kechiaser Bendangertem madak Tanela Temeshi sempetji mekeploktsü ta parnoki meteta aküm.

⁴⁶Kechiyong parnoki tangar oshitem agi jembiba aser Tsüngrem uludaktsüba parnoki angashi.

⁴⁷Idangji Peteri ashi, “Asenoki agizükba ama item nisungtemia Tanela Temeshi agizükogo, ajangla parnok tzü nung baptitsütsü nisung kari noktangteter ma?”

⁴⁸Anungji Peteri parnok Yisu Khrista tenüng nung baptitsü mela. Idangji parnoki pa dang anogo ishika alitsü mepishi.