Read njo TENYARTEM MAPA 11 Bible Online

TENYARTEM MAPA 11 - njo bible

TENYARTEM MAPA 11

¹Bendangertemi Tsüngremer Osangtajung agizükogo ta tenyartem aser Yihuda nung aliba adianutemi angashi.

²Anungji kodang Peteri Yirusalemi atu, temejeptokba teloki pa anema jembia;

³parnoki ashi, “Kechiba memejeptokertem dangi na ao aser parnok den külemi na chiyung?”

⁴Anungji Peteri aji parnok dang tetenzük nungi tatongi shimeso, aser ashi,

⁵“Ni Yopa yimti nung sarasadema liasü aser ni mangdangi ao, idangji ni yamai ka angu. Idakji oset ka sü tulu ka mesüka kinük pezüsülen amer kotak nungi tsükdaktsüba ni angu, aser aji ni tonga alu.

⁶Aji ni kanga kümdanga reprangdang nung tetsüng pezü atenba ali shirurutem, arem shirurutem, juzüa senzüba aser anüng ozütem ni angu.

⁷Aser ano ola kati kü dang ashi, ‘Shishiang, Peter, tepsetang aser chiang.’

⁸Saka ni ashi, ‘Kibuba, yamaji kodanga masü, kechiaser menendokba mesüra memeshiba oset kü bangi kodanga meidang.’

⁹“Saka kotak nungi ola jagi tanaben jembi ‘Kechi Tsüngremi meshitettsüogo aji nai memeshi ta teshima.’

¹⁰Ya asemben tashi atalok aser ajakji tanaben kotaki atsüket.

¹¹Ajiang idangjisa Kaisaria nungi kü dangi yokba nisung asem ni alidak kima noktak.

¹²Aser kecha meratai dang parnok den külemi aotsü Tanelai mela. Yopa nungi tamanger adianu par trok kü den aru aser onoki Korneliar kidang jagi ai.

¹³Kodang kotak tenyar ka par kidang noktaka pai angu, iba indangji pai onok dang ashi. Kotak tenyar jagi pa dang yamai ashi, ‘Yopai yokang, aser Simon, shiba dang Peter ta ajar, pa anir arung.

¹⁴Aser kechi koda na aser ner kibong ajonga kümzüktsü iba indang osang pai ne dang metetdaktsütsü.’

¹⁵Ni jembitsü tenzüker külen, tetenzüklen asenok daki Tanela Temeshi aluba ama, parnok madakia alu.

¹⁶ Kibubar O to ni bilemtet, oda pai ashi ama, ‘Yohani tzü nung dang baptitsü; saka nenok Tanela Temeshi nung baptitsütsü.’

¹⁷Anungji kodang asenoki Kibuba Yisu Khrista dak amang asenok nem Tanela sempet agütsüba ama Tsüngremi parnok nema kasa sempetji agütsü. Sürabangla, Tsüngremi mulungba songtemtsü ni ya shiba?”

¹⁸Kodang parnoki item o angashi parnoki mokorai ali; aser parnoki Tsüngrem nem sentsüwangshi agüja ashi, “Ajangla Bendangertemia taküm angutsü asoshi temulung meyiptsü Tsüngremi agütsüogo!”

¹⁹ Anungji tamangertem Stefan rishikangshia, pa tepsetba ajanga shirsa ayimsünga prokshia ao parnok Foinika, Kupra aser Antiok tashi ao; aji sakasa Yihuda purtem dak alema shinga danga osangji sayutsüngi mesüi liasü.

²⁰Saka parnok rongnung karbo Kupra aser Kurini nisungtem liasü, shiri Antioki aita Bendangertem dang Kibuba Yisu Osangtajung sayutsüngia oji jembi.

²¹Kibuba tashi parnok den liasü aser parnok aikati amanga Kibuba dangi meyip.

²²Parnok indang osangji Yirusalem nung aliba arogoi angashi, aser parnoki Barnaba Antioki yok.

²³Kodang pa tonga aru pai Tsüngrem taochi nisungtem rongnung angu, idangji pa kanga pela aser temulungtetba agi Kibuba dak parnoki azüita alitsü asoshi pai parnok ajak ajungshi.

²⁴Kechiaser Barnaba Tanela Temeshi agi asüngba aser tamang akaba nisung tajung ka liasü. Aser telok tulu ka Kibuba dangi aru.

²⁵Barnabai Saul bushitsü asoshi Tarsai ao.

²⁶Aser kodang pai Saul ajuru, pai pa Antioki anir aru. Parnoki küm ka renteta arogo den külemi liasü aser nisung aika dang sayu. Antiok nung nütsüngtem dangji tamasa Khristantem ta aja.

²⁷Item anogo nungji ainkartem Yirusalem nungi Antioki alu.

²⁸ Parnok rongnung nisung ka tenüng agi Agaba liasü, pai noktaka alima ajak nung ayawara tulu ka arutsü ta Tanela ain agi shin. Ibaji Klaudia yimsüsüba mapang atalok.

²⁹Aser nisungtemi Yihuda lima alir adianutem dangi pei akok tashi teyari yoktsü mulungtet.

³⁰Ibaji parnoki inyak aser Barnaba o Saul na ajanga ibaji tamburtem dangi yok.