Read njo TENYARTEM MAPA 12 Bible Online

TENYARTEM MAPA 12 - njo bible

TENYARTEM MAPA 12

¹Iba mapang nungji Herod chubai arogo nungertem kar kangshitsü asoshi teka sotak.

²Pai Yakob, Yohan tedi nok agi lepsetdaktsü.

³Kodang ya Yihuda purtemi pela agizüker ta pai ajitet; pai Peter-a aputsü apuso. Aji Piyazü meinokba Amtsük Benjong mapang liasü.

⁴ Pai pa pur tepuokdak ayu, aser temeranger tanüker ter trok nem bendanga agüja nükdaktsü. Kümtettsü benjongji süir külen nüburtem madangi pa anir atoktsü pai bilema liasü.

⁵Anungji Peter tepuokdak shibanger nükya liasü. Saka arogoi pa asoshi Tsüngrem dang ajang ajanga sarasadema liasü.

⁶Herodi Peter nüburtem dangi anitetdi ta alidang, paonungji Peter temeranger ana tsüngda nung merangsen ana agi sentaker mejanga liasü; aser ta nükertemi tepuokdak kishi madang nükya liasü.

⁷Aser ajiang, Kibuba kotak tenyar ka pa anasa noktak, aser tesangwa ka taktang nungji yalok. Pai Peter tesa nung kongshi aser pa mesoa ashi, “Tangsa shishiang.” Idangji pa alenba merangsenji pa teka nungi tsükadok.

⁸Kibuba tenyar jagi pa dang ashi, “Nangri kangang aser tsüngsem semang aser kü sülen anitakang.”

⁹Peteri tugu aser pa sülen anitak. Saka Kibuba tenyari pa anishibaji asangsang ta pai mebilem, saka pai mangdang ka angu ta bilem.

¹⁰Kodang mezüngbuba aser tanabuba tanüker ajanga parnoki süia ao aser yimti-i aniba merang süngkhüm atong, ibaji pa sasa dang parnok asoshi lapoktsü, aser parnoki tugua yimdong ka ajanga süi. Idangji Kibuba tenyari pa toktsür pila.

¹¹Kodang Peteri ya meteta aküm pai ashi, “Kibubai pei tenyar yoka Herod teka aser kü dak inyaktsü Yihuda nungeri imlaba nungi ni kümzükogo ta ni tang atangji meteter.”

¹²Pai aji bilemteter külen Yohan shiba dang Mark ta ajar, pa tetsü Mari-er kidangi ao. Idakji aika senteper külemi sarasadema liasü.

¹³Peteri kishi nungji akoshidang, kilitsür ka tenüng agi Roda, lai aji langzütsü aru.

¹⁴Lai Peter ola angateta, tepela agi kishiji melapoki asema ao aser Peter kima noktaka lir ta parnok dang ashi.

¹⁵Parnoki la dang ashi, “Na yiamatar;” saka aji atangji ta lai nenshia ashi. Saka parnoki ashi, “Ibaji pa tanela asütsü.”

¹⁶Saka Peteri maneni akoshi. Kodang parnoki kishiji lapok, parnoki pa ngua süngmang.

¹⁷Saka parnok mokorai alitsü pai teka agi nemtem, aser kechi koda Kibubai pa tepuokdak nungi aniteta anir aru aji pai ashi, ano pai ashi, “Ibai Yakob aser adianutem dang shiang.” Aji shir külen idangyongji pai pila-a tanga tesem kati ao.

¹⁸Kodang anepdang aküm, Peter kechi kümadok ta temerangertem rongnungji mangmangtep.

¹⁹Herodi pa bushir mungu, aser pai tanükertem dang o asüngdangtep aser parnok südaktsütsü ozüng agütsü. Aser Herodi Yihuda nungi Kaisariai lua idakji amung.

²⁰Herodi Tair aser Sidon nunger dang kanga ain adok. Anungji parnoki temulung ka sür pa dangi aru aser parnok yaritsü asoshi Blasta tenüng agi Herod chubar ki kibur den parnoki tembar yimer pa ajanga Herod dang yimjung meshi, kechiaser chubar linük nungi parnok linüki chiyungtsü agia liasü.

²¹Anogo tatemzük ka nung Herodi pei chuba sobutsü sobu aser obendangba chuba menden nung mener, parnok den o jembi.

²²Nisungtemi ayimtena ashi, “Ibai nisunger ola masü, saka tsüngrem ola.”

²³Idangji Kibuba kotak tenyar kati pa dak zükoktsü, kechiaser pai Tsüngrem nem sentsüwangshi magütsü; aser pa mesen agi rüseta asü.

²⁴Saka Tsüngrem O maneni züina aser rena ao.

²⁵Parnok mapa temer külen Barnaba aser Saul tena den Yohan shiba dang Mark ta aja, pa anir parnok Yirusalem nungi meyipa shilang.