Read njo TENYARTEM MAPA 13 Bible Online

TENYARTEM MAPA 13 - njo bible

TENYARTEM MAPA 13

¹Antiok arogo nungji ainkartem aser tesayurtem liasü, Barnaba aser Niger ta ajaba Simon, Kurini nunger Lukia, Herod Tetrark[3] den külemi yintetba Manan aser Saul.

²Parnoki Kibuba külema aser lumia alidang Tanela Temeshi-i ashi, “Barnaba aser Saul, kechi atema ni parnok jatet iba mapa inyaktsü asoshi parnok balaka pila-a yuang.”

³Anungji parnoki lumia aser sarasadema tena dak teka agi nemet aser tena pila-a yok.

⁴Anungji Tanela Temeshi-i parnok yok, aser parnoki Selukiai alu. Idak nungjagi parnoki rong agi Kuprai ao.

⁵Kodang parnoki Salami atong, Yihuda nunger sinagogtem nung Tsüngrem o sangoktsü; aser parnok den Yohana teyarir ka ama dena liasü.

⁶Kodang asetkong ajak ajanga parnoki Pafa tonga ao, temezünger ka Yihuda nunger tiyazü ainkar ka tenüng agi Bar-Yisu parnoki ajuru.

⁷Paji yimsüsür Sergia Paul, shiba tekolok techira nisung, pa den liasü. Sergia Pauli Barnaba aser Saul nungi Tsüngrem o angatsü tena tajai yok.

⁸Saka temezünger Elumia jagi (aji Grik o agi pa tenüng tetezü liasü) parnok noktanga Sergia Paul nemji tamang magizükdaktsütsü merang.

⁹Saka Saul, shiba dang ano Paul ta ajar, Tanela Temeshi agi sünger pai Elumia dak rangshia reprang

¹⁰aser pai ashi, “Hai, na tekülak aser ashikülak ajak agi asüngba nisung, na mojing chir, tajung ajak sempaba nisung, nai Kibubar atangji lenmang kirakdaktsütsü asoshi manentsü no?

¹¹Tang ajiang, Kibuba teka ne dak air aser kenpiga asoshi anü mungui ne tenük apoktsü.” Idangji ajongbena tzüsü aser tammang agi pa dak atong aser tangar kari pa teka nung ameter anitaktsütsü asoshi pai bushi.

¹²Sergia Paul jagi kodang tatalokbaji angu, pa tamanger ka aküm, aser Kibuba indang tesayuba nungji pai süngmanga liasü.

¹³Paul aser pa medemertemi Pafa nungi rong agi ao aser Pamfulia nung Pergai aru; saka Yohani parnok toktsü aser Yirusalemi meyipa shilang.

¹⁴Saka parnoki Perga nungi oa, Pisidia nung aliba Antioki aru. Aser Amungnü parnoki sinagogi ia amen.

¹⁵Mosa Ozüng aser ainkartem kaket züngdanger külen sinagog nung yimsüsürtemi parnok dangi yoka ashi, “Adianutem, nenoki nüburtem asoshi tajungshi o shinüa lira shiangma.”

¹⁶Aser Pauli noktak aser teka arakzüa ashi, “Israel nungertem aser Tsüngrem tsüburtem, angangjo.

¹⁷ Iba Israel Tsüngremi asen tetsü-teboutem shimtet aser parnok Ijip lima nung aenersa alidang nüburtemji uludaktsü aser tashi tulu agi pai parnok idak nungjagi anitet.

¹⁸ Küm lir tashi lisem lima nung pai parnok anebalua liasü.

¹⁹ Pai Kanan lima nung kin tenet samadaktsür külen, par limaji parnok nem küm noklang pezü ser tenem tashi senmang amangdaktsü.

²⁰ Iba sülen Samuel ainkar tashi pai parnok nem Obendangertem agütsü.

²¹ Iba sülenji parnoki chuba ka meshi, aser Benjamin kidong nungi Kish jabaso, Saul agütsü, shibai küm lir tashi yimsü asü.

²² Aser Saul melena Dawid parnok chuba asütsü Tsüngremi shimtet. Tsüngremi Dawid indang kuli agüja ashi, ‘Kü temulung asüba aser ni mulungba ajak inyaktsüba, Yesse jabaso Dawid, ni nguogo.’

²³Tenangzükba ama, pa nungi jakzükbatem nungi Israel nem Kümtetdakba ka, Yisu, anir arutsü.

²⁴Pa marudang temulung meyipa baptitsüba indang Yohani Israel nübur ajak dang sayutsüngia liasü.

²⁵ Aser Yohani pei mapa renema arudang ashi, ‘Nenoki ni shiba-a ta bilemer? Nenoki yongyaseta ataba nisungji ni masü. Saka ajiang, shiba tsüngsem lisü salatsü ni metemsü, pa kü sülen arudagi.’

²⁶Adianutem, Abraham nungi jakzükbatem aser Bendangertem rongnung Tsüngrem tsüburtem, asenok dangi tekümtet Oji yokogo.

²⁷Kechiaser Yirusalem nung alirtem aser par yimsüsürtemi Yisuji magizük, aser Amungnü shia azüngba ainkartem shin o parnoki mangatet nungji parnoki Yisu aitsüba jagi ainkar otem ataloktsü.

²⁸ Pa südaktsütsüsa pa dak tai munguaka parnoki Pilat dang pa tepsetdaktsütsü asüngdang.

²⁹Pa indang zülua aliba ajakji ataloker külen, parnoki pa kangki nungi agizüka leper nung ayu.

³⁰Saka Tsüngremi pa tasü nungi shia arudaktsü.

³¹ Galil nungi Yirusalem tashi pa den jajartem dangi pai aiben adoka sayu. Aser tang Israel nüburtem dang parnokji pa kulitem lir.

³²Asen tetsü-teboutem dang tenangzükba indang,

³³Yisu shia arudaktsü nungji Tsüngremi ibaji asen chirtem nem ataloktsüogo. Tenüngsang ken tanabuba nung zülua aliba ama, ‘Na kü jabaso, tanü ni na aso.’

³⁴ Pai pa tasü nungi shia arudaktsü nung pa joko kodanga shizüka maotsü,aser iba indang yamai ashir; ‘Dawid nem agütsüba temeshi aser atangji, temoatsütem ni ne nem agütsütsü.’

³⁵ Kechiaser ano Tenüngsang ken tanga tesem ka nung yamai ashir; ‘Nai ne temeshiba shizüka moudaktsütsü.’

³⁶Kechiaser Dawidi pei putu nung Tsüngrem tasazükba tenzüker külen, pa-a pei tetsü-teboutem den ayu, aser shizüka ao.

³⁷Saka Tsüngremi shiba shia arudaktsü pa shizüka mao.

³⁸“Anungji adianutem, iba nisung ajanga temenen tatokba nenok dang sangoktsür ta nenoki metetang.

³⁹Aser kechi nungi Mosa Ozüng agi nenok memetendaktsütet, item ajak nungi pa dak tamanger shia metendaktsür.

⁴⁰Anungji ainkartemi kechi jembizüka yutsü, aji nenok dak mataloktsüsa nenok kümdangang;

⁴¹ ‘Ajiang, nenok tatalartem! Süngmangang aser sama-ang; Kechiaser ni nenok putu nung mapa ka inyaker. Iba mapa indang nisung kari Nenok dang shiaka, nenoki kodanga mamangtsü!’ ”

⁴²Parnok sinagog nungi tugudang item o indang ano taruba Amungnü parnok dang tali ashitsü mepishi.

⁴³Sinagogji senshidang Yihuda nungertem aser Yihuda yimsüi meyipertem aika Paul aser Barnaba sülen anitak, aser parnoki parnok dang Tsüngrem taochi nung maneni alitsü ajungshi.

⁴⁴Tanabuba Amungnüji yimti nung aliba nisung timbaka Tsüngrem o angatsü külemi sentep.

⁴⁵Saka kodang Yihuda purtemi telokji angu parnok mokokaji agi süngadok aser Pauli jembiba o den bangsentepa atala.

⁴⁶Idangji Paul aser Barnaba teneti tasü ita jembia ashi, “Tsüngrem O nenok dang tama ashitsü tenüngdaktsü liasü, saka nenoki aji endokadok, aser teti taküm asoshi tetemsü masü ta nenok sasa lemtetba ngua ajiang, joko onoki Bendangertem dangi meyiper.

⁴⁷ Kibubai onok dang Yamai ozüng agütsü: ‘Alima tatem tonga tekümtet alitsü, Bendangertem dangi tesangwa ka asoshi ni na shimtetogo.’ ”

⁴⁸Bendangertemi ya angashia pela aser Tsüngrem o sentsüwangshitsü. Aser teti taküm asoshi kwika shimteta liasü parnoki amang.

⁴⁹Aser Kibuba O ajaklen ayimsünga ao.

⁵⁰Saka yimsü nung akanga sotba tulutsürtem aser yimti tazüngpurtemji Yihuda nungeri ajungmesoa Paul aser Barnaba anema rishikangshitsü rongrong tenzük aser parnok lima arrtsü atena aridok.

⁵¹ Saka parnok anema tenyartem jagi parnok tetsüng auyi temdok aser Ikoniai ao.

⁵²Aser Antiok nung nütsüngtemji Tanela Temeshi agi asüng aser kanga pelatep.