Read njo TENYARTEM MAPA 15 Bible Online

TENYARTEM MAPA 15 - njo bible

TENYARTEM MAPA 15

¹ Yihuda lima nungi nisung kar Antioki aru aser tamangertem dang yamai ashi, “Mosa Ozüngi tuyuba ama nenok memejeptokra nenok kümzüktsü makok.”

²Paul aser Barnaba nati iba atema parnok den kanga dang obang mapui bangsentep. Anungji Paul o Barnaba na den Antiok nung aliba tamanger kar dener Yirusalemi tua tenyartem aser tamburtem den iba mangatettep o indang jembitsü lemtet.

³Anungji arogoi parnok meinokja Foinika aser Samaria ajanga süia aludang Bendangertem temulung meyipdaktsüba indang sangoktsü, aser iba osang angashia tamangertem ajak pelatep.

⁴Parnok Yirusalem tonga arudang arogo aser tenyartem aser tamburtemi parnok pela-a agizük. Aser Tsüngremi parnok ajanga inyakba ajak indang parnoki osang agütsü.

⁵Saka Farisi telok rongnungi amangbapur kari noktak aser ashi, “Bendangertem rongnungi amangba purtemji mejeptoktsüla aser Mosa Ozüng amshitsü parnok nem ozüng agütsütsü tenüngdaktsü.”

⁶Tenyartem aser tamburtemi iba indang shisadangtsü külemi sentep.

⁷ O aika lemteper külen Peteri noktak aser parnok dang ashi, “Adianutem, kü bang ajanga Bendangertemi Osang tajung angashitsü aser amangtsü asoshi Tsüngremi nenok rongnungi akhidang ni shimtet ta nenokia meteta lir.

⁸ Aser temulungjang metetsang Tsüngremi asenok nem agütsüba ama Bendangertem nema Tanela Temeshi agüja parnok dang kuli asü.

⁹Aser tamang agi parnok mulungjang merüktetja, asenok aser bendangertem na tsüngda nung pai kecha balaka meinyak.

¹⁰Anungji kechi süngra asenoki mesüra asen tetsü-teboutemia abentsü mokoki liasü, ibaji tamangertem tekong nung pungokja kechiba tang nenoki Tsüngrem atitanger.

¹¹Saka Kibuba Yisu taochi ajanga asenok koda kümzük parnoka yamaji kümzük ta asenoki amanger.”

¹²Paul o Barnaba na ajanga kechi temaitsü-sayatenyatem aser tesüngmangtsü mapatem Bendangertem rong nung inyak iba osang sangoktsü dang telok ajongai mokorai anga-a ali.

¹³Parnoki jembibaji anener külen Yakobi yamai jembitsü tenzük, “Adianutem, kü o angang.

¹⁴Bendangertem rongnungi Tsüngrem tenüng atema nübur telok ka anitettsü asoshi koda Tsüngremi tamasa parnok semdang, iba indang Simoni ratettsüogo.

¹⁵Aser iba den ainkar otem putepa lir. Zülua aliba amato:

¹⁶ ‘Iba sülen ni meyipa arutsü aser laoa aliba Dawid süki ni yanglushitsü;

¹⁷Anungji tanüngba nisungtemi Kibubaji bushitsü, oda kü tenüng nung ajaba kintem ajaki, Kibubai aji oda ashir, shibai item ajak yanglu,

¹⁸alemli nungi meteta lir.’

¹⁹“Anungji Bendangertem rongnung Tsüngrem dangi meyipertem asenoki tim metemdaktsütsüla ta nibo angateter.

²⁰ Saka parnoki süngyanglutem külemba ajanga menendaktsüba osettem nungi, nüktapangta nungi, telensetbatem nungi, aser azü nungi pila-a alitsü asoshi asenoki parnok dangi rateta zülutsüla.

²¹Kechiyong alemli putu nungi yimti shia nung sinagogtem nung Amungnü shia Mosa Ozüng züngdakja aser sayutsüngia aruogo.”

²²Anungji tenyartem aser tamburtemi arogo ajak den, parnok rongnungi nisung shimtettsü, aser Antiok tonga Paul aser Barnaba den aotsü lemtet. Tamangertem rongnungi ajaki temulung lemtetba nisung ana, Barsaba ta ajaba Yihuda aser Sila tena yoktsü junger ta shimtet.

²³Aser parnok teka agi shiti yamai zülu: “Antiok, Siria aser Kilikia nung Bendanger tamangertem dangi tenyartem, tamburtem aser adianutemi salem yoker.

²⁴Onok nungi temelaba makai onok rongnungi nisung kari tugua, parnok o agi nenok mulung meyipshidakja nenok rongrongdaktsüogo ta onoki angashi.

²⁵Onok ajaki mulunga nisung shimtettsü aser nenok dangi yoktsü lemtet, oda onoki meimba Paul o Barnaba na

²⁶shirnoki asen Kibuba Yisu Khrista tenüng asoshi parnok taküm tenla agütsüogo.

²⁷Anungji Yihuda o Sila na, shiri parnok sasa item o kasa tebang agi ashitsü, onoki parnok yoker.

²⁸Kechiaser item tenüngdaktsü dak alaka nenok nem khuret tuluba kecha mebenloktsütsü Tanela Temeshi aser onok tsüngdang junger ta bilem.

²⁹Oda süngyanglutem dangi tenlaba nungi, azü nungi, telensetba shia nungi, aser jabujariba mesüra nüktapangta nungi pila-a liang. Item nungi nenoki pila-a lira, nenok junga alitsü. Junga liang.”

³⁰Anungji parnoki senshir külen Antioki alu. Aser parnok külemi sentepdaktsür parnoki shitiji agütsü.

³¹Shitiji parnoki azüng aser tajungshi o asoshi parnoki pela.

³²Yihuda aser Sila parnoka ainkartem asünung, parnoki adianutem dang o aika agi ajungshi, aser parnok tashi itdaktsü.

³³Aser parnoki idakji kenpiga ali aser parnoki adianutem nungi tesünep nung parnok yokertem dangi meyipa aotsü senshi.

³⁴Saka Silai idakji amungtsü lemtet.

³⁵Saka Paul aser Barnabai mapang tatsüka Antiok nung ali, aser tangar aika dena parnoki Kibuba O sayutsüngi.

³⁶Anogo ishika lir Pauli Barnaba dang ashi, “Asenoki meyipa odi aser asenoki Kibuba O sayutsüngidak yimti ajak nung adianutem koda lir parnok semdangdi.”

³⁷Barnabai parnok den Yohan, shiba dang Mark ta ajar, pa-a külemi anir onüa bilem.

³⁸ Saka Pauli pa anir aotsü memulung, kechiaser mezünga pai parnok den ochishia manidak, saka parnok Pamfulia nung toktsür pa pila-a oadok.

³⁹Anungji tena tsüngda nung temulung kanga mechitep adok aser parnok pilatsüsa aküm. Barnabai pa den Mark anir rong ka nung Kuprai ao.

⁴⁰Saka Pauli Sila shimtet aser tamangertemi Kibuba taochi dangi parnokji nungloka yutsü aser parnok pila-a ao.

⁴¹Aser pai arogotem tashi itdakja, Siria aser Kilikia ajanga ao.