Read njo TENYARTEM MAPA 16 Bible Online

TENYARTEM MAPA 16 - njo bible

TENYARTEM MAPA 16

¹Pauli Derbe-i aser Lustrai aru, kong tamanger ka tenüng agi Timoti idakji liasü. Pa tetsüji Yihudatsür tamanger ka, saka pa tebubo Grik nunger liasü.

²Pa indang Lustra aser Ikonia nung aliba adianutemi kuli junga sütetba nübu ka liasü.

³Pauli Timoti pa den anir onü, anungji pai Timoti mejeptoktsü, kechiyong parnok aotsüba tesem nungji Yihuda nunger aika liasü aser parnok ajaki Timoti tebuji Grik nunger ta meteta liasü.

⁴Aser parnok yimtitem ajanga aodang, Yirusalem nung alir tenyartem aser tamburtemi melaba tesayubatem amshitsü asoshi parnok nem amoktsü.

⁵Anungji arogotem tamang nung tashi itshia aküm aser kenüamati yongsük nung renlok.

⁶Parnoki Frugia aser Galatia temeket ajanga ao aser Asia nung oji mejembitsü Tanela Temeshi-i parnok noktang.

⁷Parnoki Misia arrtsü tonga arur, Bithuniai aotsü merang, saka Yisu Tanelai parnok dang memela.

⁸Anungji parnoki Misia meria or Troai alu.

⁹Aser aonung Paul dangi mangdang ka adok. Makedonia nunger nisung ka noktaka pa dang mepishia ashi, “Makedoniai arung aser onok yariangma.”

¹⁰Anungji Pauli mangdangji nguli idangyongjisa Tsüngremi onok Osangtajung sayutsüngitsü ajar ta angateta, onoki Makedoniai aotsü takok tashi merang.

¹¹Onoki Troa nungi apusoa rong nung ao aser indang indanga onoki Samotrakai aru aser tasüngji Niapoli atong.

¹²Aser idak nungjagi Makedonia lima nung Rom nunger yimti tulutiba[4] Onoki anogo ishika idakji amung.

¹³Amungnü ayongküm ka nung sarasademdak tesem ka lir ta onoki angashia, onoki yimti süngkhüm atena ao, aser idakji külemi sentepa aliba tetsürtem den Kibuba O jembi.

¹⁴Tiatira yimti nungi nakrema meremba sü ayoker ka, Tsüngrem külemba tetsür, tenüng agi Lidiai onok dang anga; kechiaser Pauli jembiba o angadaktsütsü Kibubai la mulung lapoktsü.

¹⁵Kodang la aser lar kinunger baptitsü, lai onok dang mepishia ashi, “Nenoki ni Kibuba dangji temulung lemteter ta ajitetra, kü kidangi atua liang.” Aser lai onok la den anir ao.

¹⁶Kenü anogo onok sarasademdaki oya alidang, temenen tanela ain aketba kilitsür kati onok ajuru, shibai ain mapa inyakba ajanga lar kibur nem tajangzük aika bener arutsü.

¹⁷Lai Paul aser onok sülen anitak aser ayimtena ashi “Item nisung Tematiba Tsüngrem tenzüker lir. Parnoki nenok dang tekümtet lenmang sayutsüngir.”

¹⁸Lai yamaji ainü dang inyak. Saka Pauli lakteta aküm, aser meyiper tanela dangji ashi, “Yisu Khrista tenüng nung la dak nungi adoktsü ni ne dang ozüng agütsür,” aser idangyongjisa ibaji la dak nungi adok.

¹⁹Saka kodang la kiburtemi parnok tajangzük angutsü lenmang mali ta ajitet, parnoki Paul aser Sila apu aser watidaki yimsüsürtem madangi parnok atsür ao.

²⁰Parnok obendangertem dangi anir arur külen parnoki ashi, “Itemi Yihuda nisungtem lir aser parnoki yimti nung rongrongdaktsür,

²¹aser koba yimsü asenok Rom nungeri amshitsü mesüra inyaktsü tim masü, itemji parnoki sayur.”

²²Telok jagi parnok anema külemi noktak aser bendangertemi parnok sü shizükja parnok dak merang ajok agi azüktsü ozüng agütsü.

²³Parnoki aiben züker külen parnok tepuokdak ayu; aser tepuokertem dang parnok jungjunga anüktsü ozüng agütsü.

²⁴Parnoki ozüng aji oda agütsür külen tepuokdak telungba nung parnok puok aser parnok tetsüng tsüngden chiok.

²⁵Saka ayatrem nung Paul aser Sila Tsüngrem dang sarasademya aser pa nüngsang ken tenya liasü, aser tepuokdak alirtemi parnok dang angaya liasü.

²⁶Aoksa-a menoknok tulu ka anok aser tepuokdak kimung ajak anokshi. Kishi ajak idangyongji lapokadok aser tepuokdak aliba nisungtem tsüngden yinzütem aser merangsen saladok.

²⁷Tepuoker tanüksang mejanga aliba sak, aser kodang kishitem lapoka angu, pai pei noklang nok atsüteter pei sasa tetepseter dang liasü, kechiaser pai tepuokdak alir ajak jena ogo ta bilem.

²⁸Saka Pauli ola tulu agi ayimtena ashi, “Ne sasa kecha tamajung tebenshi kechiyong onok yangi lir”

²⁹Tepuoker jagi milen bener arutsü asoshi ashi aser asemjena ait. Pai tetsübu nung atentena Paul o Sila na madang apudak.

³⁰Parnok anizüker pai ashi, “Tamarenertem, Kümzüktsü asoshi ni kechi inyaktsü tim?”

³¹Parnoki ashi, “Kibuba Yisu Khrista dak amangang, aser na aser ner kibong kümzüktsü.”

³²Aser parnoki pa aser par kidang alir ajak dang Kibuba O jembi.

³³Aonung idangjisa pai parnok tepuokdak nungi anizüka zübutem shitoktsü. Idangji pa aser par kibong ajonga baptitsü.

³⁴Pai par kidangi Paul aser Sila anir tua parnok madang chiyungtsü yutsü aser pai par kinunger ajak den pelatep, kechiaser pa Tsüngrem dak amanger ka aküm.

³⁵Saka kodang anepdang aküm, obendangertemi sosangtem yoka ashi, “Nisungtem to chiokang.”

³⁶Aser tepuokeri item o Paul dang metetdakja ashi, “Nenok chioktsü obendangertemi temelaba ozüng bener yokogo. Anungji tang adokang aser tesünep nung oang.”

³⁷Saka Pauli parnok dang ashi, “Onok shir Rom senso lir, onok dak tai kecha majiteti parnoki yimjak nung onok dak züka merenshi, aser onok tepuokdak ayu. Aser tang parnoki onok miima chioknür? Yamaji kodanga masü! Saka parnok yangi tonga arudakjang aser parnok sasa onok anitetdakjang.”

³⁸Idangji item o sosangtemi obendangertem nem agütsü aser parnok Rom sensotem ta angazüka parnoki tsübu.

³⁹Anungji parnoki arua parnok dang tai nangzük, aser parnoki parnok aniteter külen, yimtiji toktsür oang ta parnok dang asüngdang.

⁴⁰Idangji Paul aser Sila tenati tepuodak nungi tugua Lidiar kidangi atu; aser idakji parnoki tamangertem ajurua parnok dang tajungshi o jembi aser pila-a ao.