Read njo TENYARTEM MAPA 17 Bible Online

TENYARTEM MAPA 17 - njo bible

TENYARTEM MAPA 17

¹Parnoki Amfipoli aser Apolonia ajanga or külen, Tesalonika kong Yihuda nunger sinagog ka liasü ajagi aru.

²Pauli pei yimya ama sinagogi atu. Idakji Amungnü asemnü tashi pai parnok den Laishiba nungi bushia langzütepa liasü.

³Aser Laishiba nungi tuyua, Khristaji tim atemtsüla aser tasü nungi shia arutsü tenüngdaktsü liasü ta kuli agüja, pai ashi, “Yisu shiba ni nenok dang sangoktsür paji Khrista lir.”

⁴Parnok kar amangdakja, yimsü nung keta asenba Grik nunger telok tulu ka, aser tongtitsür aika Paul aser Sila den aden.

⁵Saka Yihuda nungertemi mokokaji aser nisung tamajung kar anitener telok ka kümteta parnoki yimtiji rongrongdaktsü aser Yasoner ki makbanga yimkong lokti dangi parnok anitettsü bushi.

⁶Saka kodang parnoki Paul aser medemertemji mangu, parnoki Yason aser adianutem kar yimti yimsüsürtem dangi atsür oa ayimtena ashi, “Item yagi alima meyipshidaktsür, aser tang parnok asen yimti-i arua lir; aser Yasoni parnok aniok.

⁷Aser parnoki Yisu ta ajaba tangar chuba ka lir ta shia Kaisar chubatiba ozüngtem anema benshir.”

⁸Aser ya angashia nisungtem aser yimti tata-sosangtem tipmetemdaktsü.

⁹Parnoki Yason aser tamangertem nungi talangzükba sen agizüker külen parnok chiok.

¹⁰Idangyongji tamangertemi Paul aser Sila ammang nung Bereai yok; parnok tonger parnoki Yihuda nunger sinagogi atu.

¹¹Tang Tesalonika nung alirtem dang nungi idaki alirtem tajungba liasü, kechiaser parnoki kanga jangrabangra mulungso agi oji agizük, aser itemji shitak asü masü ta anogo shia Laishiba nungi bushi.

¹²Anungji parnok aikati aser Grik nunger tulutsür aikati aser tebura aikati amang.

¹³Saka kodang Pauli Berea nunga Tsüngrem O sangoktsüogo ta Tesalonika nung alir Yihuda nungertemi meteta aküm, parnok ajagi arur teloktemji arimesoa rongrongdaktsü.

¹⁴Idangyongji adianutemi Paul tzüyimküm tashi yokadok; saka Sila o Timoti nabo idakji ata.

¹⁵Saka Paul meinoktsürtemi pa Athen tashi anir aru, aser Sila o Timoti na dang pa dangi takok tashi yakta arung ta shir parnok pila.

¹⁶Tang Pauli parnok Athen nung ata-a alidang, yimtiji süngyanglutem agi sünga aliba angu nung pa kanga jashi.

¹⁷Anungji sinagog nung Yihuda nungertem aser yimsü nung keta asenertem den aser ano kenüamati watidak pa den ajurutepertem den pai kuli süa o toktepa langzütep.

¹⁸Epikurion aser Stoik tesayurtem kari pa den ajurutep. Kari ashi, “Iba tebang liliba memetetba nisungi kechi shinür?” Tangar kari ashi, “Pa Bendanger tsüngremtem tesayur ka südi; kechiaser pai Yisu aser shia aruba indang sayutsüngir.”

¹⁹Anungji parnoki pa Areopaga ta ajaba tenemi yimti mungdang tsüngdangi anir atu aser asüngdang, “Nai jembiba tesayuba tasen ya kechiar onoki metetnür,

²⁰kechiaser tesüngmangtsü o kar nai onok dangi bener arur. Anungji itemi kechi tetezüar onoki metetnür.”

²¹Kechiyong Athen nungertem aser idakji munga alir aenertem ajak anogo tepiyong kecha mapa meinyak, saka o tasen ka jembitsü mesüra angashitsü dang bilema aser yongyaseta amung.

²²Pauli Areopaga tenem mungdang madang noktak aser ashi, “Athen nüburtem, nenok yimsü nung kanga dang takang ta ni ajiteter.

²³Kechiaser ni nenok tekülemba osettem repranga senzüdang, ‘MEMETETBA TSÜNGREM KA ATEMA’ ta zülur tenladak ni angu. Anungji nenoki kechi memeteti külemer, ibaji ni nenok dang sangoktsür.

²⁴Alima aser idakji aliba ajak yangluba Tsüngrem, pa anüng aser alima madak Kibuba asünung teka agi yangluba tenla kitem nung pa malir.

²⁵ Mesüra pa langka tenüngdaktsü aka ama, nisung teka agi pa metenzüker, kechiaser paiang ajak nem taküm tangula, aser oset ajak agütsür.

²⁶Alima ajak nung lidaktsütsü asoshi meimchir kin shiaji Pai nisung ka ajanga adokdaktsü, aser parnok asoshi tim mapangtem aser talidaktem pai lateta yutsüogo,

²⁷Tsüngremi item ajak ya meimchiri pa bushitsü aser ngudaktsütsü asoshi inyak. Aji saka paji asenok shia nungi talangka nung pilaa oa mali.

²⁸Kechiaser ‘pa dak asenok alir, arakzür, aser taküm alir.’ Nenok pei ken mejemer kari ashi ama: ‘Kechiaser atangji asenoka pa chirtem lir.’

²⁹Anungji asenok Tsüngrem chirtem asünung Tsüngremji hon, taribi mesüra lung, oda nisung tesangra teka agi angentetba ama asenoki mebilemtsüla.

³⁰Anungji memetetba mapangji Tsüngremi odang toktsü, saka tangbo ajaklen nisung ajaki temulung meyiptsüla ta pai ozüng agütsür.

³¹Kechiaser pai shimtetba nisung ka agi temeshiba nung alima ajonga o bendangtsü asoshi pai anogo ka atemzükogo aser iba indang pai tasü nungi shia arutsü nung nisung ajak dang kuli agütsüogo.”

³²Saka tasü nungi shia aruba indang kodang parnoki angashia, kari atala-a menütsü, saka tangar kari ashi, “Iba indang na nungi ano khen onoki angatsü.”

³³Anungji Pauli parnok rongnungi pila-a ao.

³⁴Saka nisung kari pa den asem aser amang. Parnok rongnung Areopaga Mungdang züngsem ka Dionusia aser tetsür ka tenüng agi Damari, aser parnok den tangara liasü.