Read njo TENYARTEM MAPA 19 Bible Online

TENYARTEM MAPA 19 - njo bible

TENYARTEM MAPA 19

¹Kodang Apolo Korint nung liasü, Pauli temaba linük tiyong ajanga süia oa Efesai aru aser idakji pai nütsüngtem kar ajurua,

²pai parnok dang asüngdang, “Kodang nenoki amang, nenoki Tanela Temeshi agizüker ama?” Parnoki pa dang langzü, “Tanela Temeshi ka lir ta asübaji onokibo mangashi-i liasü.”

³Idangji Pauli ashi, “Ajangla nenok kechi nung baptia liasü?” Parnoki langzü, “Yohani baptitsüba nung.”

⁴Pauli ashi, “Yohani nüburtem dang pa sülen aruba, oda Yisu dak amangtsüla ta shia temenen nungi temulung meyipertem baptija liasü.”

⁵Kodang parnoki ya angashi Kibuba Yisu Khrista tenüng nung parnok baptitsü.

⁶Aser Pauli pa teka agi parnok dak nemet, aser parnok daki Tanela Temeshi ait, aser parnoki tanga oshi agi jembi aser shinmeso.

⁷Parnokji ajak agi nisung terana shi liasü.

⁸Tang Pauli sinagogi atu aser Tsüngrem yimli indang o toktepa, aser mesüzüktepa ita asem tashi pai tasü-ita jembia liasü.

⁹Saka kodang kar temulung temerang aser mamangi aküm aser telok ajonga matsüngdang Kibuba Lenmang indangji mejungi jembi, Pauli nütsüngtem anir parnok nungi pila-a oadok aser pai künüamati Turana mungdang ki nung o toktepa liasü.

¹⁰Yamaji Küm ana rentetdaktsü, anungji Asia nung alirtem ajak Yihuda nunger aser Grik nungertem anapronglai Kibuba O angashi.

¹¹Paul teka ajanga Tsüngremi tesüngmangtsü temaitsütem balaka inyak.

¹²Oda Pauli amshiba romal aser taidokba sü shirangertem dangi bener ao aser parnok dakji kongshidang parnok tashitak anebadok aser temenen tanelatema adokadok.

¹³Saka temenen tanelatem aridoka senzüba Yihuda nunger kari temenen tanelatem aketbatem madak Kibuba Yisu tenüng nung ayimtentsü meranga ashi, “Pauli sayutsüngiba Yisu tenüng nung adoktsü ni ozüng agütsür.”

¹⁴Yihuda nunger temaba putir ka tenüng agi Skeua, shiba jabaso tenet liasü aser parnoki yamaji inyaka liasü.

¹⁵Idangji temenen tanelai langzü. “Ni Yisu metet aser ni Paul-a metet, saka nenok shir?”

¹⁶Idangji temenen tanela aketba nisung jagi parnok dak pungloka parnok ajak akok aser parnok dak yamaji tashi amshi nung parnoki iba ki nungjagi zübu keter aser mangsa jena ao.

¹⁷Ibai Efesa nung alir Yihuda nunger aser Grik nungertem ajaki meteta aküm, aser parnok ajaki tsübuadok aser Yisu tenüng tali uludaktsü.

¹⁸Parnok rongnung tamangertem aikati parnoki inyakba yimjak nung nangzüka aser sangokja aru.

¹⁹Aser ainket mapa inyakdangertem aikati parnok kaket külemi bendena nisung ajak madang rongtok. Parnoki iba jenjangji züngdang aser senpak meyirijang tenem züngtet.

²⁰Aji oda Kibuba O kanga züin aser takok ango.

²¹Item süir külen, Pauli Makedonia aser Akaia ajanga aotsü aser idak nungjagi Yirusalemi aotsü pei mulung nung lemteta liasü. Kechiaser pai ashi, “Ni ajagi or külen, ni Rom semdangtsüla.”

²²Pa tenzükertem rongnungi nisung ana, Timoti aser Erastra Makedoniai yok, saka pabo Asia nung kenpiga mungzük.

²³Iba mapang nungji Efesa nung Kibubar Lenmang atemaji rongrong tulu adok.

²⁴Kechiaser taribi atsünger ka tenüng agi Demetriai Artema taribi tenladak yanglu aser pai mapa inyakertem asoshi tajangzük kanga tulu bener arutsü.

²⁵Pai kasa mapa inyakertem parnok ajak külemi sentepdaktsü aser pai ashi, “Nisungtem, iba mapa ajanga asenok rongsen renlokdaktsür ta nenoki metet.

²⁶Saka iba Pauli Efesa nung dang masü, Asia ajonga nung teka agi yangluba tsüngremji khenyongi tsüngremtem masü ta shia mesüzüka nisung aika meyipa odaktsüogo ta nenoki angur aser angashiogo.

²⁷Asenok mapa ya maksü aser lendong nung dang ali masü saka tsüngrem tulula Artema tenla kia mesüzüktsü, aser la shiba Asia aser alima ajongai külemer, la uluba aser tobur ajungba samatsütsü.”

²⁸Kodang parnoki ya angashi parnoki kanga dang ain adok aser ayimtena ashi, “Efesa nunger Artemaji tulu lir.”

²⁹Idangji yimtiji rongrong agi asüng; Paul aenlen senzüdang anitakba medemertem Makedonia nunger Gaya aser Aristarka Efesa nungeri pua aru aser yimtisangertem watidak jagi ajak külemi asemtepa nungten.

³⁰Pauli yimkong sentendak jagi ia ajurutepnü saka nütsüngtemi pa nungtem.

³¹Asia nungi yimsüsürtem shir pa den metetepa tembar küma liasü, parnokia pa dang asayadak jagi maitsüla ta mepishi.

³²Idangji parnok rongnung kari o ka aser kari o ka ta ayimten, anungji lokti sentenji rongrongshishi nung liasü aser parnok idakji kechiba sentep aji timba kati memeteti liasü.

³³Yihuda nungertemi Alexander tejakleni nungteta yuja parnoki pa telok dangi anitet. Aser Alexanderi teka agi nungtema yimkong dang temeten o jembidi ta liasü.

³⁴Saka kodang parnoki paji Yihuda nunger ka ta ajitet, ajaki obang ka sür ghonda ana shi ayimtena ashi, “Efesa nunger Artemaji tulu lir.”

³⁵Kodang yimti tezülubai telokji ajemajema kümdaktsü, pai ashi “Oh Efesa nungertem, Efesa nunger yimtiji Artema tulula tenla ki anükba aser süngyanglu noksaji kotak nungi alu ta memetetba shiba ali?

³⁶Item indang ajaki temetet dang asünung nenok ajak ajemajema alitsü tim aser kecha aritepa meinyaktsüla.

³⁷Kechiaser tenla kitem nungi oset rakzükraktem masürtem mesüra asen tsüngrem matalartem nisung itemi nenoki yagi anir aruogo.

³⁸Anungji Demetria aser pa den mapa inyakertemi nisung kar anema o kara, obendangdak lapoka lir aser obendangertem lir. Anungji parnok o parnok na taitsüba bener arudakjang.

³⁹Saka nenoki o tanga indang bushinüra, ajibo teti mungdangdak bendangtsü.

⁴⁰Kechiaser tanü rongrong indang o tetenzük kecha maka nung, atangji onok anema tai agütsütsü lendong nung lir. Iba rongrongshishi sentepba indang onoki kecha meshitettsü.”

⁴¹Yamaji pai jembir külen, sentenji senshidaktsü.