Read njo TENYARTEM MAPA 2 Bible Online

TENYARTEM MAPA 2 - njo bible

TENYARTEM MAPA 2

¹Kodang tenemnübuba Benjong anogo atong, parnok ajak külemi tesem ka nung sentepa liasü,

²aser aoksa dang kotak nungi mopung tesashi aonba ama ola aru, aser iba jagi parnok mena alidak ki ajak asüng.

³Mi jangruba temeli ama parnok dangi adok aser aji lemsar parnok shia dak amenlok.

⁴Parnok ajak Tanela Temeshi agi asüng, aser Tanelai parnok nem jembitsü tashi agüja bendanger oshitem nung parnoki jembimeso.

⁵Tang anüng kübok aliba kin ajak nungi aruba, yimsü nung keta asenba Yihuda nungertem Yirusalem nung anena liasü.

⁶Kodang iba olaji aru, telokti külemi sentep aser süngmangtep, kechiaser nisung shiai pei oshi nung jembia angashi.

⁷Parnok ajaki aoksa aser süngmanga ashi, “Ajiang, item tejembir ajak Galil nunger masü no?

⁸Ajangla kodaser asenok shiai asen pei pei oshi nung angashir?

⁹Parthia nungertem, Media nungertem, Elam nungertem, Mesopotamia, Yihuda, Kapadokia, Ponta, Asia,

¹⁰Frugia, Pamfulia, Ijip, aser Kurini meketa aliba tesem kar nung alirtem, aser Yihuda nungertem, aser Bendangertemi Yihuda yimsü amangertem, Rom nungi tesemdangertem,

¹¹Kreta aser Arabia nungertem, Tsüngremer tesüngmangtsü mapatem asenoki asen pei pei oshi nung parnoki jembia angashir.”

¹²Parnok ajaki süngmang aser rata-a kati ka dang ashi, “Ya kechi tetezü?”

¹³Saka tangartemi atala-a ashi, “Parnok yi lanu agi mesepogo.”

¹⁴Saka Peteri terka den noktaka pai ola adoka parnok dang ashi, “Yihuda nungertem aser Yirusalem nung alirtem ajak, nenok nem ya metetdaktsünür, aser tenarong tena kü o angang.

¹⁵Nenoki bilema aliba amaji, item nisungtem ya yi agi memesep kechiaser ya ano tuku baji dang lir.

¹⁶ Saka iba indang Yoel ainkari yamai jembia kar:

¹⁷‘Tsüngremi ashi, tatem anogo nung meimchir ajak nem ni kü nela meküploktsütsü. Aser ner jabaso aser jalatemi shintsü; aser ner asangurtemi mangdang angutsü ner tamburtemi pungmang pungmangtsü.

¹⁸Hau, item anogo nung kü kilirtem aser kilitsürtem madak, kü nela meküploktsütsü aser parnoki shintsü.

¹⁹Temalen anüng nung tesüngmangtsütem, azü, mi aser mokozü tangula ni sayutsü.

²⁰Iba tulu aser sentsüwangshi Kibubar anogoji arudang, anüji tammang kümdaktsütsü aser itaji azü ama merema kümdaktsütsü.

²¹Aser idangji shirisa Kibuba tenüng nung jadir kümzüktsü.’

²²“Israel purtem item o angang! Mapa tulu aser tesüngmangtsü aser temaitsü agi, Tsüngremi nungtettsüba Nazaret nunger Yisui nenok dang inyaka aser nenoki pei sasa metetba ama item nenok rongnung Tsüngremi pa ajanga inyak.

²³ Tsüngremer tasatetba aser tamasa nungi metetjema aliba agi pa ozüng memetetertem teka agi kangki nung nenoki südaktsütsü asoshi bendanga agütsü.

²⁴Saka Tsüngremi tasü timtem salar pa shia arudaktsü, kechiaser tasüba agi pa sottsü tamakoktsü liasü.

²⁵ Kechiaser Dawidi pa indang ashi, ‘Kibubaji teti ni kü jakdang angu, kechiaser pa kü tajichilen lir; aji asünung ni manokshi-daktsütsü.

²⁶Aji asünung kü mulung pela-a liasü, aser kü melia kanga pela. Ano kü temanga teimla nung alitsü;

²⁷Kechiaser kü taküm tasü yim nung nai metoktsütsü, mesüra Ne Temeshiba nem shizüka aobaji mereprangdaktsütsü.

²⁸Taküm lenmangtem nai kü dang sayu, ne tsüngdang nai ni tepela agi süngdaktsütsü.’

²⁹“Adianutem, tebuti Dawid indang nenok dang indang indanga shitet: pa asü aser arem aser pa leper tanü tashi asenok den lir.

³⁰ Pa ainkar ka liasü, aser pei semchirtem rongnungi ka pa chuba menden nung mendaktsütsü ta Tsüngremi pa dang nangzükba pai meteta liasü,

³¹aji apiteta Khrista shia aruba indang pai jembi, oda pa tasü yim nung metoktsütsü mesüra pa temang shizüka moudaktsütsü.

³²Iba Yisu, Tsüngremi shia arudaktsüogo. Onok iba atema kulisürtem lir.

³³Anungji Tsüngrem tajichilen ajungketa, aser Tebu nungi Tanela Temeshi tenangzükba agizüker, nenoki anguba aser angashiba ya pai meküploktsüogo.

³⁴ Kechiaser Dawid kotaki ajungketa anir matu, saka pai pa sasa ashi, ‘Kibubai kü Kibuba dang ashi, Kü tajichilen menang,

³⁵Oda ni ne tsükchirtem ne tsüng kübok mayu tashi.’

³⁶“Anungji iba Yisu shiba nenoki kangki nung tepset, Tsüngremi paji Kibuba aser Khrista kümdaktsü ta Israel purtem ajongai metetang.”

³⁷Kodang parnoki ya angashi, parnok mulungjang nung kongshi aser parnoki Peter aser tanüngba tenyartem dang asüngdang, “Adianutem, onoki kechi inyaktsüla?”

³⁸Peteri parnok dang ashi, “Temulung meyipang, aser nenok nisung shia pei temenen atoktsü asoshi Yisu Khrista tenüng nung baptiang; aser nenoki Tanela Temeshi sempetji agizüktsü.

³⁹Kechiaser nenok aser nenok chirtem aser talang nung alirtem ajak, aser Kibuba asen Tsüngremi kwika pa dangi jadir, paikaji asoshi tenangzükbaji lir.”

⁴⁰Tanga o aika agi Peteri kuli asü aser parnok dang ajungshia ashi, “Iba tekülak putu dangi temerenshi arutsü aliba nungi nenok sasa kümzüka liang’

⁴¹Idangji pa o agizükertem baptitsü aser panüji nisung meyirijang asem shi parnok rongnung zünglok.

⁴²Aser tenyartem tesayuba, telungjem, amtsük sangsaba aser sarasademba nung parnoki akang akanga ali.

⁴³Aser nisung shia tetsübu agi asüng, kechiaser tesüngmangtsütem aser temaitsütem aika tenyartem ajanga inyak.

⁴⁴Tamanger ajak külemi ali, aser oset ajak arok meyong aküm.

⁴⁵Parnoki parnok akaba osettem ayok aser nisung shia nüngdak yari parnoki ajak nem lemsa-a agütsü.

⁴⁶Aser kenüamati temulung ka sür parnoki tenla kidang sentep. Kodang kidang amtsük sangsa, tepela aser tagütsünü mulungsentsü agi parnoki chiyungtsü chiyung;

⁴⁷aser Tsüngrem tenüng sanga nisung ajaki parnok dang junga bilem. Aser kenüamati kümzükba purtemji Kibubai parnok telok rongnung züngsemdaktsü.