Read njo TENYARTEM MAPA 20 Bible Online

TENYARTEM MAPA 20 - njo bible

TENYARTEM MAPA 20

¹Efesa nung rongrongji anener külen, Pauli nütsüngtem tajai yok aser pai parnok dang tajungshi, aser tepila o ashi aser pa Makedonia leni ao.

²Pai item linüktemji ajanga süi aser parnok nem tajungshi o aika agütsür külen, pai Grik limai aru,

³kong pai ita asem tashi amung. Kodang pai Siriai rong nung odi ta bilema liasü, Yihuda nungertemi pa anema tasa ka asaba pai lazük; anungji pai Makedonia ajanga aotsü mulungtet.

⁴Berea nunger Pira chir Sopater, Tesalonika nunger Aristarka aser Sekunda, Derbe nunger Gaya, Timoti, Asia nunger Tukika aser Trofima, parnok ajak Asia tashi pa sülen anitak.

⁵Parnok jelia oa Troa nung onok ata-a liasü.

⁶Piyazü Meinokba Benjong süir külen, onoki Filipi nungi rong nung ao, aser anogo pungunü nung onoki parnok dangi Troai aru, idakji onoki anogo tenetnü amung.

⁷Deobarnü onok amtsük sangsatsü külemi sentepa alidang, Pauli asüngji pilatsü bilema, parnok dang o jembia kuli asü aser pa o jembibaji ayatrem tashi manen.

⁸Aser onok külemi sentepdak temaba taktang nungji milen aika liasü.

⁹Idakji asangur ka tenüng agi Eutika, kichiba nung mener kanga anünüa, aser Pauli talangka o atsülanga odaka nung pa amua oadok. Pa amua oadoker taktang asembuba nungi tsük aser tasü dang bener atu.

¹⁰Idangji Pauli alu aser pa dak azüit aser shi, “Nenok temulung tatem ma, kechiaser pa dak ano taküm lir.”

¹¹Aji shir külen pai meyipa atu aser amtsük sangsa aser achi. Aser ammang tepiyong oda anepdang anü adok tashi pai parnok den jembir külen pai parnok nungi pila.

¹²Parnoki tanurbaji taküm anir aru aser parnok kanga dang sünepa aküm.

¹³Idangji onoki rong jagi jelia ia, Asiai aotsü apuso aser idakji Paul anioktsü bilem, kechiyong pa tetsüng lenmangi aotsü yamaji pai renema liasü.

¹⁴Kodang pai onok Aso nung ajuru, onoki pa aniok aser Miteleni aru.

¹⁵Idak nungjagi rong nung oa asüngji Kios anasa atong aser ano tananüji Samos-i arua anogo ka süir külen onoki Miletai aru.

¹⁶Kechiyong Asia nung mapang meindoktsüsa Pauli Efesa meria rong nung aotsü mulungteter liasü. Takoktsü süra, Tenemnü Benjong nungji Yirusalem nung alitsüsa pai ilunga liasü.

¹⁷Saka Mileta nungi Pauli pa dangi arogo tamburtem tajai Efesai yok.

¹⁸Kodang parnok pa dangi aru pai parnok dang ashi, “Ni Asia nung kü tsüng ajemokba mezüngnü nungi kodasa liasü nenoki metet,

¹⁹aser kanga ajemalu den, nüktzü ayimba den aser Yihuda nunger tasa ajanga kü dangi timtem aruba den, kodasa ni Kibuba tenzük nenoki nenok sasa metet.

²⁰Nenok asoshi kechisa tajangzük liasü aji nenok dang sangoktsütsü ni kodanga menungnangi liasü, aser yimjak nung aser kibok nung ni nenok dang sayua liasü

²¹Tsüngrem dangi temulung meyiptsü aser asen Kibuba Yisu Khrista dak amangtsü asoshi Yihuda nungertem aser Grik nungertem telok anaprongla dang ni kuli agüja liasü, ajia nenoki metet.

²²Tang ajiang, kü dak kechi ataloktsü aji memeteti Tanelai anungba agi Yirusalemi aor.

²³Saka talenba aser rishikangshiba agi ni atadagi ta Tanela Temeshi-i yimti shia nung kü dang kuli agütsür ta ni metet.

²⁴Saka ni kü alizüng tongtettsü asoshi aser Tsüngrem taochi Osangtajung indang kuli agütsütsü ni Kibuba Yisu nungi tenzüktsü agizükba renemtsü asoshi inyaker. Ni kü takümji kü sasa senti ta sükshia mali.

²⁵“Aser tang ajiang, nenok shir rongnung Tsüngrem Yimli indang ni sayutsüngia senzü, nenok ajaki joko kü tejak mangutsü ta ni metet.

²⁶Anungji nenok rongnung kar tanela tesamadaki orabang aji kü khu masü ta ni tanü nenok dang kuli asür.

²⁷Kechiaser ni Tsüngremer shisatsü ajak indang nenok dang menungnangi dang sangokja aruogo.

²⁸Kibubai pei zü agi alizükba arogo mesütsü asoshi, kechi nung Tanela Temeshi-i nenok sannükertem asütsü shimtet: iba san telok aser nenok pei taküm asoshi kümdangang.

²⁹Ni oadoker külen tesashi tzünütem nenok dangi aittsü aser parnoki san telokji meirutsüiang metoktsütsü ta ni metet.

³⁰Aser tiyazü o jembir nisung kar nenok rongnungisa adoktsü aser parnoki nütsüngtem mashileni anir aotsü mapang arutsü.

³¹Aji asünung küm asem tashi nenok nisung shia dang nüktzü yima ammang sangwa metitemi ni sayua liasü ta bilemteta nenoki kümdanga liang.

³²“Tsüngrem aser pa taochi o koba temeshitetba pur rongnung nenok nem senmang agütsütsü aser nenok indaktsütsü, iba madang tang ni nenok nungloka yutsür.

³³Ni nisung shinga meyong taribi, hon mesüra sobutsü menükshi.

³⁴Item teka yagi kü den alirtem asoshi aser kü nüngdaktem asoshi tenzüka aruogo ta nenoki nenok sasa metet.

³⁵Yamaji inyaka nenoki tashi maiter dang yaritsü, aser Kibuba Yisui ashiba otem bilemtettsü, kechiyong Kibubai yamai ashir, ‘Tagizükba dang nungibo tagütsübaji tali temoatsüba lir.’ Iba tatishitsüji nenok dang teti sayua liasü.”

³⁶Yamaji jembir külen pai apudak aser parnok ajak den sarasadem.

³⁷Idangji parnok ajaki kanga jebtepa liasü; aser parnoki pa dak azüit aser tebang mesep,

³⁸aser parnoki pa jak tanaben mangutsü ta ashiba nungji talisa parnok temulung shiranga liasü. Aser parnoki pa rong tashi meinoktsü.