Read njo TENYARTEM MAPA 22 Bible Online

TENYARTEM MAPA 22 - njo bible

TENYARTEM MAPA 22

¹“Adianutem, aser obalatem, nenok madang kü temeten o ni shidi angangma.”

²Kodang pai Ibri oshi nung parnok dang jembiba angashi, parnoki tali mokorai aküm, aser pai ashi,

³“Ni Yihuda nisung ka lir, Kilikia nung aliba Tarsa yimti nung ni yintet aser Gamaliel tsüngdang aser asen tetsü-teboutemi akanga ametba ozüng nung ni sayutet, aser tanü nenok ajak ama nia Tsüngrem asoshi kanga jangrabangra liasü.

⁴Iba Lenmang nung shiri anitaker, parnokji alener tepuokdak yuja oda tebur o tetsür na tasütsüsa ni rishikangshia liasü.

⁵ Iba indang temaba putir aser tamburtem ajongai kü kuliji shitak ta sütet. Item tamburtem nungisa ni temelaba shititem agizük aser Damaska nung alirtem alena bener arua Yirusalem nung parnok merenshitsü asoshi ni Damaskai ao.

⁶“Ni aodang Damaska atongtsü anasa lia, anüngdang aoksa dang ni meketa anüng nungi tesangwa tulu ka yaloktsü.

⁷Idangji ni ali nung lao aser ola kati kü dang jembia angashi, ‘Saul, Saul, kechiba nai ni rishikangshir?’

⁸Aser ni langzü, ‘Kibuba, na shiba?’ Pai kü dang ashi, ‘Ni Nazaret nunger Yisu shiba nai rishikangshir.’

⁹“Kü den alirtemi tesangwaji atangji angu, saka shibai kü dang jembia liasü pa olaji parnoki mangashi.

¹⁰Ni asüngdang, Kibuba, ‘ni kechi inyaktsü?’ Kibuba jagi kü dang ashi, ‘Aramesoang, aser Damaskai iang. Na asoshi kechisa inyaktsü atemzüka lir item ajak indang idakji ne dang ashitsü.’

¹¹Kodang iba sentsüprang tesangwa agi ni angutsü asoshi mokoki aküm, kü den alirtemi kü teka nung amer Damaskai ni anir ai.

¹²“Ozüng nung melaba ama inyakba yimsü nung keta asenba nisung ka tenüng agi Anania, Yihuda nunger ajaki kanga sanga jembiba nisung ka,

¹³kü dangi aru. Pai ni anasa noktak aser ashi, ‘Adianu Saul, tanaben nguang.’ Iba mapang nungisa ni angu aser pa dak ranglok.

¹⁴Aser pai ashi, ‘Asen tetsü-teboutem Tsüngremi pa mulungba metettsü aser Temeshibaji angutsü aser pa tebang o shitakji angashitsü na shimtetogo.

¹⁵Kechiaser nai kechisa nguogo aser angashiogo iba indang nisung ajak madang pa asoshi na kuli asütsü.

¹⁶Aser tang kechiba nai menua alitsü? Aramesoang, aser pa nüng nung ja-ang; baptiadokang aser ne menen shitokadokang.’

¹⁷“Kodang ni Yirusalemi meyipa aru aser tenla kidang sarasadema liasü, idangji ni mangdangi ao,

¹⁸aser Kibuba, angu, aser pai kü dang ashi, ‘Ilungang aser Yirusalem nungi yakta oang, kechiaser nai ni atema kuli asüba parnoki magizüktsü.’

¹⁹Ni langzü, ‘Kibuba, sinagog shia nung ne dak amangertem ni parnok tepuokdak puoka liasü aser parnok dak azük ta parnoki metet.

²⁰Aser kodang ne kulisür Stefan zü tokshi nia anasa noktaker aji shitak ta shia parnok sema liasü aser pa tepsetertem, süoshi ni nüka liasü.’

²¹Aser Kibubai kü dang ashi, ‘Oang, kechiaser talangi Bendangertem dangi ni na yoktsü.’ ”

²²Iba o tashi dang parnoki pa dang anga. Aser parnoki ola tulu agi ayimtena ashi, “Ibala nisungbo alima nungi anienadokang, kechiaser pa taküm alitsü metemsü.”

²³Parnoki ayimtena parnok süoshi temshia aser anüngleni auyi paketa yoka ao,

²⁴aser meyirijang madak tanishibai kechisü nung parnoki pa anema ayimten aji metettsü asoshi, aser pa dak züka o asüngdangtsü asoshi, pa mitsai anir atutsü ozüng agütsü.

²⁵Saka kodang parnoki pa shiküp lisü agi alen, Pauli anasa noktaka aliba noklang madak tanishiba dangji ashi, “Rom senso ka shiba nem tai magütsü sür pa dak nai areptsü ozüng nung keta lir ma?”

²⁶Kodang noklang madak tanishibai ya angashi, pai meyi madak tanishiba dangi ao aser pa dang ashi, “Nai kechi inyakdi ta ali? Kechiyong iba nisung ya Rom senso lir.”

²⁷Anungji meyi madak tanishiba jagi arua Paul dang asüngdang, “Kü dang shiang, na Rom senso ama?” Pauli langzü, “Hau.”

²⁸Idangji meyi madak tanishibai ashi, “Sen jenti agi-ang ni iba senso alizük.” Idangji Pauli langzü. “Saka nibo tasodang nungi Rom senso ka lir.”

²⁹Idangyongji shiri Paul dang o asüngdangtsü liasü, parnoki idangyongji pila-a ao, aser meyi madak tanishibai Paul Rom senso ta meteta pai Paul merenshiba atema tsübua bilem, kechiaser pai Paul alen.

³⁰Saka kechiba Yihuda nungertemi pa dak tai nungloktsü aji jangja-a metettsü asoshi tasüngji pai Paul sala, aser puti-ungertem o Mungdang nung züngsem ajak külemi senteptsü pai ozüng agütsü, aser Paul anizüka parnok madang yutsü.