Read njo TENYARTEM MAPA 24 Bible Online

TENYARTEM MAPA 24 - njo bible

TENYARTEM MAPA 24

¹Pungunü lir külen tamburtem aser obendanger ka tenüng agi Tertula aser temaba putir Anania Kaisariai alu aser parnoki Paul anema governor dangi o aben.

²Kodang Paul aja, Tertulai pa aitsümesoa ashi, “Tamarener Felik, na ajanga onoki tesünep tulu angu nung aser nai anebaluba agi iba kin asoshi tamajungbatem metongshia kümdaktsü nung,

³onoki teti iba lenmang atema ne nem tetushi agütsür.

⁴Saka ano na melakdaktsütsü asoshi nai onok o ishika yimlibilema angatsü mepishir.

⁵Kechiaser iba nisung ya minprung agütsüba nisung ka aser alima ajonga nung Yihuda nunger rongnung rongrongshishi adokdaktsür nisung ka, aser Nazaren telok rongnung leniba ta onoki ngua aruogo.

⁶Iba dakji alaka pai tenla ki menendaktsütsü merang, aji asünung onoki pa apu aser onok ozüng amato onoki pa o bendanger.

⁷Saka meyi madak tanishiba Lusia aru aser tashiyim agi pai onok ket nungi anizüker ao.

⁸Aser pa aitsürtem ne dangi arudaktsütsü ozüng agütsü. Kechisünung onoki pa aitsü, item ajak ya nai ne sasa pa atitangba agi metettsü.”

⁹Aser Yihuda nungertemi itemji shitak ta shia taitsüba o nungji asem.

¹⁰Kodang governori Paul dang jembitsü asoshi tuyu, pai langzü, “Küm aika iba kin asoshi nai ochi obendang agüja aru ta ni metet, anungji tang ne tsüngdang ni kü temeten o jembitsü pelar.

¹¹Kechiaser ni Yirusalemi atuba anogoji tanü agi anogo terana dang süiogo ta nai metettsü.

¹²Tenla kidang süshia, sinagog nung süshia aser yimti nung süshia ni shinga dena bangsentepa mesüra telok rongrongdakja parnoki kodanga munguka.

¹³Taitsüba kechisa parnoki tang ni anema ne dangi bener arur, parnoki aji ochi kuli ta meshitettsü.

¹⁴Saka Ozüng nung aliba otem ama, aser ainkartem kaket nung kechisa zülua ali item ajak amanga parnoki koba dang tiyazü telok ta ajar iba lenmang ama ni asen tsüraburtem Tsüngrem külemer ajibo ni ne dang nangzüker.

¹⁵Temeshipurtem aser temenen purtem anaprongla shia arutsü ta parnoki amangba amaji nia Tsüngrem dak amanger.

¹⁶Aji asünung Tsüngrem aser nisung tsütsü mulungsentsü tajung akatsü asoshi nia kü sasa teti meranger.

¹⁷“Tang küm ka renteter külen, kü kin asoshi sempet aser tenla bener arutsütsü ni aru.

¹⁸Ni temeshitetba mapa agir külen item agüja alidang, parnoki ni tenla kidang angu. Kü den telok mali asü mesüra rongrongba kecha mali asü. Saka Asia nungi Yihuda nungertem kar idakji liasü.

¹⁹Parnok ni anema taitsüba langka lira ne madangi arua ni aitsütsüla.

²⁰Mesüra idaki alirtem dang ni parnok mungdang madak noktak dang kechi taisa parnoki angu aji shidakjang.

²¹Ni noktaker parnok rongnung tasürtem shia arutsü ta ayimtenba atema dang tanü ni ne tsüngdang obendang dak noktaka lir.”

²²Saka Feliki Lenmang indangji junga meteta alinung, pai parnok dang ashi, “Kodang meyi madak tanishiba Lusia aludir, nenok o ni bendangtsütsü.”

²³Aser noklang madak tanishiba dang Paul tepuokdak nüka ayutsüla ta pai ozüng agütsü. Saka pa sünütsü südaktsütsüla aser pa tembartemi pa nüngdak ajak nung yaritsü tesongtem ta pai mela.

²⁴Saka anogo kar süir külen, Felik aser pa kibutsü, Yihudatsür Drusila den külemi aru aser Paul jaoka Khrista Yisu dak amangba indangji pa nungi anga.

²⁵Aser kodang pai temeshi aser pei sasa azüokba aser tarutsü obendangba indang kuli agüja jembi, Felik kanga tsübuadok aser pai langzü, “Tan asoshibo odang oang; mapang tajung ka adokdang ni na kü dangi jadi.”

²⁶Pauli pa nem sen agütsütsü ta Feliki imla-a liasü; aji asünung pa aiben jar pa den jembia liasü.

²⁷Saka kodang küm ana rentet, Porkia Festai Felik melen. Aser Yihuda nungertem peladaktsütsü asoshi, Feliki Paul tepuokdak toktsü.