Read njo TENYARTEM MAPA 25 Bible Online

TENYARTEM MAPA 25 - njo bible

TENYARTEM MAPA 25

¹Kodang Festai iba lima atong, anogo asem lir külen pai Kaisaria nungi Yirusalemi atu.

²Puti-ungertem aser Yihuda nunger tongtibang nisungtemi pa dang Paul anema o metetdaktsü,

³aser Paul Yirusalemi jar arutsü parnoki pa dang mepishia meshizük, kechiyong lenmang nung pa tepsettsü parnoki tasa renema liasü.

⁴Aji saka Festai langzü, “Paul Kaisaria nung puoka lir aser kobi meli-i nia ilenjagi aotsü.

⁵Nenok tanishirtem kü den külemi Kaisaria tonga arudakjang, aser Paul dakji langka tai lira, parnoki pa anema taitsüba bener arudakjang.”

⁶Festai parnok den anogo ti mesüra ter munger külen, pai Kaisariai alu. Tananü pai obendangdak amen aser Paul anir arutsü ozüng agütsü.

⁷Aser kodang pa aru Yirusalem nungi aluba Yihuda nungertemi pa meketa noktaker ochi ta sayutsü makokba otem aika pa anema bener aru.

⁸Idangji Pauli pei temeten o yamai ashi, “Yihuda nungertem ozüng anema süshia, tenla ki anema süshia, mesüra Kaisar anema süshia ni tai kecha memena.”

⁹Saka Festai Yihuda nungertem peladaktsünüa Paul dang langzü, “Yirusalemi tur idakji kü madang item o bendangdaktsütsü nai mulunger asü?”

¹⁰Pauli ashi, “Kaisar chubatiba obendangdak, kong kü o bendangtsü tim, iba matsüngdang ni noktaka lir.

¹¹Anungji ni tai benshir ka sürabang, aser tasütsü temsüa langka danga inyaka lirabang, ni mesüli ta mashitsü. Saka parnoki kechisünung ni aitsür, itemji ka danga ochi mesüra shingaia parnok teka nung ni bendanga magütsütet. Ni Kaisar tonga jembitsü.”

¹²Idangji Festai pa den teyaritepertem den jembiteper külen yamai langzü, “Nai Kaisar tonga or jembitsü ta shiogo, anungji yamaji na Kaisar tonga aotsüla.”

¹³Anogo ishika süir Külen Agripa chuba aser Bernikai Festa pelashishia agizüktsü asoshi Kaisariai aru.

¹⁴Parnok idakji anogo aika amungdang Festai chuba madangji Paul indang o shisema ashi, “Feliki yangi nisung ka tepuokdak toktsür ao.

¹⁵Ni Yirusalem nung alidang, puti-ungertem aser tamburtemi kü dangi pa anema o bendangtsü asüngdang.

¹⁶Taitsübatem den tejak o tejak na ajurutepa metpuri pa anema aitsüba o indang temetenba o jembitsü mapang tajung magütsü tashi, nisung shinga bendanga agütsütsü Rom nunger yimsü dak maket ta ni parnok dang langzü.

¹⁷“Anungji kodang parnok yangi sentep, ni memenui tasüngjisa ni obendangdak amen aser nisungbaji anir aittsü ozüng agütsü.

¹⁸Saka pa aitsürtemi ni bilema aliba ama mesüi pa anema o kecha parnoki bener marutet.

¹⁹Saka parnok pei yimsü indang o kar ashishitepa aser nisung ka Yisu shiba süogo, saka teküm lir ta ashir, ibala indang dang liasü.

²⁰Aser item o indang ni kechi koda o bushitsü ratamata-a liasü aser pai Yirusalemi tua idakji item o bendangtsü mulunger asü masü ta asüngdang.

²¹Saka Pauli chubatiba obendangba tonga oa jembitsü ta ashi nung, ni pa Kaisar dangi meyok tashi pa tepuokdak yua atatsü ozüng agütsü.”

²²Aser Agripai Festa dang ashi, “Nia iba nisungba oji angadangnür.” Festai langzü, “Asüng nai pa o angashitsü.”

²³Anungji tasüngji Agripa aser Bernika kanga sentsüwangshia aru, aser parnoki meyi madak tanishir aser yimti nung tongtibang nisungtem den o angadak taktangi ait, aser Festai ozüng agi Paul anir aitdaktsü.

²⁴Festai ashi, “Oh Agripa chuba, aser yangi onok den densema aliba nisungtem, Yirusalem nung aser yangia Yihuda nunger telok ajaki pa joko taküm melidaktsütsüla ta ayimtena kü dangi shiba anema o aben iba nisungji nenoki angur.

²⁵Ni ajitetba agibo tasütsüsa pai kecha meinyak, saka pai pa sasa chubatiba tonga oa jembitsü ta ashi nung ni pa yoktsü lemtet.

²⁶Saka pa indang kü kibur dang ni tim o kechianga mezülur. Anungji nai atitanger külen ni pa indang langka zülutsü akatsüsa ne dangi anir aru.

²⁷Kechiaser tepuokdak alir ka pa anema taitsüba kecha magütsüi yoktsübaji shisa maka ta ni bilemer.”