Read njo TENYARTEM MAPA 26 Bible Online

TENYARTEM MAPA 26 - njo bible

TENYARTEM MAPA 26

¹Agripai Paul dang ashi, “Nai pei indang jembitsü ni melar.” Idangji Pauli teka songtoka pa temeten o jembimeso:

²“Oh Agripa chuba, Yihuda nungeri ni aitsübatem anema nia kü temeten o ne madang ashitsüji kanga dang mapang tajung ta bilemer.

³Kechiaser talisa Yihuda nunger yimsüyimbong aser ken-o ajak nai jung junga meteta lir. Anungji nai aremzüka kü dang angatsü ni mepishir.

⁴“Ni lanuwa nungi kü kin rongnung aser Yirusalem nung koda kü taküm lia aru aji Yihuda nunger ajaki meteta lir.

⁵Parnoki kü indang mezüng nungi meteta lir; kechi koda ozü yimsü takangtiba benshir telok nung nia Farisi ka ama lia aru, parnoki dang mulungra aji parnoki kuli agütsütet.

⁶Aser tang Tsüngremi ozü tsürabur dang nangzükba dak ni teimla akabayong, tanü ni o bendangdak noktaka lir,

⁷iba tenangzükba tatalokba angutsü asoshi ozü kin teranati ammang sangwa metitemi temulungjang taroktiba agi Tsüngrem tenzüker. Oh chuba iba teimla akabayong, Yihuda nungertemi ni aitsür.

⁸Tsüngremi tasürtem shia arutsür ta asübaji tamakoktsü ta nenoki kechiba bilemer?

⁹ Nia Nazaret nunger Yisu tenüng anema mapa aika inyaktsü tim ta kü sasa angateta liasü.

¹⁰Yamaji ni Yirusalem nung inyak. Puti-ungertem nungi tashi meshizüker külen, temeshipur aika ni tepuokdak ayu. Saka kodang parnok südaktsütsü parnok anema ni kü teka mekang;

¹¹aser sinagog ajak nung aiben dang parnok merenshia parnok nem Tsüngrem ataladaktsütsü ni meranga liasü. Ni parnok dang onsara ain adok nung oda bendanglen aliba yimtitemi oa ni parnok rishikangshia liasü.

¹²“Yamaji puti-ungertem nungi tashi aser temelaba ozüng agizüker ni Damaskai oya alidang,

¹³oh chuba, anüngdang lenmang nungji anü dang nungi sentsü teprangba tesangwa ka anüng nungi ni aser kü den oya alirtem meketa yalokba ni angu,

¹⁴onok ajak ali nungji lao, aser Ibri oshi nung ola kati kü dang jembia ni angashi, ‘Saul, Saul! Kechiba nai ni rishikangshir? Ni anema nai aju nung metsüba jagi na dang yirutsü.’

¹⁵Ni ashi, ‘Kibuba, na shiba?’ Kibubai langzü, ‘Nai rishikangshiba Yisuji ni.

¹⁶Saka aramesoang, aser noktakang, kechiaser kechi otem nungsa ni ne dangi adoktsü item indangji na tenzüker ka aser kuli ka asütsü shimtettsü asoshi ni ne madangi adokogo.

¹⁷Yihuda nunger aser Bendangertem shir dangi ni na yoktsü, parnok teka nungi ni na kümzüktsü.

¹⁸Parnoki kü dak tamang akaba ajanga tai temenen nungi tatok aser meshiteta aliba purtem rongnung senmang agizüktsü asoshi aser tammang nungi tesangwa dangi aser Satan ain nungi Tsüngrem dangi parnok meyiptsü asoshi parnok tenük lapokdaktsütsü ni na parnok dangi yoker.’

¹⁹“Aji asünung, Oh Agripa chuba, ni anguba kotaker mangdangji ni tashi mangai ang mali.

²⁰Saka tamasa Damaska nung aser Yirusalem nung alirtem dang, iba sülen Yihuda linük ajonga aser Bendangertem dangia parnoki temulung meyipa Tsüngrem dangi arutsüla aser temulung meyipba temsüa mapa inyaktsüla ta ni sangoktsü.

²¹Iba yongji Yihuda nungertemi ni tenla kidang apu aser parnoki ni tepsettsü meranga liasü.

²²Saka tanü tashi Tsüngremi ni yaria arur, anungji yangi ni noktaker tilar o tulur ajak tsüngdang kü kuli asür. Ni kechi ashir, kasaji ainkartem aser Mosai tataloktsü shina liasü.

²³ Oda Khristaji tuo ashitsüla aser tasü nungi shia arutsüba mezüngbubaji alitsü aser pai nüburtem dang aser Bendangertem dang tekümtet tesangwa sangoktsütsü aser aji oda ataloka arur.”

²⁴Pauli yamai temeten o shia alidang, Festai ola tulu agi ayimoktsü, “Paul, na yiamatar. Na onsara shia-metetba agi yiadaktsür.

²⁵Saka Pauli langzü, “Ajak dang tamarenba Festa, ni yiar masü saka ni kechi ashir ya ochi aser nüji o lir.

²⁶Chubai item indang meteta kar, aser ni pa madang tasü ita jembir, kechiaser item o ka danga pai mangajemiang malitsü, kechiaser itemi linük ka nung miima meinyak ta ni junga metet.

²⁷Oh Agripa chuba, nai ainkartem o amanger ama? Nai amanger ta ni meteter.”

²⁸Agripai Paul dang ashi, “Iba mapang tatsüka tsüngda nung nai ni Khristan kümdaktsütsü meranger ama?”

²⁹Pauli langzü “Mapang tatsüka nung saka talangka nung saka na dang masü, saka tanü kü o angashirtem ajak, oda item talenba yinzü dak alema, parnok ni mesüka akümtsü ni Tsüngrem dang sarasademer.”

³⁰Idangji chuba, governor aser Bernika aser parnok den amenertem noktak.

³¹Aser parnok taodang parnok jembitepba ashi, “Iba nisungi tasütsüsa mesüra puoktsüsa kecha inyaka mali.”

³²Aser Agripai Festa dang ashi, “Iba nisungi Kaisar tonga jembitsü ta mashi asübo, odang chioker lila.”