Read njo TENYARTEM MAPA 27 Bible Online

TENYARTEM MAPA 27 - njo bible

TENYARTEM MAPA 27

¹Kodang onoki Itali-i rong nung aotsüla ta mulungtet, parnoki Augusta chubatibar temeranger telok nung noklang madak tanishir ka tenüng agi Yulio nem Paul aser tepuokdak alir kar bendanga agütsü.

²Onoki Adramatia nung rong kati atu koba Asia tzüküm piyong tanendak anena anena aotsüba liasü; anungji onoki iba nungji apusoa ao. Makedonia nungba Aristarka, shiba Tesalonika nungi liasü, pa-a onok den dena liasü.

³Tasüngji onoki Sidon nung anen aser Yulioi Paul meima benshi, aser pa tembartem dangi oa anebaludaktsütsü pai mela.

⁴Idak nungjagi tzüyimi apusoa Kupra tezülen mopung maonleni onoki oa liasü. Kechiaser mopung mashileni aon.

⁵Onoki Kilikia aser Pamfulia anasa aliba tzüyim ajanga or külen, Lukia nung aliba Mura atong.

⁶Noklang madak tanishibai idakji Itali-i aoba Alexandria nunger rong ka angu, aser iba nungji onok anioktsü.

⁷Anogo ainü meilungi dang or onoki anarongtena Knida anasa atong, aser ano mopungi memela nung onoki Salmon anasa Kreta tzüyimi ao.

⁸Iba tzüküm meketa anarongtena ao. Rongnendak tajung ta ajaba tesem ka, koba anasa Lasaia yimti liasü, ajagi onok aru.

⁹Mapang talangka süir tzüyim lenmangjia lendong aküm, aser tang Telumiba Anogoji süir liasü.[7]

¹⁰parnok dang ashi, “Tamarenertem, asen lenmang lendong nung lir ta ni ajiteter, khu aser rong asoshi teraksa tulu asütsüba dang masü saka asen taküma lendong nung lir.”

¹¹Saka noklang madak tanishibai Pauli ashiba dangbo rong kiburi aser rong tanishibai ashiba-ang anga dok.

¹²Tsüngkhüm mapang amungtsüsa rong anendakji tajung masü nungji oda tia kara Foinika tongtettsü aser idakji tsüngkhüm mapang amungtsüsa teimla nung parnok timba kati idak nungjagi aotsü mulunga liasü. Foinikaji anüolentip aser anüdoklentip tsütsü shia aliba Kreta asetkong nung rong anendak tajung ka liasü.

¹³Kodang anüolentip nungi mopung junga aon, parnoki aginüa aliba atalokogo ta bilema, rongnentsü atsütet aser Kreta asetkong tzüküm anasa ao.

¹⁴Saka talangka meli-i yipru tesashi ka koba dang Anüdoklentip Yipru ta ajar, aji nungshishia ait.

¹⁵Rongji iba nungji tsükdak aser yipru tsütsülenji tejak meshitet; anungji onoki oda tokja mopung jagi onok anir odaktsü.

¹⁶Aser Kauda ta ajaba asetkong tila ka tezülen mopung maonleni oa, onoki anarongtena rong tilaji bener arutet.

¹⁷Kodang parnoki aji ajungket, parnoki rong kübok lisü teyari amshia rongji alen. Aser Surti lisem manung parnok tsükdaktsü ta tsübua, parnoki tejajaba atemzük aser yamaji mopung jagi onok anishidaktsü.

¹⁸Yipruji maneni dang aon nung, tasüngjibo parnoki rong nung aliba khuji endokmeso,

¹⁹aser asemnübuba nung parnoki pei teka agi rong nung aketba lisütem, teyindangba sü aser tongshi tongnütem ajungdokmeso.

²⁰Kodang anogo aika anü süshia, petinutem süshia madok aser yipruji tesashiba dang maneni aon, shisa tatem nung onok kümzüktsü teimla khenyongi makai kümadok.

²¹Mapang talangba tashi parnoki chiyungtsü mechi-i arur külen, Pauli parnok rongnung noktaka ashi, “Tamarenertem, nenoki kü dang angar Kreta nungto agi maotsüba asü, aji oda sülasang iba teraksaba aser tesamaba mungula.

²²Saka tang tasü itang ta ni nenok dang ajungshir, kechiaser rong dak alema nenok rongnung shinga taküm mesamatsü.

²³Kechiaser shiba meyong ni lir aser shiba ni külemer, iba Tsüngrem kotak tenyar ka yasüng ni anasa noktaka kü dang pai ashi,

²⁴‘Tetsübuma, Paul, Kaisar madang nai noktaktsüla aser ajiang, ne den aortem taküm ajak Tsüngremi ne nem agütsüogo.’

²⁵Anungji tamarenertem, tasü itang, kechiaser Tsüngremi kü dang jembiba ama shitak ataloktsü ta ni Tsüngrem dak amanger.

²⁶Saka asetkong ka nung asenok anentsüla.”

²⁷Saka kodang terpezübuba aonung aru, onok ano Adria tzüyim nung onshishia alidang, ali atonger amai ayatrem mapang ka nung rongirtemi apitet.

²⁸Parnoki tzü tarokji tendang aser aji am metsü liasü, ano tatsüka or külen tendang aser am terpungu liasü.

²⁹Aser lungkürak tzüküm nung onok tsükdaka lir ta tsübua, ronglanglen nungi rongnentsü pezü yok, aser sangwatsü yongya-a ata-a liasü.

³⁰Aser rongirtemji rong nungjagi jena aotsü merangya liasü, parnok rongbanglen rongnentsü yoker amai sayua rong tilaji tzüyimi atemzüka ludaktsü.

³¹Anungji Pauli noklang madak tanishiba aser temerangertem dang ashi, “Itemi rong nung ata-a melira, nenok mekümzüktettsü.”

³²Idangji temerangertemi rong tila sentakba lisütem leptangtsü aser aji odaktsü.

³³Sangwatsü mapang nung Pauli ajak dang chiyungtsü achitsü mepishia ashi, “Tanü agi terpezünübuba nenoki ata-a lidagi aser kecha mechi-i dang aruogo.

³⁴Anungji chi tera chiyungtsü asoshi ni mepishir; kechiaser nenok taküm alitsü asoshi ya nüngdak, kechiyong nenok shinga kolak nungi kujang ka dang mesamadaktsütsü.”

³⁵Ya shir külen pai am bener aru aser parnok ajak madang Tsüngrem nem tenüngsang agütsü pai aji sangsa-a achitsü tenzük.

³⁶Idangji parnok ajak tasü itshia aküm aser parnokia chiyungtsü achi.

³⁷Aser rong nungji onok ajak agi nisung noklang ana ser neter trok liasü.

³⁸Parnoki peria chiyunger tzüyim nung jang endoka rongji pungpadaktsü.

³⁹Kodang sangwa parnoki aliji majitet, saka tzüküm mesükba ka parnoki ajitet aser takoktsü süra rongji idakji anendaktsütsü parnoki lemtet.

⁴⁰Parnoki rongnentsütemji loktoka tzüyim nungji aji ajungoktsü aser iba mapang nungjagisa rong anishibai süngpak alenbaji sala-a mopung aonlen shia temaba süji ayu aser parnoki tzüküm leni ao.

⁴¹Saka tzüyim ana lungtepdak tesem ka parnoki ajurushi aser rongji ali nung tsükdak. Aser rongbanglenji tsükdaka marakzütet, saka ronglanglenji tzüsem agi raksameso.

⁴²Tepuokdak alirtemji ka danga tzü wa-a oa jenteta lir ta sür, temerangertemi parnok ajak tepsettsü tasa ka atongtet.

⁴³Saka noklang madak tanishibai Paul kümzüknü, anungji parnok tasaji noktang. Tzüwa ashirtemi parnok sasa tamasa rong nungi tzüyim nungji pungokja, aliji atongtsü,

⁴⁴aser tanüngbatemji kar süngpak manung aser kar rong raksaba osettem manung oa atongtsü, pai ozüng agütsü. Yamaji parnok ajak kümzükteta tzükümji atong.