Read njo TENYARTEM MAPA 4 Bible Online

TENYARTEM MAPA 4 - njo bible

TENYARTEM MAPA 4

¹Peter aser Yohan ano telok den jembia alidang, putirtem aser tenla ki anüker tirtem aser Sadukitem, parnok dangi jashia aru,

²kechiaser parnoki nüburtem dang sayua aser Yisu tasü nungi shia aruba indang sangdong, koba agi tasürtem shia arutsü indang kuli agütsür.

³Anungji parnoki tenaji apu aser tananü tonga tepuokdak ayu; kechiaser ibai nikongdang kanga menur liasü.

⁴Saka osang angashirtem ajaki amang, aser nisungtem yongsük meyirijang pungu shi aküm.

⁵Tananüji parnok yimsüsürtem, tamburtem aser tezülurtem Yirusalem nung atenshi.

⁶Temaba putir Ana, Kaifa, Yohan, Alexander aser kwika temaba putir kimang liasü parnok ajak idakji liasü.

⁷Peter aser Yohan parnok tsüngdang noktakdaktsü aser yamai asüngdang, “Kechi tashi mesüra shiba tenüng nung nenoki ya inyaker?”

⁸Idangji Peter Tanela Temeshi agi sünga, parnok dang ashi, “Nüburtem madak yimsüsürtem aser tamburtem;

⁹tsüngtsüker nisung ka dang tajung inyakba atema onok dang asüngdanger süra,

¹⁰Nazaret nunger Yisu tenüng nung; shiba nenoki kangkidong nung angenlok aser Tsüngremi shia arudaktsü, pa tenüng nung iba nisung aneber nenok madang noktaka lir ta nenok ajak aser Israel nungertem ajaki metetang.

¹¹Nenok kisürtemi koba lung shimdok, aji kinük nung tongtiba aküm.

¹²Aser tangar shinga daka tekümtet mali, kechiaser kechi agi nenok kümzüktsüla, anüng kübok meimchir rongnung tangar tenüng kecha agüja mali.”

¹³Saka Peter aser Yohan tasü aitba angudang aser oda parnok mazüngba nisung aser mashi-memeteter ta ajiteta arudang parnoki süngmang. Aser parnokji Yisu den liasü ta parnoki meteta aküm.

¹⁴Tanepba nisungji Peter aser Yohan den noktaka angudang parnoki iba anema kecha meshitet.

¹⁵Saka parnok mungdang nungi pila-ang ta ashi aser parnok o parnok na jembitepa ashi,

¹⁶“Item nisung dang asenoki kechi inyaktsü? Kechiaser parnok ajanga atangji tesüngmangtsü aser temaitsü sayatenya ka inyakogo ta Yirusalem nung alir ajaki meteta lir aser asenoki aji nunga ta meshitet.”

¹⁷Saka nüburtem rongnung iba tatalokba indang o prokshia modaktsütsü atema, oda tang nungi Yisu tenüng nung shinga danga parnoki mejembitsüla ta shia asenoki parnokji amokmerena nungtemdi.

¹⁸Anungji parnoki tena aja aser Yisu tenüng nung teraka mejembitsü mesüra mesayutsüla ta ozüng agütsü.

¹⁹Saka Peter aser Yohani parnok dang langzü, “Tsüngrem dang nungi nenok dang ang tashi angatsüji Tsüngrem madang tim asü masü nenoki lemtetjang.

²⁰Kechiyong onoki kechi nguogo aser angashiogo iba indang mejembi-i ang meliteter.”

²¹Parnoki tanaben tena arütsü aser parnok chiokadok. Nüburtem alibayong parnoki tena merenshitsü mokoki aküm, kechiaser kechi atalok iba asoshi ajaki Tsüngrem tenüng sanga liasü.

²²Kechiyong shiba dak iba tanebtsüba temaitsü sayatenya inyak, iba nisungji arishi küm lir dak chia liasü.

²³Peter aser Yohan chioker külen parnoki medemertem dangi aru aser puti-ungertem aser tamburtemi parnok dang ashiba ajak sangoktsü.

²⁴ Kodang parnoki ya angashi, parnok ajak külemi ola adoka Tsüngrem dang sarasadem, “Kibuba, nai anüng, ali, tzüyim aser item nung aliba ajak yanglu;

²⁵aser Tanela Temeshi agi ozü tebou Dawid, ne tenzüker bang ajanga ashi, ‘Kechiba kintemi ain adok, aser nüburtemi amajok o jembi?

²⁶Kibuba anema aser pa Khrista anema alima chubatemi noktak, aser yimsüsürtemi külemi atenshi.’

²⁷ “Atangji Bendangertem aser Israel nüburtem den külemi Herod aser Pontias Pilati iba yimti nung ne temeshi Yisu shiba nai mezüja shimtet, pa anema tasa asa.”

²⁸Ne tashi aser terenemba nung anojungi alidang nai kechi inyaktsü renem, ibaji parnoki inyak.

²⁹Anungji tang, Oh Kibuba, parnoki amokmerenbaji ajiang, aser ne tenzükertemi tasü ita ne osang ajak jembitsü tashi agüjangma,

³⁰aser ne temeshi tenzüker Yisu tenüng ajanga temaitsü sayatenya aser tesüngmangtsü mapatem inyaktsü asoshi ne tanebtsüba teka sala-angma ne tenzükertemi kanga tasü ita ne o jembitsü mela-angma.”

³¹Kodang parnok sarasadema liasü, parnok sentepa alidak kiji anokshi aser parnok ajak Tanela Temeshi agi asüng, aser parnoki Tsüngrem O tasü ita jembia liasü.

³²Aser amangba purtem telok ajongaji temulung aser tanela ka dang liasü; aser parnok katia pei akabatem pei meyong ta mashi, saka kechisarena arok meyong dang liasü.

³³Ain tulu agi tenyartemi Kibuba Yisu shia aruba indang kuli asü, aser Tsüngrem taochi tulu parnok madak liasü.

³⁴Kechiaser parnok rongnung shinga kecha agia anünga maliasü; kechiyong ali mesüra kimung akartemi itemji ayok, aser teyokzükba senji bener arua

³⁵tenyartem tsüngdang yutsü. Aser nisung shia pei nüngdak yari parnoki lema agütsü.

³⁶Aser Levi kidong nungi Kupra linük nung aliba nisung, Yosef, shiba dang tamangertemi Barnaba ta aja,

³⁷Pai pei ali ayok aser senji bener arua tenyartem tsüngdang yutsü.