Read njo TENYARTEM MAPA 5 Bible Online

TENYARTEM MAPA 5 - njo bible

TENYARTEM MAPA 5

¹Saka nisung ka tenüng agi Anania aser tebutsü Safira, tenati rongsen kar ayok,

²aser teyokzükba sen shilem kar tebutsüia meteta agizüka ayu; aser tanüngbaji bener arua tenyartem tsüngdang yutsü.

³Saka Peteri ashi, “Anania, Tanela Temeshi dang tiyazü jembitsü aser ner asoshi sen shilem ka agizüker ayutsü kechiba Satan ne mulungjangi aitdaktsü?

⁴Ya mayok dang iba rongsen ne meyong liasü aser ya yoker külena iba teyokzükba senji ne meyong masü no? Süra, kechiba nai yamai inyaktsü mulungtet? Nai nisung madang masü saka Tsüngrem madang tiyazü jembiogo.”

⁵Ananiai item o angashi dang, pa alanga lao aser asü. Ya angashir ajak madak tetsübu tulu adok.

⁶Idangji asangurtem aru aser parnoki pa mang alung aser parnoki pa mang bener oa arem.

⁷Ghonda asem shi lir, kechi atalok aji memeteti, pa tebutsü ait.

⁸Idangji Peteri la dang asüngdang, “Aliji paika yong ayok südi, kü dang shiang.” Aser lai ashi, “Hau, paika yongji dang ayok.”

⁹Saka Peteri la dang ashi, “Kibuba Tanela atitangtsü kechiba nebuba nenati külemi ya oda bangjem? Ajiang, nebuba aremertem kishi züngdang lir aser parnoki na-a bener aotsü.”

¹⁰Idangyongji laji pa tsüngdang lao aser süadok. Asangurtemji aitdang parnoki la sür angu; parnoki la bener adoka tebuba anasa arem.

¹¹Aser arogo ajonga aser item angashir ajak madak tetsübu tulu adok.

¹²Nüburtem rongnung tenyartemi temaitsü sayatenya aser tesüngmangtsü mapatem aika inyak; aser parnok ajak temulung ka sür Solomon Kilempok nung sentep.

¹³Tanüngbatem shingaia parnok rongnung adentsü temulung moulutet, saka nüburtemi parnok uludaktsü;

¹⁴aser Kibuba dak amanger tetsür aser tebur anaprongla aika dang züina aküm.

¹⁵Aji asünung Peter süidang, pa tanela agi danga parnok kar akhümbangdaktsütsü asoshi shirangertem yimdongi anizüka yipten aser pakti nung parnoki toktsü.

¹⁶Ano Yirusalem temeket yimtitem nungi shirangertem aser temenen tanelai kangshibatem teloki anir arua nungten; aser parnok ajakji anebadok.

¹⁷Idangji temaba putir aser pa den alir ajak, shir Saduki telok nungi liasü, parnok tenükmerem agi asüng.

¹⁸Parnoki tenyartem dak teka ia yimti nung tepuokdak puoka ayu.

¹⁹Saka Kibuba tenyar kati aonung tepuokdak kishi lapoka parnok anitet aser ashi,

²⁰“Nenoki oang, tenla kidang noktaker nüburtem dang iba taküm osang ajak shiang.”

²¹Kodang parnoki ya angashi sangwatsü mapang nung parnoki tenla kidangi atu aser sayumeso. Saka temaba putir aser pa den alirtem arua, Mungdang aser Israel nunger tamburtem ayongten, aser tenyartem anir arutsü tepuokdaki osang yok.

²²Saka kodang sosangtem tonga aru, parnoki parnok tepuokdakji mangu, aser parnoki meyipa arur ashi,

²³“Onoki tepuokdak jungjunga shibanga angu, aser tanükertem kikümbang nung noktaka liasü, saka onoki kishi lapokdang kilung nung shinga mangu.”

²⁴Kodang tenla ki tir aser puti-ungertemi item o angashi, parnok indang ya koda asütsü ta kanga ratamata.

²⁵Saka nisung ka arua parnok dang ashi, “Ajiang, nenoki tepuokdak ayuba nisungtemto tenla kidang lir. Parnok idakji noktaka nüburtem dang sayutsüngidagi.”

²⁶Idangji tenla ki tir aser sosangtem ao aser parnok anir aru, aser nüburtemi lung agi aontsü tsübuba agi tashiyim medeni dang anir aru.

²⁷Parnoki tenyartemji anir arua mungdang madang noktakdaktsü. Aser temaba putiri parnok dang asüngdanga ashi,

²⁸ “Iba nisung tenüng nung mesayutsü onoki nenok dang ajang ajanga ozüng agütsü; saka ajiang, nenoki nenok tesayuba agi Yirusalem süngdaktsüogo aser iba nisung südaktsüba tai onok dak kaodaktsü.”

²⁹Saka Peter aser tenyartemi langzü, “Nisung dang masü, Tsüngrem dang ang onoki tashi angatsü tim

³⁰Yisu shiba nenoki kangki dong nung angenlok, asen tsürabur Tsüngremi pa shia arudaktsü.

³¹Pa tongtiba aser Kümtetdakba kümdaktsütsü asoshi aser Israel nem temulung meyipba aser temenen tatokba agütsütsü asoshi Tsüngremi pa pei tajichilen temalen ajungkettsüogo.

³²Item indang onok kuli lir, aser Tanela Temeshi shiba Tsüngremi pa dang tashi angartem nem agütsüogo, pa-a kuli lir.”

³³Saka kodang parnoki ya angashi parnok ain adok aser parnoki tenyartemji tepsetnü.

³⁴Saka Farisi ka tenüng agi Gamaliel, ozüng tesayur ka nüburtemi akhümtsübua aliba nübu, mungdang nungji noktak aser nisungtemji khen atema kimai ludaktsütsü pai ashi.

³⁵Pai parnok dang ashi, “Israel nungertem, nenoki item nisung dak kechi inyaknüa ali iba asoshi kümdangang.

³⁶Kechiyong tesüiba mapang nunga Teudai pa sasa tulu shisanga apuso, aser pa den nisung yongsük noklang pezü shi aden. Saka pa tepset, aser pa sülen anishir ajakji prokshi aser aji parnok asoshi tatem liasü.

³⁷Iba sülen tenüng züluba tensa nung Galil nunger ka tenüng agi Yihudai anir pa nüburtemi anema apuso; saka pajia sama, aser pa sülen anitakertem ajak prokshi.

³⁸Tang ni nenok dang shidi, item nisungtem dang kecha tebenshi, saka parnok odang tokjang, kechiyong parnoki kechi sentong atonger aser inyaker ya meimchir nungi süra, ibaji samatsüsa;

³⁹saka ibaji Tsüngrem nungi süra, nenoki parnok samadaktsütsü makoktsü, aser nenok Tsüngrem anema rarartem ta nenoki angatettsü.”

⁴⁰Yamaji shia pai parnokji mesüzük. Parnoki tenyartemji aja, parnok dak azük aser Yisu tenüng nung kodanga mejembitsü nungtem. Aser parnok chiokadok.

⁴¹Aser Yisu tenüng asoshi mezüngmeshi angutsüsa temsüa züngshiba yong pelashishia parnoki mungdang dak nungi pila.

⁴²Aser kenüamati tenla kidang aser kibongtem nung Yisuji Khrista ta sayuba aser sayutsüngiba manen.