Read njo TENYARTEM MAPA 6 Bible Online

TENYARTEM MAPA 6 - njo bible

TENYARTEM MAPA 6

¹Item anogo nungji kodang nütsüng yongsük renloka ao, Grik o jembiba Yihuda puri Ibri o jembiba Yihuda pur tenüng senadok, kechiaser parnok amitsürtem anogoshi chiyungtsü anganüba agi mata.

²Aser terana jagi nütsüngtem telokji parnok dangi jatep aser ashi, “Asenoki chiyungtsü anganütsü asoshi Tsüngrem o sayuba sentoktsü tim masü.

³Anungji adianutem, nenok rongnungi tenüng tajung akaba aser Tanela agi asüngba, shisa taka nisung tenet shimtetang, aser iba rongdak mapa reprangtsü asenoki parnok nem nungloktsüdi.

⁴Saka onokbo sarasademba aser Tsüngrem Osangtajung sayuba nung bendanga agütsütsü.”

⁵Iba o jagi telok ajak peladaktsü, aser Tanela Temeshi agi asüngba nisung ka Stefan, aser Filip, Prokora, Nikanor, Timon, Parmena, aser Nikola, Antiok nunger shiba Yihuda yimsüi meyipba nisung ka liasü, parnokji shimtet.

⁶Parnoki itemji tenyartem tsüngdang noktakdaktsü, aser tenyartemi parnok dak teka agi nemeta sarasadem.

⁷Aser Tsüngrem Oji züin. Yirusalem nung nütsüngtem yongsük aika renloka ao aser putir telok tulu kati tamangji agizük.

⁸Stefan, taochi aser ain agi sünga pai nüburtem rongnung temaitsü ayatenya aser tesüngmangtsü mapatem inyaka liasü.

⁹Saka nisung kar sinagog züngsem nung adenertem shir dang Kurini aser Alexandria nungi aruba Nüjipur[1] ta ajar, aser tangartem Kilikia aser Asia nungi arurtem, parnoki Stefan den bangsentepa apuso.

¹⁰Saka Stefani shisatsü tarok aser Tanela nung jembibaji parnoki majet.

¹¹Idangji parnoki nisung kar ajioktsü aser parnoki ashi, “Mosa aser Tsüngrem anema atalaba otem pai jembiba onoki angashiogo.”

¹²Parnoki nisungtem, tamburtem aser tezülurtem ajungmesoa rongrongdaktsütsü asoshi pa den ajurutepa pa pur mungdang tsüngdangi anir aru.

¹³Parnoki tiyazü kulitem tuyu aser ashi, “Iba nisung yagi Temeshi tekülemdak aser Mosa Ozüng anema jembiba manener.

¹⁴Kechiaser iba Nazaret nunger Yisui iba tenla ki ya raksatsütsü aser Mosai asenok nem agütsüba yimsü ya melenshitsütsü ta pai jembiba onoki angashiogo.”

¹⁵Aser Mungdang dak mena alir ajaki pa dak ranglok aser pa tejak kotak tenyar tejak mesüka ajitet.