Read njo TENYARTEM MAPA 7 Bible Online

TENYARTEM MAPA 7 - njo bible

TENYARTEM MAPA 7

¹Idangji Temaba Putiri Stefan dang asüngdang, “Itemi shitak ama?”

² Stefani langzü, “Adianutem, aser tebuteditem, angang. Asen tebou Abraham Haran nung maliba mapang, pa Mesopotamia nung alidang sentsüwangshi Tsüngrem pa dangi adok,

³aser pa dang ashi, ‘Ner lima aser ner adianutem tokjang, aser ni ne dang koba lima sayudir ajagi arung.’

⁴ Anungji pai Kaldi lima toktsü aser Haran nung ali. Tebu sür külen idak nungjagi tang nenok aliba limai Tsüngremi pa anir aru.

⁵ Idakji pa tetsüng ka ajemtakdaka sünga Tsüngremi Abraham nem magütsü. Idangji pa techir malidang pa nem aser pa sülen jakzükbatem nem, ibaji kadaktsütsü asoshi agütsütsü pai nangzük.

⁶ Pa dak jakzükbatem aener lima nung küm noklang pezü alitsü, aser parnoki parnok alar kümdaktsütsü, aser meketmeseni benshitsü ta Tsüngremi yamaji ashi.

⁷ Parnok koba kin lartem kümdir, iba kin ni o bendangtsü, iba sülen parnok anitettsü aser idaki ni külemtsü.

⁸ Aser tezüngzüktepba temejeptokba pa nem agütsü. Aji oda Abraham nungi Isak jakzük aser pa tinübuba nung mejeptok. Aji oda Isak nungi Yakob jakzük, aser Yakob nungi tebou terana jakzük.

⁹“Tebutitem jagi Yosef anema mokokaji aser alar ama pa Ijip nunger dang ayok, saka Tsüngrem pa den liasü.

¹⁰ Timtem ajak nungi Tsüngremi pa kümzük, aser Ijip chuba Farao tsüngdang pa shisatsü akaba yong pa dang junga benshidaktsü. Idangji Ijip aser pei chuba ki ajak madak yimsüsür tongtiba kümdaktsü.

¹¹ Tang Ijip aser Kanan lima ajak nung ayawara aser timtem tulu aru; aji asünung asen tetsü-teboutemi chiyungtsü mungui aküm.

¹²Saka Ijip lima nung tsük lir ta Yakobi angazük aser asen tetsü-teboutem mezüngbuba ajagi pai parnok yok.

¹³ Tanabenbuba aludang Yosefi pei adianutem nem shitetdaktsü, aser Yosefer kibongji Farao nem meteta kümdaktsü.

¹⁴ Idangji pa tebu Yakob aser pei adianutem ajak, shir ajak agi neter-pungu liasü, parnok arung ta Yosefi aja.

¹⁵ Anungji Yakob Ijipi alu aser pa aser asen tetsü-teboutem yangji asü.

¹⁶ Parnok Shekemi bener oa, Abrahami Shekem nung Hamor chirtem nungi taribi sen agi aliba leper nungji arem.

¹⁷ “Saka kechi tenangzükba Tsüngremi Abraham nem agütsü, ibaji ataloktsü mapang anasa ait nung Ijip lima nung Israel nüburtem kanga dang züina aküm.

¹⁸Idangji Ijip nung Yosef memetetba tangar chuba ka adok.

¹⁹ Pai asen kin dak külaka benshi aser asen tetsü-teboutem dak mejungi benshi aser parnok taküm melidaktsütsü asoshi parnoki kinü chanutem ajungdokdaktsü.

²⁰ Iba mapang nung Mosa aso, aser pa Tsüngrem tsüngdang tobur kanga junga liasü. Ita asem tashi pa tebuer kidang mesütet.

²¹ Kodang pa par kidang nungi ajungdok, Farao jalai pa bena aru aser lar jabaso küma mesütet.

²²Aser Ijip nunger shisatsü ajak angazükdakja Mosa sayutet aser pa o jembiba nung, aser mapa nung tetangshi liasü.

²³ “Saka pa arishi küm lir shi akümdang, pei adianutem, oda Israel purtem semdangtsü temulungi ait.

²⁴Parnok rongnung ka Ijip nunger kati mejungi benshiba ngua, pai Ijip nungba dakji züka pa tepu aküm, aser kangshia aliba nisung asoshi mang ayang.

²⁵Pa ajanga pei nüburtem nem tekümzük Tsüngremi agütsüba pei adianutemi angatetogo ta bilem; saka parnoki aji mangateti liasü.

²⁶Tananüji parnok ana züktepya alidang pai tenaji angu aser pai parnokji jungtepdaktsünüa ashi, ‘Nisungba anaji, nenok adianu lir; kechiba kati ka dak mejungi benshir?’

²⁷Saka pa kiyonger dak mejungi benshiba nisung jagi Mosa tezülen nunginja ashi, ‘Shibai na onok madak yimsüsür ka aser obendanger kümdaktsü?

²⁸Nai yashi Ijip nungba tepsetba amato nia tepsetnür asü?’

²⁹ Iba tatalokba mapa ajanga Mosa jena ao, aser Median lima nung aener ka ama ali. Yangji pa nem tanur ana sotsü.

³⁰ “Küm lir süia or külen, Sinai tenem azüngmeyakdak lisem lima arem nung süngsem ka nung mi jangrua aliba ka nung kotak tenyar ka pa dangi adok.

³¹Mosai kechi angu aji agi pa süngmangadok, aser aji reprangtsü pai anasa arudang pai Kibuba ola angashi;

³²‘Ni ne tetsüteboutem Tsüngrem, Abraham, Isak aser Yakob Tsüngrem.’ Mosai atentena liasü aser aji reprangtsü temulung moulutet.

³³Kibubai pa dang ashi, ‘Ne tsüngsem ne tsüng nungi semzükang, kechiaser na noktakdakji temeshi li lir.

³⁴Ijip nung kü nüburtem, mejungi timtemba atangji ni nguogo aser parnok anüngba ola ni angashiogo, aser parnok kümzüktsü ni aluogo. Aser tang arung, ni na Ijipi yoktsü.’

³⁵ Iba Mosa, shiba parnoki magizük ashi, ‘Shibai na yimsüsür aser obendanger asütsü shim?’ Süngsem nung pa dangi adokba tenyar ajanga, yimsüsür aser tekümzüker ka asütsü Tsüngremi pa yokogo.

³⁶ Iba nisung jagi Ijip nung Temerem Tzüyim nung, aser azüngmeyakdak lisem lima arem nung küm lir tashi tesüngmangtsü mapatem aser temaitsü sayatenyatem inyaker, pai parnok anitet.

³⁷ Iba Mosa jagi Israel purtem dang ashi, ‘Tsüngremi ni adokdaktsüba ama, nenok adianutem rongnungi ainkar ka nenok asoshi adokdaktsütsü.’

³⁸ Israel purtem ajonga azüngmeyakdak lisem lima nung sentepdaktsübaji pa liasü, aser Sinai tenem nung kotak tenyar ajanga asen tetsü-teboutem den jembia liasü, aser asenok nem agütsütsü asoshi taküm osang shibai agizük iba nisungji pa liasü.

³⁹Pa dang asen tetsü teboutemi tashi mangai liasü, aser parnoki pa sentok aser parnok mulungjang Ijip leni meyip.

⁴⁰ Parnoki Aron dang ashi, ‘Onok anitsü asoshi onok atema tsüngremtem yanglujang kechiyong Mosa shibai onok Ijip lima nungi anitet, pa kechi aküm onoki memetet.’

⁴¹ Idangji parnoki nashi pungchi chanu ka yanglu aser iba süngyanglu dangi tekülemba bener arua agütsü; aser parnok teka agi yangluba mapa nung parnoki pelatep.

⁴² Anungji Tsüngrem parnok nungi tejak meyip aser parnokji anüng petinutem külemtsü toktsü, oda ainkartem kaket nung zülua aliba ama: ‘Oh Israel kidong! Azüngmeyakdak lisem lima arem nung, küm lir mapang nung kü nem tetepsetbatem aser tenlatem nenoki agütsü ama?

⁴³Saka Molek süki nenoki aben, aser petinutem tsüngrem Rafan, itemji külemtsü asoshi nenoki süngyanglutem yanglu. Anungji ni nenok Babilon atena anir aotsü.’

⁴⁴ “Asen tetsü-teboutemi azüngmeyakdak lisem lima arem nung süki yanglua liasü. Kechi koda yanglutsü Tsüngremi Mosa dang tuyu, aji oda Mosai sükiji yanglu.

⁴⁵ Kodang Tsüngremi asen tetsü-teboutem jakdang nungi kintem parnok linük nungi aridok; parnoki ajagi ai parnok tendak Yihusua den sükiji bener aru. Aji oda Dawid tensa tashi liasü.

⁴⁶ Yakob Tsüngrem asoshi talidak ki ka yanglutsütsü asoshi Dawidi asüngdang aser aji oda inyaktsü Tsüngrem nungi pai maongka angu.

⁴⁷ Saka Solomoni ang Tsüngrem asoshi kiji sütsü.

⁴⁸Saka Tematiba Tsüngrem, teka agi asüba kitem nung malir. Ainkari ashi ama;

⁴⁹ ‘Kotak kü chuba menden aser ali kü tsüng ajemetdak. Nai kü nem komala ki ka yanglutsütsü ta Kibubai ashir, mesüra kong ni anisüngzüktsü?

⁵⁰Item ajak kü keti yanglu masü no?’

⁵¹ “Nenok tekong teküpraktem, temulung matangertem aser tenarong matenertem nenoki teti Tanela Temeshi anema noktaker, nenok tetsü-teboutem ama nenoka lir.

⁵²Ainkartem rongnung nenok tetsü-teboutemi rishikangshi masübashiba ali? Temeshiba arutsü indang shinertemji parnoki tepset: tang nenok tashioktsürtem aser tetepsetertem kümogo.

⁵³Kotak tenyartemi ozüng agütsüba ama nenoki ozüngji agizük, saka nenoki mamshir.”

⁵⁴Parnoki ya angashidang parnok mulungjang tonga ai, aser pa anema tepu shitep.

⁵⁵Saka Tanela Temeshi agi sünga, pai kotaklen rangketa reprang aser Tsüngrem sentsüwangshi aser Kibuba Yisu, Tsüngrem tajichilen noktaka angu.

⁵⁶Pai ashi, “Ajiang, kotak lapoker Tsüngrem tajichilen Nisung Chir noktaka ni angur.”

⁵⁷Saka parnoki ola tulu agi ayimtena, tenarong tangbanger külemi lungjemer pa dangi asemtepa aru.

⁵⁸Parnoki yimti nungi pa atsür adoka lung agi pa dak aon. Asangur ka tenüng agi Saul tsüngdang kuli purtemi parnok süoshi ayu.

⁵⁹Kodang parnoki Stefan dak lung agi aon, pai ola adoka ashi, “Kibuba Yisu, kü nela agizükang.”

⁶⁰Aser Stefani apudaka ola tulu agi ashi, “Kibuba iba tai temenen parnok dak tenloktsü!” Ya shir pa mejangadok.