Read njo TENYARTEM MAPA 8 Bible Online

TENYARTEM MAPA 8 - njo bible

TENYARTEM MAPA 8

¹Aser pa südaktsütsübaji Sauli mulunga liasü. Item anogo nungji Yirusalem nung arogo anema rishikangshi tulu adok. Tenyartem dak alaka, parnok ajak Yihuda aser Samaria lima nung prokshia liasü.

²Bendanga agütsüba tamangertemi Stefan arem aser pa asoshi mangyim tulu liasü.

³ Saka Sauli ki shiai tua teburtem aser tetsürtem atsütena tepuokdak yua, arogoji raksatsütsü merang.

⁴Anungji prokshia aortemi parnok kolenisa ao idakji oji sayutsüngia ao.

⁵Filipa Samaria yimti-i lua Khrista indang parnok dang sayutsüngi.

⁶Filipi jembiba aser pai kechi temaitsü sayatenyatem inyak itemji parnoki ngua aser angashia telokti-i mulungsoa pai sayuba nungji temulung agüja anga.

⁷Kechiyong temenen tanela keta alirtem nungi temenen tanelatem ola tulu adoka, parnok dak nungi adokdaktsü. Togimra agi tonga alirtem aser tsüngtsükertem aika anebdaktsü.

⁸Anungji item yimti nungji tepela tulu liasü.

⁹Saka iba yimti nungji Simon ta ajaba nisung ka liasü. Pai temezüngba mapa inyaka, pei sasa tulu küma jembia Samaria nungertem süngmangdaktsü.

¹⁰Aser parnok ajaki tulutiba nungi tilatiba tashi, pa dang anga-a ashi, “Tsüngrem ain tashi tulu aketba nisungbaji ibai lir.”

¹¹Aser parnoki pa dang anga, kechiaser talangka nungi pa temezüngba mapatem agi parnok süngmangdaktsü.

¹²Saka kodang Tsüngrem Yimli Osangtajung indang aser Yisu Khrista tenüng indang Filipi parnok dang sayutsüngi, parnoki amang, aser parnok tebur o tetsür ajonga baptitsü.

¹³Aser Simonia amang aser pa-a baptidaktsü aser pa-a Filip den senzü. Aser temaitsütem ain tulu sayatenyatem inyakba ngua, pa süngmang.

¹⁴Samaria nungertemi Tsüngrem O agizükogo ta kodang Yirusalem nung alirtemi angashi, parnoki Peter aser Yohan parnok dangi yok.

¹⁵Kodang parnok tonga aru, tamangertemi Tanela Temeshi agizüktettsü asoshi parnoki sarasadem.

¹⁶Kechiaser tang tashi parnok shinga daka Tanela Temeshi ano malui liasü. Parnokji Kibuba Yisu tenüng nung dang baptitsür liasü.

¹⁷Idangji Peter aser Yohani parnok dak teka agi nemet, aser parnoki Tanela Temeshi agizük.

¹⁸Saka tenyartemi teka agi nemetbaji ajanga Tanela Temeshi agütsübaji Simoni ngua, pai parnok nem sen bener arua agüja ashi,

¹⁹“Shiba daksa kü ket agi nemetdir, Tanela Temeshi pai agizüktsüsa kü nema iba ain agüjangma.”

²⁰Peteri pa dang ashi, “Ne taribi sen ne den külemi tesamadaki idakjang, kechiaser Tsüngremer sempet sen agi alizüktsü ta nai bilemer!

²¹Iba mapa nung na asoshi shilem mesüra telemzükba maka kechiaser ne mulungjang Tsüngrem madang shitak masü.

²²Anungji iba shisa tamajungba nungi temulung meyipang aser Kibuba dang meshiang, ashiko, ne mulung nung bilembaji pai atoktsü akok.

²³Kechiyong na mim taku aser tamajung agi alenbanga lir”

²⁴Simoni langzü, “Nai jembizükba o katia kü dak matongtsüsa, ni asoshi Kibuba dang mepishijangma.”

²⁵Peter aser Yohani kuli agüja Kibuba O jembir külen, Parnok Yirusalemi shilang, aser Samaria yimtsüng aika nung Osangtajung sangoktsü.

²⁶Kibuba tenyar kati Filip den jembi aser ashi, “Aramesoang, aser anüdoklentip len Yirusalem nungi Gazai aluba lenmangi oang;” aji lisem lenmang[2] liasü.

²⁷Pai apusor ao; aser ajiang, Ethiopia nunger teyangluba nisung ka, Ethiopia chubatsür, Kandake kübok yimsüsür tongti ka shiba, lar rongsen ajak madak kibur liasü, pa Yirusalemi tekülemtsü tua liasü.

²⁸Aser pa meyipa aludang, pei talungtsü nung mener, Isaia ainkar kaket züngya liasü.

²⁹Tanelai Filip dang ashi, “Anasai oang, aser iba talungtsü jagi na-a tuang.”

³⁰Filipi asema ao aser pai Isaia ainkar kaket züngya angashir ashi, “Nai azüngbaji angateter südi?”

³¹Saka pai langzü, “Kari kü dang rateta meshira ni koda sür angatettsü?” Aser pai Filip dang pa den atua amentsü mepishi.

³² Pai züngya aliba Laiji ya liasü: “Tetepsettsü san ka ama pa anir ao; aser san chanui pa züng mejepba madang ola madok ama, Yamaji pai pei tebang melapok.

³³Pa mezüngmeshi aser pa o shitak mebendang; pa putu indang shibai shitettsü; kechiaser pa taküm alima nungi bener ogo.”

³⁴Idangji teyangluba nisungi Filip dang asüngdang, “Kü dang shiangjo, ainkar jagi pei indang jembir asü mesüra tangar ka indang jembir?”

³⁵Filipi jembitsü tenzük, iba Lai nungi tenzüker pa dang Yisu indang Osangtajung sayutsüngi.

³⁶Aser parnoki ilen jagi aodang, lenmang nung tzü alidak tesem ka atong aser teyangluba nisungi asüngdang, “Ajiang, idaki tzü lir. Ni mebaptidaktsütsü asoshi tenokdangtsü kechi aka?”

³⁷Filipi ashi, “Ne mulung ajak agi amangra, nai inyaktet.” Pai langzü, “Yisu Khristaji Tsüngrem Chir ta ni amanger.”

³⁸Talungtsüji anenang ta pai ashi, aser tenaprongla tzü jagi ai aser Filipi paji baptitsü.

³⁹Kodang parnoki tzü nungi adok, Kibuba Tanelai Filip anir oadok, aser teyangluba nisung jagi pa joko mangu; aser pa pei lenmangi pelashishia ao.

⁴⁰Saka Filip Azota nung angu; aser Kaisaria tonga maru tashi ajanga aoba yimtitem ajak nung pai Osangtajung sayutsüngi.