Read njo TENYARTEM MAPA 9 Bible Online

TENYARTEM MAPA 9 - njo bible

TENYARTEM MAPA 9

¹Sauli ano Kibuba nütsüngtem anema amokmerenba aser tepsettsüba indang osang ayimoktsü.

²Damaska nung sinagogtem dangi shititem yoktsü aser lenmang nung ajuruba aser lendi nung alirtem oda Kibubar lenmang nung jajartem tebur aser tetsür ajak alena bener Yirusalemi arutsü asoshi pai Temaba putir dangi ao aser pa nungi tashi meshizük.

³Saka pa aodang Damaska atongtsü anasa, aoksa-a kotak nungi tesangwa kati pa meketbanga yalok.

⁴Pa ali nungji alang, aser ola kati pa dang ashi, “Saul, Saul, kechiba nai ni rishikangshir?”

⁵Saka pai asüngdang, “Na shiba, oh Kibuba?” Pai langzü, “Nai rishikangshiba Yisuji ni lir.

⁶Saka noktakang aser yimti jagi iang, aser nai kechi inyaktsü aji ni ne dang ashitsü.”

⁷Pa den aoba nisungtemi shinga mungui ola dang angashia o mejembiteti noktak.

⁸Sauli ali nung jagi noktak aser pai pei tenük lapok saka pai kecha mangu; aser parnoki teka agi amer pa Damaskai anir aru.

⁹Anogo asem tashi pai kecha mungui liasü; aser techiyunga mechiyung, tajema majem.

¹⁰Damaska nungji nütsüng ka tenüng agi Anania liasü. Kibubai pa dang mangdang ka nung ashi, “Anania,” aser pai langzü, “Kibuba, ni yangi lir.”

¹¹Kibubai pa dang ashi, “Aramesoang aser Temetong ta ajaba lenti jagi oang aser Tarsa nungi aruba nisung ka tenüng agi Saul Yihudaer kidang asüngdangang. Pai sarasademdagi.

¹²Pai Anania tenüng agi nisung ka pa ngudaktsütsü asoshi arua, pa teka agi pa dak nemetba mangdang ka nung nguogo.”

¹³Ananiai langzü, “Kibuba Yirusalem nung ne nüburtem anema kodaka iba nisung yagi mejungi inyaker, ni aika nungi angazükogo.

¹⁴Aser yangi ne tenüng nung ajaba purtem alentsü Temaba putir nungi tashi agüja kar.”

¹⁵Saka Kibubai pa dang ashi, “Na oang, kechiaser Bendangertem, chubatem aser Israel purtem dangi kü nüng abentsü pa ni asoshi teshimtetba marok lir.

¹⁶Kechiaser kü nüng atema pa koda kangshitsüla aji ni pa dang sayutsü.”

¹⁷Ananiai oa kidang jagi atu. Pai Saul dak teka agi nemet aser ashi, “Adianu Saul, na lenmang nung aruya lia, Kibuba Yisu, shiba ne dangi adok, na ngudaktsütsü aser Tanela Temeshi agi süngdaktsütsü asoshi pai ni ne dangi yok.’

¹⁸Aser idangyongjisa pa tenük nungi tip mesüka langka tsük aser pai ngua aküm; aser aramesoa pa baptitsü.

¹⁹Aser kodang pai chi chiyung pa tashi ita aküm. Aser pa Damaska nung nütsüngtem den anogo ishika liasü,

²⁰aser idangyongjisa sinagogtem nung pai sayutsüngia ashi “Yisuji Tsüngrem Chir lir.”

²¹Pa dang angashirtem ajaki süngmanga ashi, “Yisu tenüng nung ajartem ajak Yirusalem nung rishikangshi agütsübato pa masü no? Aser Temaba Putir madangi parnok alena bener aotsü ta sür pa yagi aru masü ama?”

²²Saka Saul tamang nung tashi tali dang itshia aküm; aser Yisuji Khrista ta kuli agüja ain nung sayutsüngi, aji asü nung Damaska nung alir Yihuda nungertemi pa dang melangzütet.

²³ Anogo ishika lir külen Yihuda nungertemi pa tepsettsü külemi tasa ka atongtet.

²⁴Saka parnok tasaji Sauli meteta aküm. Pa tepsettsü asoshi parnoki anüngdang aser aonung süngkhümbong nüka ali.

²⁵Saka nütsüngtemi aonung pa anir oa yimti jara ajanga molok ka nung ajungzüka yok.

²⁶Kodang pai Yirusalem atong pai nütsüngtem den adentsü merang, saka parnoki pa tsübu, kechiaser pa nütsüng ka ta parnoki mamang.

²⁷Saka Barnabai tenyartem dangi pa anir aru aser kechi koda lenmang nung Sauli Kibuba angu, aser pai pa den jembi aser kechi koda Damaska nung Yisu tenüng nung tasü ita sayutsüngi, ya ajak parnok dang ashi.

²⁸Sauli parnok den Yirusalem nung ali aser Kibuba tenüng nung tasü ita sayutsüngia, pa oli aruli ta mela mela-a senzüa liasü.

²⁹Aser Grik o jembiba Yihuda nungertem den jembia aser o toktepa liasü; saka parnoki pa tepsettsü bushia liasü.

³⁰Aser kodang adianutemi ya metet, parnoki pa Kaisariai anir alu aser Tarsai yokadok.

³¹Anungji Yihuda, Galil aser Samaria lima ajak nung arogoji tesünep nung liasü. Aser Kibuba akhüm tsübuba nung renloka aser yanglushia liasü; aser Tanela Temeshi tajungshiba nung maneni yina liasü.

³²Peteri ajakleni oa Luda nung Tsüngrem nüburtem alidaki alu.

³³Aser idakji Ainea tenüng agi nisung ka shiba togimra agi shiranga küm ti tashi yipten nung liasü pa ajuru.

³⁴Peteri pa dang ashi, “Ainea, Yisu Khristai na anebtsür, shishiang, aser ne yipten loktenang.” Idangyongji pai shishi.

³⁵Luda aser Sharon nung alir ajaki pa angu; aser parnoki Kibuba dangi meyip.

³⁶Yopa nung Yisu dak amanger ka tenüng agi Tabitha liasü (Grik o nung Dorka, tetezü Mesü chanu). La mapa tajung agi sünga liasü, aser angati aika agüja liasü.

³⁷Iba mapang nung la shirang aser süadok. Parnoki la temang shidoker, temaba taktang nung yua liasü.

³⁸Aser Yopaji Luda anasa ali nung, nütsüngtemi Peter idakji aliba angashia, pa dangi nisung ana yoka mepishia ashi, “Onok dangi meyipa arung.”

³⁹Aser Peteri arameso aser parnok den ao. Pa atongdang parnoki temaba taktang jagi pa anir atu, aser amitsür ajak la tsütsü noktaker jeba la parnok den taküm alidang yangluba süoshi aser süpoksü sayua liasü.

⁴⁰Saka Peteri parnok ajak tugudaktsü aser apudaka sarasadem. Tasümang tsütsü shir pai ashi, “Tabitha, shishiang.” Idangji lai tenük lapok, aser kodang lai Peter angu lai shishia amen.

⁴¹Peteri la teka nung amer noktakdaktsü, aser temeshi purtem aser amitsürtem jar la taküm lia parnok nem agütsü.

⁴²Ibai Yopa ajak nung meteta aküm aser aikati Kibuba dak amang.

⁴³Yopa nung shiküp yanglur Simon tenüng agi nisung ka den anogo aika pai idakji ali.