Read njo ROM 1 Bible Online

ROM 1 - njo bible

ROM 1

¹Paul, Yisu Khrista lar ka, tenyar ka asütsü Tsüngremi aja, aser Tsüngremer Osangtajung asoshi shimtet.

²Iba Osangtajung Tsüngremi Temeshi Laishiba nung pei ainkartem ajanga nangzük.

³Iba Osangtajung pa Chir indang lir, shiba shi agi Dawid metsü nungi jakzük

⁴saka Tanela Temeshi agi tasü nungi shia aruba ajanga ain nung pa Tsüngrem Chir ta sangoktsü.

⁵Yisu Khrista asen Kibuba, pa ajanga aser pa tenüng atema, bendanger shirnokisa amangdir parnoka tashi angaba dangi jadentsü atema onoki Tsüngrem taochi aser tenyar akümtsü agizük.

⁶Nenoka parnok rongnungji densema lir kechiaser nenoka Yisu Khristai aja.

⁷Tsüngremi meimba aser temeshi pur asütsü ajaba Rom nung alir ajak dangi asen Tebu Tsüngrem aser Kibuba Yisu Khrista nungi nenok dangi taochi aser tesünep sang.

⁸Tamasa nenok ajak asoshi Yisu Khrista ajanga ni kü Tsüngrem tenüng asanger, kechiaser nenok tamang indang alima ajak nung prokshia odagi.

⁹Kechiyong kü sarasadem nung ni maneni nenok bilemtetdagi ta pa Chir Osangtajung nung Tsüngrem shiba dang ni tenzüker, paji kü kuli lir.

¹⁰Ya Tsüngremi mulungba süra, kenü anogobosa ni nenok semdangtettsü ta ni teti sarasadema atar.

¹¹Kechiyong nenok akangshidaktsütsü aser nenok den tanela sempet lemsateptsü asoshi ni nenok ajurutsü yongyar.

¹²Oda asenok tamang agi kati ka ajungshiteptsü asoshi.

¹³Adianutem, ni tangar Bendangertem rongnung ama nenok rongnunga süngjang kar angutsü asoshi ni nenok dangi arutsü aiben bilema liasü, saka tang tonga titema lir, ya ni nenok nem metetdaktsür.

¹⁴Grik nungertem aser tangartem anaprongla dang, temetetertem aser mashirtem dang sakuku tenzüktsü ni khuret kar.

¹⁵Anungji nenok Rom nung alir danga akok tashi Osang tajung sayutsüngitsü ni jangraseta lir.

¹⁶Kechiyong Osangtajung asoshi ni maker; kechiaser ibai tamangertem oda mezüngbubaji Yihuda nunger aser Grik nunger ajak kümzüktsü Tsüngremer ain lir.

¹⁷ Kechiyong tamang ajanga Tsüngrem tsüngdang temeten angubaji Osang tajung ajanga jungkai adok, zülua aliba ama, “Temeshi pur tamang agi taküm alitsü.”

¹⁸Kechiyong nisungtem shirnoki pei tamajungba agi ochiji nungtemer parnok temenen aser memeshiba anema Tsüngremer terasaba kotak nungi jungkai adoka lir.

¹⁹Tsüngrem indang metettsüba ajakji parnok tsüngdang odia jungkai adoka lir; kechiyong Tsüngremisa aji jungkai adokdaktsü.

²⁰Kechiyong alima yangluli nungi, tatem makaba pa ain aser Tsüngrem yimya itemji munguaka, teyangluba osettem ajanga itemji angatettsü jangjajangja-a dang jungkai adoka kar. Anungji parnok telangzütsü maka.

²¹Parnoki Tsüngrem meteta liaka, saka parnoki pa nem tim tetushi mesüra nüngsang magütsü; saka parnok amajok tebilemba shisatsütem nung ali, aser parnok tamashi mulungjang manga kümdaktsü.

²²Tashitemetetertem ta shia, parnok sasa tamashirtem aküm.

²³Aser tasütsüba meimchir, ozüsangnu, tetsüng pezü atenba shirurutem aser juzüa senzüba shirurutem mesükba süngyanglutem agi tamasüba Tsüngrem sentsüwangshi melentep.

²⁴Anungji parnok rongnung pei temang mezüngmeshidaktsütsü asoshi Tsüngremi parnokji memerükbalen parnok mulungjang jabujariba nem bendanga agütsü.

²⁵Parnoki tiyazü den Tsüngrem ochiba melentep, aser Teyanglur shiba teti asangtsü tim, ibaji melena teyangluba osettem akhüm tsübu aser tenzük, Amen.

²⁶Anungji maksütsü shi azü jangraba nem Tsüngremi parnok bendanga agütsü. Kechiyong tetsürtemi yimya benshiba kazüba toktsür koba yimya masü aji parnok rongnung inyak.

²⁷Aser kasaji teburtemia tetsür den kazüba yimya toktsür kati ka den jabujaritsü tenzük, aser parnok mashikoshi yimya benshiba talang pei dak atalok.

²⁸Kechiaser metetba shisatsü agi inyaktsü menangzük nung tim masüba mapa inyaktsü asoshi aser taktsü maketba temenen mulungjang nem Tsüngremi parnok bendanga agütsü.

²⁹Parnok tamajung, tara, tenükshiba, aser shisatsü tamajung agi sünga lir. Parnok nükmerem, tepsetba, rarabangsen, tekülak aser tesempa agi sünga kar,

³⁰parnok nüngsenbangsen o jembirtem, ashikülaker, Tsüngrem toktsüba aser Tsüngrem mezüngmeshiba nisungtem aküm. Parnok tekong temerang, naloknara, tamajung mapa shisadangertem, tsüraburtem dang tashi mangabatem;

³¹mangatetba, akhüm-maket, kibong temeimtep makaba, yimlibilem makaba purtem dang lir.

³²Yamala mapa inyakertem tasütsü tetemsü ta Tsüngremer Ozüng lateta alibaji tim dang lir: kechiaser parnoki itemji inyakba dang masü, saka ano itemji inyakba nisungtem dang parnoki pelar.