Read njo ROM 12 Bible Online

ROM 12 - njo bible

ROM 12

¹Anungji adianutem, nenoki pei mang taküm tenla ka, temeshi aser Tsüngremi agizüktettsüsa tenla-ang ta ni Tsüngrem taochi agi nenok ajungshir. Ibaji nenok tanela tekülemba lir.

²Iba lima putu yimya den sütepa telima, saka nenok temulung asentenshiba agi nenok taküm yimya melenshidakjang; anungji kechi tajung tagizüktettsü aser tabensaba Tsüngremi mulungba lir, aji nenoki angatettsü.

³Kechiyong tim bilemba dang nungi pei indang tali ulua tebilem. Saka Tsüngremi nisung shia nem kechi tasazük agi tamang agütsü, iba yariji pei indang ajemajema bilemang ta ni kü nem agütsüba taochi ajanga nenok rongnung nisung shia dang ajungshir.

⁴Kechiyong kechi koda temang ka nung tenük-telen aika lir aser tenük-telen ajak mapa kasa masü,

⁵aji oda asenoka aika liaka asenok Khrista nung temang ka lir, aser nisung shia kati ka den tenük-telen küma lir.

⁶ Aser asenok nem agütsüba taochi yari sempet balala asünung ainkar sempet süra, tamang yari ainkar o jembiang;

⁷mesüra tenzükba nung bendanga agütsüdi, mesüra shibai sayur pai sayuang, mesüra shibai ajungshir, pai ajungshiang.

⁸Shibai agütsür pai mulungbena agüjang; shibai yimsü asür pai nendaka yimsü süang. Shibai yimlibilem sayur, pai pelashishia sayuang.

⁹Anemsü medeni temeim liang. Koba tamajung aji sempa-ang; koba tajung aji azüitang.

¹⁰Adianu temeimtep agi kati ka den meimtepang; akhümtsübu nung kati ka taoba ta bilemang.

¹¹Tejangraba nung anüanüa teli. Tanela nung jangrabangra liang.

¹²Kibuba tenzüka liang; teimla nung pela-ang, timtem tekangshi nung aremzükang; sarasadem nung maneni akang akanga liang.

¹³Temeshi pur tenüngdaktsü nung agüjang; aener dang temeim sayuang.

¹⁴Nenok rishikangshirtem dang moajang, moajang aser atakatem tesüma.

¹⁵Tepelartem den pelatepang, tajebertem den jebtepang.

¹⁶Nenok kati ka den temulung kasasa liang. Ulutsü mapa indang tebilem, saka ajemalu mapa nung jaja-ang. Nenok tiak tesang.

¹⁷Shinga nema tamajung melen tamajung tagütsü; nisung ajak tsüngdang kechi ochi lir ibaji inyaktsü nükjidong yuang.

¹⁸Kokrabang naibo nisung ajak den yimjung nung liang.

¹⁹Temeimbatem, nenok sasa mang teyang; saka Tsüngrem ain adokba ata-a liang, kechiyong yamai zülua lir, “Kibubai ashir, Mangyangba kü meyong, ni shia agütsütsü.”

²⁰Saka ne tsükchir yara, chiyungdakjang; Tzürara jemdakjang. Kechiyong ya inyakdang nai pa tekolak manung mi jangrua aliba mijang nangtentsür.

²¹Tamajung agi tekokdaktsü, saka tajung agi tamajung kokdakjang.