Read njo ROM 13 Bible Online

ROM 13 - njo bible

ROM 13

¹Nisung shiai yimsüsürtem kübok liang, kechiyong tashi ajak Tsüngrem nungi aser yimsüsüba bangdakji Tsüngremi latettsüba lir.

²Anungji shibai yimsüsüba bangdak anema noktakdir, pai Tsüngremi shimtetba anema noktaker. Aser shiri yamaji inyaker parnoki pei sasa obendangba angutsü.

³Kechiyong yimsüsürtemji mapa tajung inyakertem asoshi tetsübutsü mali. Saka majung inyakertem asoshibo tetsübutsü. Yimsüsürtem metsübui nai linür ama? Kechi tajung aji inyakang aser pai na asangtsü. Kechiyong na ajungtsü atema pai Tsüngrem tenzüker. Saka nai mejungi inyakra, na tetsübutsü.

⁴Kechiaser ne dang tajung inyaktsü atema pa Tsüngrem tenzüker lir. Saka nai tamajung inyakra tsübuang, kechiyong amajok nung pai nok mabener. Aibelener dang merenshitsü paji Tsüngrem tenzüker ka.

⁵Anungji Tsüngremer ain adokba tsübubaji dang masü, saka nenok mulungsentsü atemaka nenoki bangdak tashi angang.

⁶ Kechiyong iba atema nenoki alimelen agütsür; kechiyong Tsüngrem tenzükertem ama yimsüsürtemi ya asoshi mapa inyaker.

⁷Shir nem kechi agütsütsü tim aji agüjang, alimelen aser taatem, tetushi aser akhüm tsübuba, shir dang kechi tim inyaktsü ali, yamaji inyakang.

⁸Kati ka den meimtepang, saka shinga dang sentsühtsür teküm, kechiyong shibai tangar meimer, pai ozüng atalokdaktsüogo.

⁹Kechiyong, “Nai nüktapangta tebenshi, nai tetepset, nai tauya, nai Tenükshi” ta aliba temelaba ozüng aser ano tanga temelaba ozüngtem iba o nung amendaka lir: nai ne kiyonger pei ama meimang.

¹⁰Temeimi kiyonger dang majung meinyaker, anungji ozüngji temeimi atalokdaktsür.

¹¹Ibai ajanga tabensaba mapangji tongogo ta nenoki metet. Nenok amua oa aliba nungi saktsü mapang tongogo kechiyong asenoki mezüng amangba dang nungi tekümtetji tang anasaba lir.

¹²Ammang talangka süiogo, sangwatsü mapang anasa lir. Anungji asenoki ammang mapatem toktsüdi aser tesangwa raraba nok-onü sobudi.

¹³Asenoki tesangwa nung ama ochishia jajadi, chidiyungdi aser yi mesepba nung masü, shi taginüba aser jabujariba nung masü, raraba aser tenükmerem nung masü.

¹⁴Saka nenoki Kibuba Yisu Khrista sobuang, aser shi taginüba ataloktsü asoshi shi mapatem tebilem.