Read njo ROM 14 Bible Online

ROM 14 - njo bible

ROM 14

¹Shiba tamang nung tashi mait, nenoki paji agizükang. Saka pa den obang mapui bangsenteptsü atema masü.

²Nisung ka tamang tangatetba agi pai kechisarena ajak chitet. Saka tangar kajibo tamang nung tashi mait, aser pai süngolemba ang achir.

³Nisung shibai kechisarena ajak chitet, pai tangar shibai yamaji mechitet pa mezüngmeshi tesü. Aser shibai mechiteter pai shibai kechisarena ajak chitet, pa o tebendang, kechiyong Tsüngremi pa agizükogo.

⁴Tangar kilir o bendangtsü na shiba? Pa alangaka mesüra noktakaka aji pa Kibuba mapa lir. Aser pai noktaktettsü kechiaser Kibubai pa noktakdaktsütsü.

⁵Nisung kati anogo ka dangbo tanga anogo ka tajungba ta bilemer, tangar nisung kati anogo ajak mesüktepa lir ta bilemer. Nisung shiai pei temulung nung jangja jangja-a metetdakjang.

⁶Shibai anogoji temeshi ta amanger pai aji Kibuba nüngsang atema amanger. Aser shibai shi achir; pai Kibuba nüng sanga achir. Kechiyong pai Tsüngrem nem tenüngsang agütsür. Aser shibai machir, pai Kibuba atema machir, aser pai Tsüngrem nem tenüngsang agütsür.

⁷Kechiyong asenok shinga pei atema taküm malir aser pei atema masür.

⁸Kechiyong asenok taküm lira, asenok Kibuba atema taküm alir, aser asenok süra, asenok Kibuba meyong.

⁹Kechiyong tasür o taküm alir na madak Kibuba akümtsü Khrista asü aser shia aru.

¹⁰Saka na, kechiba nai ne adianu o bendanger? Mesüra ano kechiba nai ne adianu mezüngmeshir? Kechiaser asenok ajak Tsüngrem o bendangba menden jakdang noktaktsü.

¹¹ Kechiyong yamai zülua lir: “Ni taküm aliba Tsüngrem ta Kibubai ashir; Temokok ajaki kü tsüngdang apudaktsü, aser temeli ajaki ni Tsüngrem ta nangzüktsü.”

¹²Anungji asenok nisung shiai pei indang Tsüngrem dang osang agütsütsü.

¹³Anungji joko kati ka o mebendangli: saka nenoki ya lemtetang shingaia pei adianu lenmang nung temetsüdaktsü mesüra talangdaktsüma.

¹⁴Kibuba Yisu nung ni mulungteter, Kibuba Yisu nung ni amanger, memeshiba oset kecha mali; oda shibai oset kaji memeshi ta züngshir aji pa asoshi memeshi lir.

¹⁵Kechiyong nai koba achir ibaji ajanga ne adianu jashidaktsüra, nai temeim nung mejajar. Shiba atema Khrista asü ne chiyungtsü atema pa tesamadaktsü.

¹⁶Anungji nenok madang kechi tajung lir aji tamajung ama tangar nem tejembidaktsü.

¹⁷Kechiyong Tsüngrem yimliji tachi-tajemba ama masü, saka tanela Temeshi nung temeshiba, tesünep aser tepela lir.

¹⁸Kechiyong shibai iba nungji Khrista tenzüker pai Tsüngrem temulung chidaktsür; aser nisung madang tajung lir.

¹⁹Anungji kechi agi tesünep adokdaktsür aser kechi agi kati ka jakla nung tashi itdaktsür, itemji asenoki benshidi.

²⁰Chiyungtsü atema Tsüngremer mapa teraksadaktsüma. Chiyungtsü ajak atangji tajung lir, saka shibai kechi achir iba jagi metsüdaktsüra, pa asoshi aji temenen lir.

²¹Shi achiba süshia, yi ajemba süshia aser kechi agisa ne adianu metsüdaktsür itemji meinyaktsü junger.

²²Na akaba tamangji Tsüngrem nena tsüngda yuang. Koba junger ta agizüker iba nungji shibai pei sasa o mebendanger, pa tepelatsü.

²³Saka atsüayonga chira pa aitsür, kechiaser pai tamang agi machir, aser kechisa tamang agi masü aji temenen.