Read njo ROM 15 Bible Online

ROM 15 - njo bible

ROM 15

¹Saka asenok shir tamang nung tashi aitertem lir, pei indang mebilemi tangar tashi maitertem mokokmin nung yaritsü tim.

²Asenok nisung shia pei kiyonger pelatsü aser tajung kümdaktsütsü indang bilemtsüla.

³Kechiyong Khristaia pei indang mebilem. Saka zülua aliba ama: “Shiri na atala parnoki atalaba kü dak kao.”

⁴Kechiyong ajemalu, taremzük ajanga aser Laishibai ajungshiba ajanga asenok teimla akatsü asoshi kechi akhidang zülua yutsü itemji asenok dang sayutsü asoshi liasü.

⁵Tang marakzüba taremzük aser tajungshiba Tsüngrem nenok kati ka den Khrista Yisu mulungba nung temulung ka asütsü nenok nem agüjangma.

⁶Anungji nenok ajak külemi obang ka sür asen Kibuba Yisu Khrista Tebu aser Tsüngrem sentsüwangshidakjang.

⁷Anungji koda Khristaia nenok agizük, yamaji nenokia Tsüngrem sentsüwangshi atema kati ka agizükang.

⁸Tebuditem nem agütsüba tenangzükbatem akangdaktsütsü asoshi Tsüngrem ochishiba nung temejeptokbatem dangi Khristaji kilir ka aküm ta,

⁹aser pa yimlibilem asoshi Bendangertemi Tsüngrem tenüng asangtsü asoshi Khristaji kilir ka aküm ta ni ashir. Zülua aliba ama: “Anungji ni Bendangertem rongnung ne tenüng asangtsü, aser ne tenüng nung ken tendi.”

¹⁰ Ano pai ashir, “Bendangertem pa purtem den pelatepang.”

¹¹ Aser ano, “Bendangertem ajaki Kibuba tenüng sangang. Aser nisung ajaki pa tenüng tushidakjang.”

¹²Aser ano Isaiai ashir, “Bendangertem madak yimsü asütsüsa, Yesse tera nungi süngsem ka adoktsü, pa dak Bendangertemi imlatsü.”

¹³Tanela temeshi ain nung teimla agi moshia asüngtsü asoshi, teimla Tsüngremi tamangba nung tepela aser tesünep ajak agi nenok süngdakjang.

¹⁴Kü adianutem, nenok pei sasa tajungba aser temetetba ajak agi sünga aliba aser kati ka ajungshiteptsü akok ta ni pei sasa nenok indang amanger.

¹⁵Kechiaser kü nem agütsüba Tsüngrem taochi yari nenok nem bilemtetdaktsütsü asoshi ni tesem kar nungbo kanga tasü ita züluogo.

¹⁶Bendangertemi tenlabaji Tanela Temeshi agi meshitetja Tsüngrem tsüngdang tagizüktettsü kümdaktsütsü asoshi, Tsüngremer Osangtajung putir ka ama Bendangertem dangi Khrista Yisu tenzüker ka akümtsü Tsüngremi taochi agütsü.

¹⁷Aji asünung Tsüngrem asoshi kü mapa indang ulutsüba Khrista Yisu nung ni kuli kar.

¹⁸Kechiyong o aser mapa agi, temaitsü aser tesüngmangtsü ain nung, Tanela Temeshi ain agi Bendangertem tashi angadaktsütsü Khristai ni ajanga kechi inyak, iba dak alema ni tasü ita tanga kecha mejembili.

¹⁹Anungji ni Yirusalem temeket nungi tenzüka Ilurika tashi ni Khrista Osang tajungji Tanela tashi aser sayatenya nung sayutsüngiogo.

²⁰Tangari inyakba tazüngdak manung meyangluloktsü asoshi kongsa Khrista indang mangashi, idakji Osangtajung sayutsüngitsü kü nükjidong liasü.

²¹ Saka zülua aliba ama, “Shirnok dangi pa Osang maru parnoki angutsü, aser shirnoki mangashi parnoki angatettsü.”

²²Nenok dangi marutettsüsa aiben dang ni timtemdaktsüba kuliji aji liasü.

²³Tang joko item linük nung kü mapa ni koktetba tashi renemteta adok nung, aser küm aika nenok dangi arutsü yongya-a ata nungji;

²⁴ni Spain lima jagi otetrabang ni aji agi aodang nenok semdangtsü imlar, aser nenok den khen munger külen, nenok teyari ajanga ajagi aotsü ta imlar.

²⁵Saka tangbo temeshipur tenzüktsü asoshi ni Yirusalemi aor.

²⁶Kechiyong Makedonia aser Akaya arogotemi Yirusalem nung aliba temeshipurtem rongnung sensakertem asoshi tenla sarua yaritsü junger ta lemtet.

²⁷Hau, parnoki aji inyaktsü pelashishia liasü, aser atangji parnoki item sensakertem yaritsü sentsütsür küma lir; kechiyong Yihuda nungertemi pei tenla temoatsütem agi Bendangertem den lemsatepogo, aji asünung Bendangertemia pei ali temoatsü agi Yihuda nungertemji tenzüktsü tim.

²⁸Anungji kodang ni ibai renemdir aser iba tesarutetbaji parnok nem jungjunga bendanga agütsür külen, ni Spain limai aodang ni nenok semdangtsü.

²⁹Aser kodang ni nenok dangi arudir, Khrista temoatsü tabensaba agi arutsü ta ni metet.

³⁰Adianutem, ni nenok dang asen Kibuba Yisu Khrista temeim ajanga kü den külemi ni asoshi Tsüngrem dang maneni sarasademjang ta mepishir,

³¹aser ibaji ajanga Yihuda nung aliba mamangba purtem teka nungi ni kümzüktsü, aser Yirusalem nung kü tenzükbaji temeshipurtem madang tagizüktettsü asütsü.

³²Anungji Tsüngremi mulungba süra ni nenok dangi pelashishia arua nenok süngzükdaktsütsü.

³³Aser tesüneptsüba Tsüngrem nenok ajak den liang. Amen.