Read njo ROM 4 Bible Online

ROM 4 - njo bible

ROM 4

¹Ajangla asen tebou Abrahami shi tsütsü nungi kechi tajangzük angu ta aseni ashitsü?

²Kechiyong Abraham mapa agi metentsüra pai asükümtsü akok. Saka Tsüngrem matsüngdang masü.

³Kechiyong Laishibai kechi ashir? “Abrahami Tsüngrem dak amang, aser pa tamang asoshi Tsüngremi pa temeshi ta züngshi.”

⁴Kechiyong nisung kati mapa inyakra, pa taaji sempet ama masü saka sentsüh ta züngshir.

⁵Saka shibai mapa meinyaki ochi mashiba pur metendaktsüsang dak amangdir, pa tamangji temeshiba ama züngshitsü.

⁶Tsüngremi shiba dang mapa medeni temeshiba ta züngshir pa tepelatsü, iba indang Dawidi yamai ashir:

⁷“Shirnok tai tokogo, aser shir temenentem endoktsüogo parnok tepelatsü.

⁸ Shiba dak Kibubai temenen sentsüh mezüngloktsü, iba nisung tepelatsü.”

⁹Anungji iba tepelatsü mejeptokba pur asoshi dang asü mesüra memejeptokba pur asoshia alitsü? Kechiyong asenoki ashir, “Abraham pa tamang asoshi Tsüngremi pa temeshi ta züngsem.”

¹⁰Ajangla aji koda züngshi? Pa mejeptoker külen asü, mesüra memejeptok dang? Pa mejeptoker külen masü, saka memejeptoki alidang liasü.

¹¹Memejeptoki alidang pa tamangji temeshiba ta züngshitsü atema pai temejeptokbaji agizük. Anungji memejeptokia shirnoki amangdir parnok ajak tebuji pa akümtsü, aser parnok tamangji temeshiba ta züngshitsü.

¹²Ano temejeptokertem oda yimya ka nung mejeptokba pur masü, saka asen tebu Abraham pa memejeptok dang akaba tamang tsüngsü nungji anitakertem tebu akümtsü asoshi pai temejeptokba temaitsüji agizük.

¹³Tsüngremi Abraham aser pa semchirtem nem parnoki alima senmang amangtsü ta tenangzükba agütsübaji ozüng ajanga masü, saka tamang temeshiba ajanga lir.

¹⁴Kechiyong ozüng benshirtemji senmangertem kümdaktsüra, tamangji tazüngla aser tenangzükbaji amajok akümer.

¹⁵Kechiyong ozüng jagi terasaba bener arutsür, saka kong ozüng maka idakji ozüng dang tashi mangabaji mali.

¹⁶Abrahamji asenok ajak tebou asünung tenangzükbaji ozüng benshirtem dangiang masü, saka pa tamang lemsatepertem; oda pa semchirtem ajak dangi ibaji Tsüngremer angati sempet ka ama mela-a lir, ibaji tamang dak metaloka lir.

¹⁷Zülua aliba ama, “Kin aika tebu ni na kümdaktsüogo.” Kechiaser Tsüngrem shiba dak Abrahami amang aser shibai tasür takümdaki shia arudaktsür; aser khenyongi maliba osettem pa ozüng agi poktetdaktsür pa madang tenangzükbaji tajung lir.

¹⁸Aji oda ne semchirtemji alitsü ta pa dang ashiba amato paji kintem aika tebu akümtsü asoshi teimla maka danga pai amang aser imla.

¹⁹Aser pa küm noklang ka shi tain asünung, pa temang tasü ama aser Sarah nu menden tapung ta bilemaka, pai tamang nung kodanga tashi meiti maküm.

²⁰Saka Tsüngrem tenangzükba nung kodanga rata-a, mesüra tamang makai maliasü, aser pai Tsüngrem nem tenüngsang agütsü

²¹Saka pai kechi nangzük, ibaji Tsüngremi ataloktsütsü akok ta pai jungjunga amang.

²²Anungji pa tamangji temeshiba ta züngshi.

²³Pa züngshi ta aliba otemji pa asoshi dang mezülu.

²⁴Saka asenok asoshia aji zülua lir. Kechiyong shibai asen Kibuba Yisu tasü nungi shia arudaktsü, pa dak asenoki amang nung ano asenok atema asen tamangji temeshiba ama züngshitsü.

²⁵ Iba Yisu asen temenen asoshi bendanga agütsü aser asenok metendaktsütsü asoshi tanaben shia arudaktsü.