Read njo ROM 5 Bible Online

ROM 5 - njo bible

ROM 5

¹Anungji tamang ajanga asenok metendaktsü nung asen Kibuba Yisu Khrista ajanga asenok Tsüngrem den tesünep nung lir.

²Aser koba taochi nung asenok noktaker iba taochi daki pa ajanga asenoki tamang agi alitsü nguogo, aser asenoki Tsüngrem sentsüwangshi asoshi imla-a pelatepdi,

³aser aji dang masü, saka asenoki timtem tekangshi nunga pelatepdi, kechiaser timtem tekangshi nungi taremzük adoker, aser taremzük nungi tasü tait adoker.

⁴Aser tasü tait nungi teimla adoker ta asenoki metet.

⁵Teimlai asenok temulung makai mekümdaktsür, kechiaser asenok nem agütsüba Tanela Temeshi ajanga Tsüngremer temeim asen mulung nung moshia lir.

⁶Kechiyong asenok ano tashi mait alidang, tetemsü mapang nung temenenpur asoshi Khrista asü.

⁷Kechiaser temeshi nisung ka atema shingaia mesünür, saka nisung tajung ka atemabo tasütsüa tasü aittsü südi.

⁸Saka asenok ano menenpurtem alidang asenok asoshi Tsüngrem temeim kodaka ali aji sayur. Khrista asenok asoshi asü.

⁹Tang Khrista zü agi asenok metendaktsü nung, idakji chia Tsüngrem ain adokba nungi asenok pa ajanga kümzüktsü.

¹⁰Kechiyong asenok ano Tsüngremer tsükchirtem ama alidang, par Chir asüba ajanga asenok Tsüngrem den putepdaktsü nung aser atangji asenok pa den putepa alinung, pa Chir taküm agi asenok kümzüktsü.

¹¹Aser aji dang masü, saka ano asen Kibuba Yisu Khrista, shiba ajanga asenoki tang teputepba nguogo, pa ajanga asenoki Tsüngrem dak pelar, kechiyong Tsüngremi pa Chir ajanga aji oda asen asoshi inyak.

¹²Anungji kechi koda nisung ka ajanga temenenji aru aser temenen ajanga tasübaji aru, aji oda nisung ajak madak tasüba agi atong; kechiaser ajaki temenen mena.

¹³Kechiyong ozüng malidanga alima nung temenen liasü, saka ozüng malidang temenenji mesükshi.

¹⁴Aji oda Adami temenen menaba ama shirnoki temenen memena, parnok madaka Adam nungi Mosa tashi tasüba agi yimsü süa liasü. Tarutsü aliba temaitsüji Adam liasü.

¹⁵Saka angati sempetji temenen amaji masü. Kechiyong nisung ka temenen ajanga aika madak tasüba agi atong süra iba dang tali Tsüngrem taochi aser nisung ka, oda Yisu Khrista, taochi nung angati sempetji aika asoshi moshia aküm.

¹⁶Aser angati sempetji nisung ka temeneni adokdaktsüba mapa ka mesüka masü. Kechiyong temenen ka sülen aruba obendangba jagi taitsübaji bener arutsü; saka temenen aika sülen aruba angati sempet jagibo metendaktsüba bener arutsüogo.

¹⁷Kechiyong nisung temenen agi pa ajanga tasübai yimsü süra, iba dang tali taochi tulu aser temeshiba sempet agizükertemi nisung ka oda Yisu Khrista ajanga taküm nung yimsü asütsü.

¹⁸Kechi koda nisung ka temenen jagi nisung ajak asoshi taitsüba dangi anir, aji oda nisung ka temeshiba jagi nisung ajak temetenba taküm dangi anir.

¹⁹Kechiyong kechi koda nisung kati tashi mangaba ajanga nisung aika temenen pur kümdaktsür, aji oda kati tashi angaba ajanga aika temeshipur kümdaktsür.

²⁰Temenen züindaktsütsü asoshi ozüngji aru, saka kong temenen tali liasü, idakji taochia tali liasü.

²¹Temeneni tasü madak yimsü asü ama, aji oda Kibuba Yisu Khrista ajanga teti taküm dangi temeshiba ajanga taochi agi yimsü asütsü asoshi ya atalok.