Read njo ROM 8 Bible Online

ROM 8 - njo bible

ROM 8

¹Anungji tang Khrista Yisu dak alirtem asoshi taitsüba mali.

²Kechiyong Khrista Yisu dak tanela ozüng agi temenen aser tasüba ozüng nungi ni nüji kümdaktsü.

³Kechiyong nisunger tashi mait ajanga ozüngi kecha meinyaktet; aji Tsüngremi inyak. Asenok mesükba temang kasa nung, nisunger temang nung, Tsüngremi pei Chir temenen aitsütsü asoshi yok.

⁴Nisunger yimya tashi maitba yong ozüngi kecha meinyakteti aküm, aji Tsüngremibo inyaktetogo. Aser temenen samatsütsü asoshi nisunger temenen yimya mesükba yimya keter temenen asoshi tenla ka ama pai pei Chir yokba ajanga shi nung aliba temenenji pai aitsüogo.

⁵Kechiyong shiri nisunger yimya ama alir parnoki nisunger yimya indang bilemer. Saka shiri tanela yimya ama alir parnokji tanela yimya ama akümer.

⁶Kechiyong nisunger yimya indang bilembaji tasüba lir, saka tanela yimya atenbaji taküm aser tesünep lir.

⁷Kechiyong temenen shisatsü atenbaji Tsüngrem anema lir. Kechiaser ibaji Tsüngrem ozüng kübok mali, mesüra iba jagi melitettsü.

⁸Shirnoki temenen yimya nung alir parnoki Tsüngrem mulung chidaktsütsü makoker.

⁹Saka Tsüngrem Tanela nenok dak lira, shi yimya nung masü saka Tanela yimya nung alir. Saka shiba dak Khrista Tanela mali, paji pa meyong masü.

¹⁰Aser nenok dak Khrista lira, temenen atema temangji tasü lir saka temeshiba agi Tanelaji taküm lir.

¹¹ Saka Tsüngrem Tanela shibai Yisu Tasü nungi shia arudaktsü, iba Tanela nenok dak lira, shibai Yisu tasü nungi shia arudaktsü, iba kasa Tanela jagi nenok tasüba temang nema taküm agütsütsü.

¹²Anungji adianutem, asenok shi yimya amato alitsü shi yimya dang sentsühtsür masü.

¹³Kechiyong nenok shi yimya amato lira, nenok asütsüla; saka Tanela agi temang mapatem südaktsüra, nenok taküm alitsü.

¹⁴Kechiyong kwika Tsüngrem Tanela agi anir, parnok Tsüngrem chirtem lir.

¹⁵Kechiyong nenoki tanaben tsübutsü asoshi talenba tanela magizük, saka Tsüngrem pei meyong kümdaktsüba chir Tanela koba agi asenoki “Aba, Oba” ta ajar, iba Tanela nenoki agizük.

¹⁶ Asenok Tsüngrem chirtem ta Tanelai pei sasa asen tanela den kuli agütsür.

¹⁷Aser asenok techirtem süra, ajangla asenok senmangertem, oda pa den asenok sentsü wangshidaktsütsü asoshi asenoki pa den timtemra, asenok Tsüngrem senmangertem aser Khrista den senmangertem lir.

¹⁸Kechiyong tarutsü sentsüwangshi koba asenok dangi jungkai adoktsütsü, iba denji tang mapang nung asen timtembaji medemdangtsü makok ta ni züngshir.

¹⁹Kechiyong teyangluba lima ajongai Tsüngrem chirtem jungkai adokbaji kanga yongya-a atar.

²⁰Kechiyong tesamatsü talenba nung yua aliba teyangluba lima ajongaji pei-i mulungbayong masü saka shibai alentsür pai teimla ka asoshi yamaji inyak.

²¹Kechiyong teyangluba oset ajak tesamatsü aser talenba nungi Tsüngrem chirtem sentsüwangshi nüjiba dangi anitettsü.

²²Kechiyong teyangluba lima ajonga tang tashi külemi timtem tekangshi nung anünger ta asenoki metet.

²³Aser teyangluba lima ajongaji dang masü, saka asenok Tanela mezüng süngjang akartemia asenok Tsüngrem chirtem küma mesütetba, oda asen tamang alangzükba asoshi ata-a telunglen anünger.

²⁴Iba teimla nung asenok kümzük; asenoki imla-a alibaji asenoki ngura, teimlaji tetezü mali. Ngua akaba asoshi kari imlar asü?

²⁵Saka asenoki manguba asoshi imlara, asenoki iba asoshi taremzük agi atar.

²⁶Aser yamajisa Tanelai asen mokokmin yarir, kechiyong asenoki koda sarasademtsü tim aji memetet. Saka Tanelai pa sasa asenok asoshi mejembitetba tanüngba agi mepishitsür.

²⁷Aser shibai temulungjang bushir pai Tanela temulung meteter, kechiyong pai Tsüngrem mulungba ama temeshi pur atema mepishitsür.

²⁸Aser Tsüngrem meimertem shirnok pai mulungba ama ja-a lir, parnok tsüngdang mapa ajak külemi tajung asoshi inyakteper ta asenoki metet.

²⁹Kechiyong adianu aika rongnung Tsüngrem Chir mezüng asoba asütsü asoshi Tsüngremi shirnok alemli metet, parnok pa Chir mesüka kümdaktsütsü asoshi pai ano parnok alemli shimtet.

³⁰Aser shirnok pai alemli shimtet, ano pai parnok aja, aser shirnok aja, pai ano parnok metendaktsü, aser shirnok pai metendaktsü, pai ano parnok sentsüwangshidaktsü.

³¹Ajangla item indang asenoki kechi ashitsü? Tsüngremji asenok asoshi lira asenok anema shiba ali?

³²Shibai pei Chir sota meyui asenok ajak asoshi pa bendanga agütsü, pai ano asenok nem ajak magütsüli ma?

³³Shibai Tsüngremi shimtetba pur anema aitsütsü? Tsüngremi metendaktsür taitsüba shiba lir!

³⁴Khrista Yisu shiba asü, hau saka tasü nungi shia aru aser shiba Tsüngrem tajichilen mena lir pai asenok asoshi mepishitsür, Shiba aitsütsü?

³⁵Shibai Khrista temeim nungi asenok piladaktsütsü? Timtem tekangshi, mesüra toushi, mesüra rishikangshi, mesüra ayawara, mesüra mangsa, mesüra lendong, mesüra nok, item yagi koker ma?

³⁶ Zülua aliba ama, Na atema onok anogo tepiyong tepseter, tepsettsü san ama onok züngshi.

³⁷Ajangla item indang asenoki kechi ashitsü? Tsüngremji asenok asoshi lira asenok anema shiba ali?

³⁸Kechiyong tasüba süshia, taküm süshia kotak tenyartem süshia yimsüsürtem süshia, tang alibatem süshia, tarutsü alibatem süshia, ain aketbatem süshia, tema nung alibatem süshia,

³⁹telung nung aliba süshia, tangar teyangluba oset süshia, asen Kibuba Khrista Yisu dak aliba Tsüngrem temeim nungi asenok piladaktsütsü kechaia makoktsü ta ni chichia amanger.