Read njo ROM 9 Bible Online

ROM 9 - njo bible

ROM 9

¹Khrista nung ni ochi jembitsü, ni meyazür, mulungsentsüia kü indang Tanela Temeshi nung kuli agütsür.

²Oda kü mulung nung tejashi tulu aser manenba tekangshi lir.

³Kechiyong shi nung kü kinungertem atema takoktsüa ta sür-ang ni kü sasa dak atakatemba kaodaktsütsü aser Khrista nungi lepdokadokang ta dang sünüali.

⁴Parnokji Israel nungertem lir, pei chirtem ama Tsüngremi parnok mesütet, parnok dang pa sentsüwangshi sayua, tezüngzükbatem, ozüng, chichiba tekülemba aser tenangzükbatem agütsü.

⁵Parnokji kin tebu-teditem, aser shi tsütsü parnok nungi Khristaji jakzük. Tsüngrem shibai ajak madak yimsü asür pa teti temoatsüba sang! Amen.

⁶Saka Tsüngrem tenangzükba amajok aküm ta ni mashir, kechiyong Israel nungi tangzükba ajakjibo Israel nübur masü.

⁷Mesüra Abraham semchirtem ajakbo Tsüngrem chirtem masü; saka “Isak nungi jakzükbatem ne semchirtem ta ajatsü.”

⁸Iba tetezü meimchir yimya ajanga jakzüka aruba techirtemji Tsüngrem chirtem ta majar. Saka Tsüngremi nangzükba ama asobaji chichiba tenangzükba semchirtem ta ajatsü.

⁹Iba atema tenangzükba o itemi kar, “Tabensaba mapang nung ni arutsü aser Sarai jabaso ka asotsü.”

¹⁰Saka aji dangbo masü, saka Rebekar chirtem kasa tebu ajanga, shiba asen tebou lir.

¹¹Kechiyong techirtemji masodang aser tajung saka, majung saka mapatem agi masü saka pai ajaba agi, Tsüngrem teshimtetba nükjidongji maneni aotsüla.

¹²Aser pai Rebeka dang ashi. Tambusangi tanubusang tenzüktsü.

¹³ Zülua aliba ama, “Ni Yakob meim, saka Esau ni sempa.”

¹⁴Ajangla asenoki kechi ashitsü? Tsüngrem dak tamajung alitsü asü? Yamaji kodanga masü.

¹⁵Kechiyong pai Mosa dang ashi, “Shir dang ni yimlibilem sayunür, par dang ni yimlibilem sayutsü; aser shir dang ni aria bilemba sayunür, par dang ni aria bilemba sayutsü.”

¹⁶Anungji kechisarena ajakji meimchiri mulungba mesüra inyakba agi masü, saka Tsüngrem yimlibilem dak dang metaloka lir.

¹⁷Kechiyong Laishiba nung pai Farao dang ashi ama, “Ne dak kü ain sayutsü aser kü tenüng alima ajak nung sangdonga aotsü, iba asoshi ni na adokdaktsü.”

¹⁸Anungji shir dang pai yimlibilem sayunür pai yamaji inyaker, aser shir temulung merangdaktsünür pai par dang yamaji asür.

¹⁹Nai kü dang ashitsü, “Sürabang, kechiba pai tai apur? Shibai pai mulungba noktangtsü akok?”

²⁰Saka na shiba, Oh nisung, nai Tsüngrem den langzüteper? Temenoktetba ajung poi teyanglur dang, “Kechiba nai ni yamai yanglu” ta ashitsü asü?

²¹Mesüra ali telong kasa nungi shilem ka agi po tobur tajung ka aser shilem ka agi po tobur tamajung ka ta yanglutsü ajungli madakji poteper tashi mali ama?

²²Aji oda Tsüngremi kechi inyak ajia kasa dang shitak lir. Pai pa terasaba aser pa ainji sayunü. Anungji tesamatsü renema dang aliba potem shirnok dak pa terasaba mekeploktsütsü liasü, parnok dang pai kanga aremzüka liasü.

²³Aser asenok shir nem pa sentsüwangshi agizükdaktsütsü asoshi pai renema liasü, aser asenok shir dang pa yimlibilem sayutsü teti nükjidong lir, asenok madak koda sentsüwangshi pai mekeploktsü, iba pei sentsüwangshi tuluji pai ano jungkai adoka sayunü.

²⁴Aser asenok shir Yihuda nungertem rongnungi dang masü saka Bendangertem rongnungi pai asenok aja.

²⁵ Ano pai Hosea kaket nung ashiba ama; “Shirnok kü nüburtem masü, ni parnok dang kü nüburtem ta, aser memeimla dang temeimla ta ajatsü.

²⁶Aser parnok dang kong nenok kü nüburtem masü ta shia lir, idakji parnok dang taküm Tsüngrem chirtem ta ajatsü.”

²⁷Aser Isaiai Israel indang yamai ayimtena ashi, “Israel chirtem yongsük tzüyim lisem ama liaka, tanüngba ishika dang kümzüktsü.

²⁸Kechiyong alima nung Kibubai pa O yakta aser renema inyaktsü.”

²⁹ Aser Isaiai alemli ashiba ama, “Kotak telok Kibuba asenok nem metsü ka metoktsü asübo, asenok Sodom ama kümer lila aser Gomora ama kümdaktsür lila.”

³⁰Ajangla asenoki kechi ashitsü? Bendangertemi temeshiba mebushiaka, temeshibaji angu, oda temeshiba koba tamang nungi lir aji angu.

³¹Saka Israel nungertemi ozüng dak metaloker temeshibaji angutsü arishi nung Lai ozüngji mataloktsüteti takok mangu.

³²Kechiba? Kechiaser parnoki ibaji tamang agi masü saka mapa agi bushi. Anungji parnoki temetsüdakba lung nung metsüdak.

³³ Zülua aliba ama: “Ajiang, ni Zion nung nisungtem metsüdaktsütsü lung ka, Lung koba agi parnok laodaktsütsü, aji ayur, saka shibai pa dak amangdir pa makdaktsütsü.”