Read njo 1 KORINT 1 Bible Online

1 KORINT 1 - njo bible

1 KORINT 1

¹Paul, Khrista Yisu tenyar ka asütsü Tsüngremi mulunga ajaba, aser adianu Sosteni nungi,

²Korint nung aliba Tsüngremer arogo dangi, Khrista Yisu nung meshitetbatem aser temeshipur asütsü ajabatem, aser ajaklen asen Kibuba Khrista shiba parnok aser asen Kibuba lir, pa tenüng nung ajaba ajak dangi

³asen Tebu Tsüngrem aser Kibuba Yisu Khrista nungi nenok dangi taochi aser tesünep sang.

⁴Tsüngrem taochi koba Khrista Yisu nung nenok nem agütsü, aji asoshi ni nenok indang kü Tsüngrem tenüng teti asanger.

⁵Oda kechisarena nung, o jembiba ajak nung aser temetetba ajak nung, pa dak nenok takar aküm.

⁶Yamaji Khrista kuli nenok rongnung akangdaktsü.

⁷Anungji asen Kibuba Yisu Khrista jungkai adokba nenoki atadang nenok tanela sempet kecha nunga madoksai maküm.

⁸Aser asen Kibuba Yisu Khrista anogo nung nenok tai makai kümdaktsütsü asoshi pai nenok tatem tashi akangdaktsütsü.

⁹Tsüngrem shiba ajanga nenok pa Chir asen Kibuba Yisu Khrista den lungjemdaktsütsü aja, pa temulung lemtetba lir.

¹⁰Tang adianutem, nenoki obang ka sür jembitsü aser nenok rongnung telemsatep malitsü, saka temulung kasa nung aser obendangba kasa nung peridaktsütsü ta ni asen Kibuba tenüng ajanga nenok ajungshir.

¹¹Kechiyong kü adianutem, nenok rongnung bangsentepba lir ta, Kleor kinunger nungi nenok indang kü dang ashi.

¹²Ni ashibaji ya, nenok nisung shiai yamai ashir, “Ni Paul nübu;” “Ni Kefa nübu;” “Ni Apolo nübu;” aser “Ni Khrista nübu.”

¹³Khrista lemsa asü? Paul nenok asoshi kangki nung angenlok asü? Mesüra Paul tenüng nung nenok bapti asü?

¹⁴Nenok kü tenüng nung baptitsü ta shingaia mashitsüsa;

¹⁵Krispa aser Gaya dak alema nenok rongnung ni shinga mebaptitsü nung ni Tsüngrem tenüng asanger.

¹⁶Aser ni Stefaner kinungera baptitsü.

¹⁷Kechiyong baptitsütsü asoshi masü, Osangtajung sayutsüngitsü Khristai ni yok. Saka Khrista kangki ainji amajok kümdakja lir ta sür pai shisa taka o nung sayutsüngitsü ni meyok.

¹⁸Kechiyong tesamatsüba purtem asoshi kangki oji tamashi, saka asenok kümzükba purtem asoshibo ya Tsüngrem ain lir.

¹⁹ Kechiyong zülua aliba ama, Tashi-temeteter shisatsü ni samatsütsü; aser tasa takar tasaji ni amajok kümdaktsütsü.

²⁰Tashi-temeteter kong ali? Ozüng tesayur kong ali? Iba lima shisa rasar kong ali? Tsüngremi alima shisatsüji tamashi mekümdaktsü ama?

²¹Kechiyong Tsüngremer shisatsü nung alimai pei shisatsü ajanga Tsüngrem memetet nung, onoki sayutsüngiba tamashi o ajanga shiri amangdir parnokji kümzüktsü asoshi ibaji Tsüngrem mulung liasü.

²²Kechiyong Yihuda nungertemi temaitsü meshir, aser Grik nungertemi shisatsü bushir.

²³Saka onoki kangki nung angenlokba Khrista Osangtajung sayutsüngir. Paji Yihuda nungertem asoshi temetsüdakba lung aser Grik nungertem asoshi tamashi;

²⁴Saka ajaba purtem oda, Yihuda aser Grik nungertem anaprongla asoshi, Khristaji Tsüngremer ain aser Tsüngremer shisatsü lir.

²⁵Kechiaser Tsüngremer tamashibaji nisunger shisatsü dang nungi shisa takaba aser Tsüngremer tashi-maitbaji nisunger tashi tait dang nungi tashi taitba lir.

²⁶Kechiyong adianutem, nenok ajaba bilemdangang. Alima shi jenjang apibo nenok rongnung shisa-taka, tashi taiter aser tamarener aika mali.

²⁷Saka Tsüngremi tashi-temetetertem maksüdaktsütsü atema alima nung shisa makabatem shimtet. Aser tashi taitbatem maksüdaktsütsü atema alima nung tashi-maitbatem shimtet.

²⁸Kechi osetsa lir, aji amajok kümdaktsütsü asoshi alima nung tilaba mezüngmeshiba aser ano kechi osetsa maka, itemji Tsüngremi shimtet.

²⁹Aser meimchir shingaia Tsüngrem tsüngdang moulutsü asoshi item ajak Tsüngremi shimtet.

³⁰Saka Yisu, shiba nenok asoshi, Tsüngrem nungi shisatsü aser temeshiba aser temeshitetba aser talangzükba aküm, iba Khrista nung nenok Tsüngrem dak nungi lir.

³¹ Anungji zülua aliba ama, “Shibai ulur pai Kibuba nung uludakjang.”