Read njo 1 KORINT 10 Bible Online

1 KORINT 10 - njo bible

1 KORINT 10

¹ Kechiyong adianutem, asen tetsü-teboutem ajak mepet kübok nung liasü, aser ajaki tzüyim ajanga süi ta ni nenok nem memeteti melidaktsünür.

²Aser Mosa sülen anitaker ajak mepet nung aser tzüyim nung baptitsü.

³ Aser ajaki tesüngmangtsü tanela chiyungtsü ka dang chiyung, aser ajaki tesüngmangtsü tanela tajemtsü ka dang ajem.

⁴ Kechiaser parnoki parnok sülen anitakba tanela lung nungi ajem, aser iba lungji Khrista liasü.

⁵ Aji saka parnok nisung teimbaka dang Tsüngremi temulung machi liasü, aji asünung parnok arem nung samatsü.

⁶ Parnoki jangraba ama asenoki tamajung mejangratsü itemji asenok asoshi tatishitsü liasü.

⁷ Mesüra parnok rongnung kar ama nenok süngyanglu külemertem teküm. Zülua aliba ama, “Parnoki chiyunga ajemtsü amen aser tsüngsangtsü apuso.”

⁸ Aser parnok kari shi jabujari benshi nung anogo ka nung meyirijang metsü ser asem asü; yamaji asenoki mebenshili.

⁹ Mesüra parnoki Kibuba[1] atitang aser per agi samaba ama asenoki Kibubaji matitangli.

¹⁰ Mesüra parnoki nemnem aser tesamatsübai samatsüba ama asenoki menemnemli.

¹¹Itemi parnok dangi tekümdangtsü ka ama adok aser asenok shir dak putu tatem arua lir, asenok dang sayutsü asoshi itemi zülua liasü.

¹²Aji asü nung shibai noktaker ta bilemer, pa alanga lir kümdangdakjang.

¹³Nisungi aremtettsüsa tatitangba alema nenok dangi tatitang maru, aser Tsüngrem temulung lemtetba asü nung pai nenoki aremtettsüba dak alema matitangdaktsütsü, saka nenoki aremtettsüsa aser tatitang nungi jenbutettsüsa pai lenmang renemtsütsü.

¹⁴Anungji kü temeimbatem, süngyanglu külembatem tokjang.

¹⁵Tangatetba purtem den ama ni nenok den jembir; ni kechi ashir aji nenoki bilemdangang.

¹⁶ Kodang asenoki temoatsü marokji moatsür, idangji Khrista zü nung asenoki lemsateper masü no? Kodang asenoki amtsük sangsar, idangji Khrista temang nung asenoki lemsateper masü no?

¹⁷Amtsük ka dang asü nung, asenok aika liaka “temang ka dang” kechiaser asenok ajaki amtsük ka dang lemsateper.

¹⁸ Shi sülen jajaba Israel kinji ajiang. Shiri tetepsetba tenla achir parnoki tenladak melemsateper no?

¹⁹Ajangla ni shinübaji kechi? Süngyanglu dang tenlaba langka lir ta ashir asü? Mesüra süngyangluji langka ka ta ashir asü?

²⁰ Masü, limapurtem tenlatemji Tsüngrem dang masü, saka temenen tanelatem dang tenlar. Aser temenen tanelatem den nenok metendaktsünür ta ni ashir.

²¹Nenoki Kibuba marok aser temenen tanelatem marok nungi külemi mejemtet. Nenoki Kibuba Benjong langbang aser temenen tanelatem benjong langbang anaprongla nung melemsatet.

²² Aji mesüra asenoki Kibuba tenük meremdaktsütsü masü no? Asenok pa dang nungi tashi tuluba asü?

²³“Ajak mela-a dang lir, saka ajakibo tashi meitdaktsür.”

²⁴Ajaki pei ajungtsü mebushi-i pei kiyonger ajungtsü bushiang.

²⁵Kechi shi shishidak ayoker aji mulungsentsü atema kecha masüngdangi chiang.

²⁶Kechiaser alima nung aliba oset ajakji Kibuba meyong.

²⁷Mamanger nisung kati na chiyungtsü jara, aser nai onüra, ne madang kechisa yutsür aji mulungsentsü atema kecha masüngdangi chiang.

²⁸Saka kari ne dang “Ya tenlabatem oset” ta shira, idangji shibai aji ashir, pa atema aser mulungsentsü atema aji machitsü tim.

²⁹Ne mulungsentsü masü, saka tangarba mulungsentsü ta ni ashir; kechiyong kü nüjiba kechiba tangar mulungsentsü agi o bendangdaktsütsü?

³⁰Ni tenüngsang agütsür chira, kechi asoshi ni tenüng asanger, aji asoshi kü indang kechiba majung jembir?

³¹Anungji nenoki “chiyungaka jemaka,” kechisarena inyakaka ajakji Tsüngrem sentsüwangshi asoshi inyakang.

³²Ni ama shibai pei tajangzük mebushi-i tangar nisung aika tajangzük bushia parnok kümzüktsüsa ajak nung nisung ajak dang temulung chia benshi,

³³yamaji Yihuda nungertem süshia, Grik nungertem süshia, Tsüngrem arogo dang süshia, nenokia tangar temetsüdaktsü.