Read njo 1 KORINT 11 Bible Online

1 KORINT 11 - njo bible

1 KORINT 11

¹ Ni kechi koda Khrista jilu ajizüker, yamaji nenokia kü jilu ajizükang.

²Ni nenok tenüng asanger, kechiaser nenoki ni teti bilemteter aser ni nenok dang sayuba ayur,

³aser kinungpuji kinungtsü madak tekolak saka nisung shia tekolak Khrista aser, Khrista tekolak Tsüngrem ta ni nenok nem metetdaktsünür.

⁴Tebur shia shibai tekolak nembanger sarasademdir, mesüra sayutsüngidir, pai pei kolak nung maksü bena arur.

⁵Saka tetsür shibai süku memei-i sarasademdir mesüra sayutsüngidir, lai pei kolak nung maksü bena arur, kechiyong la tekolak sütok den kasa.

⁶Kechiyong tetsür süku memeyira, la tekolak sütokdakjang. Saka tetsür tekolak mejepba mesüra ku sütokbaji maksü süra, ajangla la süku meidakjang.

⁷ Saka teburbo Tsüngrem mesükba aser sentsüwangshi asü nung atangji süku memeitsü tim, tetsürji tebur sentsüwangshi lir.

⁸ Kechiyong teburji tetsür nungi yanglu masü, saka tetsürji tebur nungi yanglu.

⁹ Aser ano teburji tetsür asoshi meyanglu, saka tetsürji tebur asoshi yanglu.

¹⁰Aji asünung Kotak tenyartem ali nung, tetsüri pei kolak nung, la madak tebur tashi aliba temaitsü sayutsü tim.

¹¹Aji saka Kibuba nung tetsürji tebur nungi pilar tabensa masü, aji oda teburjia tetsür nungi pilar tabensa masü.

¹²Kechiyong tetsür kechi koda tebur nungi, aji oda teburji tetsür nungi aso, saka ajakji Tsüngrem nungi lir.

¹³Nenok sasa shitetang, tetsüri süku memei-i Tsüngrem dang sarasademtsü tim asü?

¹⁴Teburi ku talang yura, pa asoshi aji maksü lir, aji yimya agia nenok dang mesayur no?

¹⁵Saka tetsür ku talang ketra, aji la asoshi sentsüwangshi lir, kechiyong la kuji temeibangtsü asoshi aji la nem agütsü.

¹⁶Saka kari iba indang ashishitepnüra, ni ashitsü ajak agi ya dang, oda onok mesüra Tsüngremer arogotemi tekülem nung benshiba tanga yimsü mali.

¹⁷Saka item tesayuba indang ashidang ni nenok dang mepelar, kechiaser nenok külemi sentepbaji tajungba asoshi masü saka tamanungba asoshi lir.

¹⁸Kechiyong tamasa kodang nenok arogo ka ama sentepdir, nenok rongnung telemsatep lir ta ni angazüker, aser ni ya terabo amanger.

¹⁹Kechiyong nenok rongnung tajunger rogo shisanga ajitetdaktsütsü asoshi nenok rongnung obang mapui telemsatep adoka alitsü akok.

²⁰Anungji kodang nenok külemi sentepdir, nenoki achibaji Kibuba Benjongji masü;

²¹Kechiyong ya achidang nisung shiai pei pei meden chiyungadoker, anungji tangar kar yaseta alir aser karbo mesepadoker.

²²Ya kechi! Chiyunga ajemtsü asoshi nenok pei pei ki mali no? Mesüra nenoki Tsüngrem arogo sensatsütsü aser kecha makartem maksüdaktsütsü no? Ni nenok dang kechi ashitsü? Iba nung ni nenok tenüng asangtsü no? Masü, iba nung ni nenok tenüng masangtsü.

²³Kechiyong ni nenok dang kechi o sayuogo, aji ni Kibuba nungi angazük oda pa ashioktsüba aonung Kibuba Yisui amtsük bena aru,

²⁴aser pai tenüngsang agütsür külen pai aji sangsa aser ashi, “Ibai kü mang, koba nenok asoshi raksar, ni bilemtettsü asoshi ya benshiang.”

²⁵ Chiyungba temer külen, yamajisa pai marokji bena aru aser ashi, “Iba marok kü zü nung tasenba tezüngzüktepbaji lir. Nenoki ya ajemba shia ni bilemtettsü asoshi ya benshiang.”

²⁶Kechiyong nenoki kwiben iba amtsük chidir aser iba marok nungi jemdir, pa maru tashi nenoki Kibuba asüba indang sangoktsür.

²⁷Anungji shirisa metemsüba yimya nung amtsükji chidir mesüra pa marokji jemdir, Kibuba temang aser pa zü menena kümdaktsüba taiji pa dak alitsü.

²⁸Saka Nisung kati pei sasa atitangang aser aji oda amtsükji chiang, aser marokji jemang.

²⁹Kechiyong shibai temang indangji meshisadangi chidir aser jemdir pai pei dak tai enloka chia-ajemer.

³⁰Aji asünung nenok rongnung aika tashi mait aser shiranger aser karbo süogo.

³¹Saka asenoki asenok sasa ochishia atitanga tendangra, asenok o mebendangtsü.

³²Saka kodang Kibubai asenok o bendanger, alima den asenok maitsütsü asoshi Kibubai asenok merenshir.

³³Anungji adianutem, kodang nenoki Kibuba Benjong achitsü sentepdir kati ka asoshi ata-ang.

³⁴Nenok sentepba maitsütsü asoshi kari yara, pai pei kidang chiyungdakjang. Aser ni kodang arudir ni tanüngbatemji shidi.