Read njo 1 KORINT 12 Bible Online

1 KORINT 12 - njo bible

1 KORINT 12

¹Ano adianutem, Tanela Temeshi sempettem indang ni nenok nem memetetdaktsüi melinür.

²Nenok kodang limapur liasü, nenok taküm maliba süngyanglutem külemba lenmangi aibelena anidaktsü ta nenoki meteta lir.

³Anungji Tsüngrem Tanela nung jembir kati, “Yisu atakatem sang” ta mashir aser Tanela Temeshi ajanga dangashi nisung shingaia Yisu dang “Kibuba” ta ajatsü makok ta ni nenok nem metetdaktsünür.

⁴Tanela sempet tapu aika lir, saka Tanelaji ka dang,

⁵aser tenzükba mapa tapu aika lir, saka Kibuba ka dang.

⁶Teinyakba mapa tapu tapu lir, saka Tsüngrem shibai ajak nung lia ajakji inyaker, paji ka dang lir.

⁷Nisung shia nem külem ajungtsü asoshi Tanelai jungkai adoka agütsür.

⁸Kechiyong nisung kar nem Tanela ajanga shisatsü o agütsür, aser tangar ka nem kasa Tanela ajanga temetetba o agütsür.

⁹Tangar ka nem Tanela kasa ajanga tamang; aser tangar ka nem tanela kasa ajanga tanebtsü sempet;

¹⁰aser tangar ka nem sayatenya mapa inyakba; aser tangar ka nem sayutsüngiba; aser tangar ka nem tanelatem shitetba; aser tangar ka nem o tapu tapu jembiba; aser tangar ka nem oshitem ratettsü sempet agütsür.

¹¹Saka item ajak Tanela kasai pei mulung agi nisung ka nem lemsa-a apuoktsür.

¹² Kechiyong temang kechi koda ka dang sür tenük-telen aika keter, aser temang ka dang, aji oda Khrista lir.

¹³Kechiyong tanela ka ajanga asenok ajak temang ka nung bapti; Yihuda nungertem süaka, Grik nungertem süaka, alartem süaka, nüjibatem süaka, ajak tanela ka nungi dang jemdaktsü.

¹⁴Kechiaser temang ka nung tenük-telen ka dang masü, saka aika lir.

¹⁵Tetsüngi ni teka masü, anungji ni temang nung maden ta shira, aji ashi nung ibaji temang nung medeni mali.

¹⁶Aser tenarongi, ni tenük masü, anungji ni temang nung maden ta shira, aji ashi nung ibaji temang nung medeni mali.

¹⁷Temang ajak tenük süra kechi agi angashitsü? Temang ajak tenarong süra, kechi agi menemtettsü?

¹⁸Saka Tsüngremi temang nung tenüktelen tapu tapuji pai shimteta yunüba ama ayu.

¹⁹Saka ajakji tenük-telen ka dang süra, temangji kong alitsü?

²⁰Saka itemi tenük-telen aika saka temang ka dang.

²¹Aser tenüki teka dang “ni na asoshi tenüngdaktsü maka ta meshitet.” Mesüra tekolaki tetsüng dang “ni asoshi na tenüngdaktsü maka ta meshitet.”

²²Masü, idakji chia temang nung tashi mait ama aliba tenük-telenji ang tenüngdaktsü kar.

²³Aser item temang tenük-telentem koba akhümtsübu tilaba akaba ta asenoki bilemer, iba nemji ang asenoki aküm tali agütsür, aser asen tenük-telen tobur tamajungbaji tali tobur tajungba lir.

²⁴Saka asen temang tenük-telentem koba tali akhüm taketba lir, item jagi kecha menüngdaker ama lir. Aji saka Tsüngremi asen temangji yamaji külemi yangjema yangluja ali nung akhüm kangabo maketba tenüktelen tem nem ang pai tetushi tali agütsür.

²⁵Ano temang nung lemsatepa kecha makai tenüktelentem shiai kati ka asoshi yaritepa alitsüsa Tsüngremi temangji yamaji yanglua lir.

²⁶Aser tenük-telen ka kangshira, ajak kangshir, aser tenük-telen ka akhüm ketra, iba denji ajaki pelateper.

²⁷Saka nenok Khrista temang lir, aser nenok shiaji iba tenük-telen ka ka lir.

²⁸ Aser Tsüngremi arogo nung kar oda tamasa tenyartem, tanabuba ainkartem, tasembuba nung tesayurtem, iba sülen sayatenya inyakertem, tanebtsürtem, teyaritepertem, yimsüsürtem, aser oshi tapu tapu jembirtem, shimteta yutsü.

²⁹Ajak tenyartem dang asü? Ajak sayutsüngirtem dang asü? Ajak tesayurtem dang asü? Ajaki sayatenya mapatem inyaker asü?

³⁰Ajak dak tanebtsütsü sempettem aka asü? Ajaki oshi tapu tapu agi jembir asü? Ajaki itemji tetezü ratettsütsü akok asü?

³¹Saka temaba sempettem asoshi tali jangra-ang. Aser ano ni nenok dang ajak dang nungi tematiba lenmangji sayutsü.